മൂന്നാർ: മൂന്നാറിൽ അതിശൈത്യം വീണ്ടും കടുക്കുന്നു. കഴിഞ്ഞ രണ്ട് ദിവസമായി അന്തരീക്ഷ താപനില ഗണ്യമായി കുറഞ്ഞതോടെ സഞ്ചാരികളുടെ വലിയ തിരക്കാണ് അനുഭവപ്പെടുന്നത്. ചെണ്ടുവരയിൽ താപനില 0 ഡിഗ്രി സെൽഷ്യസ് വരെ താഴ്ന്നു. ഉൾപ്രദേശങ്ങളായ സൈലന്റ് വാലി, നല്ലതണ്ണി എന്നിവിടങ്ങളിൽ മൂന്ന് ഡിഗ്രി സെൽഷ്യസാണ് രേഖപ്പെടുത്തിയത്.

താപനില പൂജ്യത്തിലെത്തിയതോടെ പുലർച്ചെ പുൽമേടുകളിൽ മഞ്ഞുപാളികൾ രൂപപ്പെട്ടു തുടങ്ങിയിട്ടുണ്ട്. ഡിസംബർ 13-ന് ചെണ്ടുവരയിൽ രേഖപ്പെടുത്തിയ -1 ഡിഗ്രി സെൽഷ്യസായിരുന്നു ഈ സീസണിലെ ഏറ്റവും കുറഞ്ഞ താപനില. തണുപ്പ് ശക്തമായതോടെ കന്നിമല, ലക്ഷ്മി എസ്റ്റേറ്റ് തുടങ്ങിയ സ്ഥലങ്ങളിലെ പുൽമേടുകളിലെ പ്രഭാത കാഴ്ചകൾ കാണാൻ നൂറുകണക്കിന് സഞ്ചാരികളാണ് എത്തുന്നത്.

അൻപതാം വാർഷികത്തിന്റെ നിറവിൽ നിൽക്കുന്ന ഇരവികുളം ദേശീയോദ്യാനത്തിന് കഴിഞ്ഞ വർഷം രാജ്യത്തെ ഏറ്റവും മികച്ച ദേശീയോദ്യാനമെന്ന ബഹുമതി ലഭിച്ചു. കേന്ദ്ര പരിസ്ഥിതി-വനം മന്ത്രാലയത്തിന്റെ മാനേജ്‌മെന്റ് എഫക്ടീവ് എവാല്യൂവേഷനിൽ 92.97 ശതമാനം സ്കോർ നേടിയാണ് ഇരവികുളം ഒന്നാമതെത്തിയത്.