വാഷിംഗ്ടൺ: യുഎസ് സൈന്യം ഇറാനിയൻ നാവികസേനയുടെ ഒമ്പത് കപ്പലുകൾ നശിപ്പിക്കുകയും  പ്രധാന സൈനിക കേന്ദ്രങ്ങൾ ആക്രമിക്കുകയും ചെയ്തതായി പ്രസിഡന്റ് ഡൊണാൾഡ് ട്രംപ് പറഞ്ഞു.  

'നമ്മൾ  9 ഇറാനിയൻ നാവിക കപ്പലുകൾ   മുക്കിയെന്ന് എനിക്ക് വിവരം ലഭിച്ചു. അവയിൽ ചിലത് താരതമ്യേന വലുതും പ്രധാനപ്പെട്ടതുമാണ്,' ട്രംപ്  സോഷ്യൽ മീഡിയയിൽ എഴുതി. 'ബാക്കിയുള്ളവയുടെ പിന്നാലെ പോകുകയാണ് - അവയും ഉടൻ കടലിന്റെ അടിത്തട്ടിൽ കിടക്കും' പ്രസിഡന്റ് എഴുതി.

മറ്റൊരു ആക്രമണത്തിൽ,   അവരുടെ നാവിക ആസ്ഥാനം വലിയതോതിൽ നശിപ്പിച്ചുവെന്നും പ്രസിഡന്റ് വ്യക്തമാക്കി.

'ഇന്നലെ രാത്രി, 2,000 പൗണ്ട് ബോംബുകൾ ഘടിപ്പിച്ച യുഎസ് ബി-2 സ്റ്റെൽത്ത് ബോംബറുകൾ ഇറാന്റെ കരുത്തുറ്റ ബാലിസ്റ്റിക് മിസൈൽ കേന്ദ്രങ്ങൾ ആക്രമിച്ചു,” യുഎസ് സെൻട്രൽ കമാൻഡ് (CENTCOM)  പറയുന്നു. 'ഒരു രാജ്യവും അമേരിക്കയുടെ ദൃഢനിശ്ചയത്തെ ഒരിക്കലും സംശയിക്കരുത്.'

ഓപ്പറേഷൻ എപ്പിക് ഫ്യൂറി ആക്രമണത്തിന്റെ  തുടക്കത്തിൽ തന്നെ ഒരു ഇറാനിയൻ ജമറാൻ-ക്ലാസ് കോർവെറ്റ് തകർന്നുവെന്നും CENTCOM റിപ്പോർട്ട് ചെയ്തു. കപ്പൽ നിലവിൽ   ഒമാൻ ഉൾക്കടലിന്റെ അടിയിലേക്ക് മുങ്ങുകയാണ്.

ഇറാന്റെ സായുധ സേനയിലെ അംഗങ്ങൾ, IRGC, പോലീസ് എന്നിവരോട് നിങ്ങളുടെ ആയുധങ്ങൾ താഴെ വയ്ക്കാൻ  പ്രസിഡന്റ്  നൽകിയ മുന്നറിയിപ്പ് കമാൻഡ്  ഉദ്ധരിച്ചു.  

തങ്ങളുടെ പ്രതികരണം യുഎസ് സൈനിക കേന്ദ്രങ്ങളെ  മാത്രമേ ലക്ഷ്യമിട്ടിട്ടുള്ളൂ എന്ന ടെഹ്‌റാന്റെ വാദം സൈനിക കമാൻഡ് നിരസിച്ചു. ഇറാൻ സിവിലിയന്മാരെ സജീവമായി ലക്ഷ്യമിടുന്നു എന്നും ഒരു ഡസനിലധികം സ്ഥലങ്ങൾ ആക്രമിച്ചുവെന്നും CENTCOM ആരോപിച്ചു. ദുബായ് അന്താരാഷ്ട്ര വിമാനത്താവളം, കുവൈറ്റ് അന്താരാഷ്ട്ര വിമാനത്താവളം, ദുബായിലെ സായിദ് അന്താരാഷ്ട്ര വിമാനത്താവളം, ഇറാഖിലെ എർബിൽ അന്താരാഷ്ട്ര വിമാനത്താവളം, ദുബായിലെ ഫെയർമോണ്ട് പാം ഹോട്ടൽ, ദുബായിലെ ബുർജ് അൽ അറബ് ഹോട്ടൽ, ബഹ്‌റൈനിലെ ക്രൗൺ പ്ലാസ ഹോട്ടൽ, ദുബായ് തുറമുഖം, ഹൈഫ എണ്ണ ശുദ്ധീകരണശാല, ഇസ്രായേലിലെ ബീറ്റ് ഷെമെഷ്, ടെൽ അവീവ് എന്നിവിടങ്ങളിലെ റെസിഡൻഷ്യൽ ഏരിയകൾ, ബഹ്‌റൈനിലെ ഇറ വ്യൂസ് ടവേഴ്‌സിന്റെ റെസിഡൻഷ്യൽ ഏരിയ, ഖത്തറിലെ റെസിഡൻഷ്യൽ ഏരിയകൾ എന്നിവ ഇതിൽ ഉൾപ്പെടുന്നു.