ഹൂസ്റ്റണ്‍ : ടെക്‌സാസിലെ കാറ്റി മേഖലയില്‍ വീടിനോട് ചേര്‍ന്നുള്ള സ്വിമ്മിംഗ് പൂളില്‍ വീണ് രണ്ട് പെണ്‍കുഞ്ഞുങ്ങള്‍ മരിച്ചു. ബുധനാഴ്ച രാവിലെയാണ് രണ്ട് വയസ്സും മൂന്ന് വയസ്സും പ്രായമുള്ള സഹോദരിമാരെ സ്വിമ്മിംഗ് പൂളില്‍ അബോധാവസ്ഥയില്‍ കണ്ടെത്തിയത്.

രാവിലെ 11:30-ഓടെ ഗ്രീക്ക് എഡ്ജ് കോര്‍ട്ടിലെ വീടിന് പിന്നിലുള്ള പൂളിലാണ് അപകടം നടന്നത്. കുട്ടികള്‍ അവരുടെ അമ്മയ്ക്കും മുത്തശ്ശിമാര്‍ക്കും ഒപ്പമാണ് ഈ വീട്ടില്‍ താമസിച്ചിരുന്നത്.

സാധനങ്ങള്‍ വാങ്ങാന്‍ പുറത്തുപോയി തിരിച്ചെത്തിയ മുത്തശ്ശിയാണ് കുട്ടികള്‍ വെള്ളത്തില്‍ കിടക്കുന്നത് ആദ്യം കണ്ടത്. ഈ സമയം കുട്ടികളുടെ അമ്മയും മുത്തച്ഛനും വീടിനുള്ളില്‍ ഉറങ്ങുകയായിരുന്നു.

മുത്തശ്ശിയുടെ നിലവിളി കേട്ട് ഓടിയെത്തിയ അയല്‍വാസികളും പോലീസും ചേര്‍ന്ന് ഉടന്‍ തന്നെ പ്രഥമശുശ്രൂഷ നല്‍കി. ഹെലികോപ്റ്റര്‍ മാര്‍ഗ്ഗം കുട്ടികളെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

ഹാരിസ് കൗണ്ടി ഷെരീഫ് എഡ് ഗോണ്‍സാലസ് സംഭവം സ്ഥിരീകരിച്ചു. പോലീസ് അന്വേഷണം ആരംഭിച്ചിട്ടുണ്ട്. സമീപകാലത്ത് ഹൂസ്റ്റണ്‍ മേഖലയില്‍ കുട്ടികള്‍ വെള്ളത്തില്‍ വീണുള്ള അപകടങ്ങള്‍ വര്‍ദ്ധിക്കുന്നത് അധികൃതര്‍ ഗൗരവത്തോടെയാണ് കാണുന്നത്.