കിസിമ്മി (ഫ്‌ലോറിഡ) : ഡിസ്‌നി വേള്‍ഡ് തീം പാര്‍ക്കുകള്‍ക്ക് സമീപമുള്ള വിനോദസഞ്ചാര കേന്ദ്രത്തില്‍ മൂന്ന് വിനോദസഞ്ചാരികളെ വെടിവെച്ചുകൊന്ന സംഭവത്തില്‍ 29-കാരനായ അഹമ്മദ് ജിഹാദ് ബോജെ (Ahmad Jihad Bojeh) പിടിയിലായി. ശനിയാഴ്ച ഉച്ചയോടെ കിസിമ്മിയിലെ ഇന്ത്യന്‍ പോയിന്റ് സര്‍ക്കിളിലുള്ള ഒരു വാടക വീടിന് പുറത്താണ് കൊലപാതകം നടന്നത്.

മിഷിഗണില്‍ നിന്നുള്ള റോബര്‍ട്ട് ലൂയിസ് ക്രാഫ്റ്റ് (70), ഒഹായോയില്‍ നിന്നുള്ള ഇദ്ദേഹത്തിന്റെ സഹോദരന്‍ ഡഗ്ലസ് ജോസഫ് ക്രാഫ്റ്റ് (68) എന്നിവരാണ് മരിച്ച രണ്ടുപേര്‍. മൂന്നാമത്തെയാളെ തിരിച്ചറിഞ്ഞിട്ടുണ്ടെങ്കിലും കുടുംബത്തെ അറിയിക്കുന്നതിനായി പേര് വെളിപ്പെടുത്തിയിട്ടില്ല.

വാടകയ്‌ക്കെടുത്ത വീടിന് പുറത്ത് വാഹനത്തിന്റെ തകരാര്‍ കാരണം കുടുങ്ങിപ്പോയതായിരുന്നു ഇവര്‍. ഈ സമയത്താണ് തൊട്ടടുത്ത വീട്ടില്‍ താമസിക്കുന്ന പ്രതി ഇവര്‍ക്ക് നേരെ വെടിയുതിര്‍ത്തത്.

പ്രതി മുന്‍പും സമാനമായ രീതിയില്‍ വെടിവെപ്പ് നടത്തിയിട്ടുള്ളയാളാണെന്ന് പോലീസ് പറഞ്ഞു. 2021-ല്‍ ഒരാള്‍ക്ക് നേരെ വെടിയുതിര്‍ത്ത കേസില്‍ ഇയാള്‍ പിടിക്കപ്പെട്ടിരുന്നെങ്കിലും മാനസികാസ്വാസ്ഥ്യം കണക്കിലെടുത്ത് അന്ന് വിട്ടയച്ചിരുന്നു.

ഞായറാഴ്ച ബോജെ കോടതിയില്‍ ഹാജരായി, ബോണ്ടില്ലാതെ അദ്ദേഹത്തെ ഓസ്സിയോള കൗണ്ടി ജയിലില്‍ തടങ്കലില്‍ വയ്ക്കാന്‍ ഒരു ന്യായമായ കാരണം ജഡ്ജി കണ്ടെത്തി. മൂന്ന് കൊലപാതകക്കുറ്റങ്ങളാണ് ഇയാള്‍ക്കെതിരെ ചുമത്തിയിരിക്കുന്നത്.

പ്രതി നിലവില്‍ പോലീസ് കസ്റ്റഡിയിലാണെന്നും പ്രദേശവാസികള്‍ക്ക് മറ്റ് ഭീഷണികളില്ലെന്നും ഒസിയോള കൗണ്ടി ഷെരീഫ് ക്രിസ്റ്റഫര്‍ ബ്ലാക്ക്മാന്‍ അറിയിച്ചു. യാതൊരു പ്രകോപനവുമില്ലാതെ നടത്തിയ ഈ കൊലപാതകത്തിന്റെ കൂടുതല്‍ കാരണങ്ങള്‍ പോലീസ് അന്വേഷിച്ചു വരികയാണ്.