മിനിയാപൊളിസ് : അമേരിക്കയിലെ മിനസോട്ടയില്‍ ഫെഡറല്‍ ഇമിഗ്രേഷന്‍ ഏജന്‍സികള്‍  നടത്തുന്ന കര്‍ശനമായ കുടിയേറ്റ വിരുദ്ധ നടപടികള്‍ക്കെതിരെ ആയിരങ്ങള്‍ പങ്കെടുത്ത വമ്പിച്ച പ്രതിഷേധ മാര്‍ച്ച് നടന്നു. 'സത്യത്തിന്റെയും സ്വാതന്ത്ര്യത്തിന്റെയും ദിനം' എന്ന് പേരിട്ട പ്രതിഷേധത്തിന്റെ ഭാഗമായി മിനിയാപൊളിസ് നഗരത്തില്‍ പൊതുപണിമുടക്കിന് സമാനമായ സാഹചര്യമാണ് നിലവിലുള്ളത്.

നൂറുകണക്കിന് ബിസിനസ് സ്ഥാപനങ്ങള്‍ അടഞ്ഞുകിടന്നു. ജോലിക്കോ സ്‌കൂളിലോ പോകാതെയും ഷോപ്പിംഗ് ഒഴിവാക്കിയും ജനങ്ങള്‍ പ്രതിഷേധത്തില്‍ പങ്കുചേര്‍ന്നു. യു.എസ്. ബാങ്ക് സ്റ്റേഡിയം മുതല്‍ ടാര്‍ഗെറ്റ് സെന്റര്‍ വരെയായിരുന്നു പ്രതിഷേധ മാര്‍ച്ച്.

ഇമിഗ്രേഷന്‍ അറസ്റ്റുകള്‍ അവസാനിപ്പിക്കണമെന്ന് ആവശ്യപ്പെട്ട് മിനിയാപൊളിസ്-സെന്റ് പോള്‍ വിമാനത്താവളത്തില്‍ പ്രതിഷേധിച്ച ഡസന്‍ കണക്കിന് മതനേതാക്കളെ പോലീസ് അറസ്റ്റ് ചെയ്തു.

സൗത്ത് മിനിയാപൊളിസില്‍ രണ്ട് വയസ്സുള്ള പെണ്‍കുട്ടിയെയും പിതാവിനെയും ഐസ് ഉദ്യോഗസ്ഥര്‍ തടഞ്ഞുവെച്ചതും, അഞ്ചുവയസ്സുകാരനെ 'ഇരയാക്കി' പിതാവിനെ പിടികൂടിയെന്ന ആരോപണവും പ്രതിഷേധത്തിന്റെ ആക്കം കൂട്ടി.

പ്രാദേശിക അധികൃതര്‍ ഫെഡറല്‍ ഏജന്‍സികളുമായി സഹകരിക്കാത്തതാണ് സംഘര്‍ഷങ്ങള്‍ക്ക് കാരണമെന്ന് മിനിയാപൊളിസ് സന്ദര്‍ശിച്ച വൈസ് പ്രസിഡന്റ് ജെ.ഡി. വാന്‍സ് കുറ്റപ്പെടുത്തി. എന്നാല്‍ മിനിയാപൊളിസ് പോലീസ് ഈ ആരോപണം നിഷേധിച്ചു.

നേരത്തെ പള്ളിയിലെ ശുശ്രൂഷ തടസ്സപ്പെടുത്തിയതിന് അറസ്റ്റിലായ മനുഷ്യാവകാശ പ്രവര്‍ത്തക നെക്കിമ ലെവി ആംസ്‌ട്രോങ്ങ് ഉള്‍പ്പെടെയുള്ള മൂന്ന് പേരെ വെള്ളിയാഴ്ച ഉച്ചയോടെ വിട്ടയച്ചു. ഇമിഗ്രേഷന്‍ ഏജന്‍സികളുടെ 'ഓപ്പറേഷന്‍ മെട്രോ സര്‍ജ്' എന്ന നടപടിക്കെതിരെ കനത്ത രോഷമാണ് സംസ്ഥാനത്തുടനീളം ഉയരുന്നത്.