വാഷിങ്ടൺ അമിതവണ്ണമുള്ള പ്രായമുള്ളവർക്കായി എലി ലില്ലി കമ്പനി പുറത്തിറക്കിയ ഫൗണ്ടായോ' (Foundayo) എന്ന ഭാരം കുറയ്ക്കാനുള്ള ഗുളികയ്ക്ക് അംഗീകാരം നൽകി യുഎസ് എഫ്‌ ഡിഎ (FDA). അമേരിക്കയിൽ വിൽപനയ്ക്ക് അനുമതി ലഭിക്കുന്ന രണ്ടാമത്തെ ഓറൽ ജിഎൽപി മരുന്നാണിത്. കുറഞ്ഞ കലോറിയുള്ള ഭക്ഷണക്രമത്തോടും വ്യായാമത്തോടും ഒപ്പം ദിവസേന ഒരു ഗുളിക വീതം കഴിക്കാനാണ് നിർദ്ദേശിച്ചിരിക്കുന്നത്. വെറും 50 ദിവസത്തിനുള്ളിൽ ഈ മരുന്നിന് അനുമതി നൽകി എന്നത് ശ്രദ്ധേയമാണ്.

ക്ലിനിക്കൽ പരീക്ഷണങ്ങളിൽ, ഉയർന്ന ഡോസ് മരുന്ന് ഉപയോഗിച്ചവർ ശരാശരി  12.3 കിലോഗ്രാം ഭാരം കുറച്ചതായി കണ്ടെത്തി. ഇൻഷുറൻസ് ഇല്ലാത്തവർക്ക് പ്രതിമാസം 149 യുഎസ് ഡോളർ ആണ് മരുന്നിന്റെ വില. 0.8 മില്ലിഗ്രാമിൽ തുടങ്ങി ഘട്ടംഘട്ടമായി ഡോസ് വർദ്ധിപ്പിക്കാനാണ് നിർദ്ദേശം. എന്നാൽ, മരുന്ന് കുട്ടികൾക്ക് സുരക്ഷിതമാണോ എന്ന കാര്യത്തിൽ നിലവിൽ വ്യക്തതയില്ലെന്ന് അധികൃതർ അറിയിച്ചു.

അതേസമയം, ഗൗരവകരമായ പാർശ്വഫലങ്ങളെക്കുറിച്ച് കമ്പനി മുന്നറിയിപ്പ് നൽകുന്നുണ്ട്. ഓക്കാനം, വയറുവേദന, മുടികൊഴിച്ചിൽ എന്നിവയ്ക്ക് പുറമെ തൈറോയ്‌ഡ്‌  ട്യൂമറുകൾക്കും കാൻസറിനും ഈ മരുന്ന് കാരണമായേക്കാം. കൂടാതെ ഇത്തരം മരുന്നുകൾ പാൻക്രിയാറ്റിസ്, കാഴ്ചശക്തി നഷ്ടപ്പെടൽ എന്നിവയുമായി ബന്ധപ്പെട്ടിരിക്കുന്നുവെന്ന് മുൻപുള്ള പഠനങ്ങൾ ചൂണ്ടിക്കാട്ടുന്നുണ്ട്. ഓരോ രോഗിയുടെയും ശാരീരിക പ്രതികരണം അനുസരിച്ചായിരിക്കും ഡോസേജിൽ മാറ്റം വരുത്തുക.