ഹൂസ്റ്റണ്‍: ഇറാനിലെ ഭരണകൂട വിരുദ്ധ പ്രക്ഷോഭങ്ങള്‍ക്ക് ഐക്യദാര്‍ഢ്യം പ്രഖ്യാപിച്ച് അമേരിക്കയിലെ ഹൂസ്റ്റണില്‍ ഇറാനിയന്‍ സമൂഹം വന്‍ പ്രതിഷേധം സംഘടിപ്പിച്ചു. ഹൂസ്റ്റണിലെ ഗലേറിയ ഏരിയയില്‍ ഒത്തുകൂടിയ നൂറുകണക്കിന് ആളുകള്‍ ഇറാനില്‍ നിലനില്‍ക്കുന്ന ഡിജിറ്റല്‍ ബ്ലാക്കൗട്ടിലും (ഇന്റര്‍നെറ്റ് വിച്ഛേദിക്കല്‍) മനുഷ്യാവകാശ ലംഘനങ്ങളിലും ശക്തമായ പ്രതിഷേധം രേഖപ്പെടുത്തി.

ഇറാനിലെ പ്രക്ഷോഭങ്ങളില്‍ ഇതുവരെ 3,000 മുതല്‍ 12,000 വരെ ആളുകള്‍ കൊല്ലപ്പെട്ടതായാണ് മനുഷ്യാവകാശ സംഘടനകളും അന്താരാഷ്ട്ര മാധ്യമങ്ങളും റിപ്പോര്‍ട്ട് ചെയ്യുന്നത്. ഇതില്‍ ഭൂരിഭാഗവും 30 വയസ്സിന് താഴെയുള്ള യുവാക്കളാണ്.

പ്രക്ഷോഭങ്ങള്‍ ലോകമറിയാതിരിക്കാന്‍ ഇറാന്‍ ഭരണകൂടം രാജ്യത്ത് ഇന്റര്‍നെറ്റ് പൂര്‍ണ്ണമായും വിച്ഛേദിച്ചിരിക്കുകയാണ്. ഇതിനാല്‍ ഹൂസ്റ്റണിലുള്ളവര്‍ക്ക് ഇറാനിലെ തങ്ങളുടെ കുടുംബാംഗങ്ങളെ ബന്ധപ്പെടാന്‍ സാധിക്കുന്നില്ല.

ഡിസംബര്‍ അവസാനം മുതല്‍ ഇതുവരെ 50,000-ത്തിലധികം ആളുകളെ ഭരണകൂടം തടവിലാക്കിയതായി റിപ്പോര്‍ട്ടുകളുണ്ട്. ആശുപത്രികളില്‍ ചികിത്സയില്‍ കഴിയുന്ന പ്രതിഷേധക്കാരെപ്പോലും സുരക്ഷാ സേന ബലംപ്രയോഗിച്ച് പിടികൂടുന്നതായി ദൃക്‌സാക്ഷികള്‍ പറയുന്നു.

രാജ്യത്തെ കടുത്ത സാമ്പത്തിക പ്രതിസന്ധിയും പണപ്പെരുപ്പവും അടിസ്ഥാനമാക്കിയാണ് ഡിസംബര്‍ 28-ന് പ്രതിഷേധം ആരംഭിച്ചത്. പിന്നീട് ഇത് ഭരണകൂടത്തെ പുറത്താക്കണമെന്ന (Regime Change) വലിയ പ്രസ്ഥാനമായി മാറി.

'ഇറാനില്‍ ഇപ്പോള്‍ പൂര്‍ണ്ണമായ ഡിജിറ്റല്‍ ഇരുട്ടാണ്. ലക്ഷക്കണക്കിന് നിരപരാധികള്‍ അവിടെ കൊല്ലപ്പെടുന്നു. അവര്‍ ആഗ്രഹിക്കുന്നത് ഒരു പുതിയ ഭരണകൂടമാണ്,' പ്രതിഷേധത്തില്‍ പങ്കെടുത്ത ഒരു ഇറാനിയന്‍ യുവതി പറഞ്ഞു.