Image

2026ലെ ഐസൻഹോവർ ഗ്ലോബൽ ട്രാൻസ്ഫർമേഷൻ പുരസ്കാരം സണ്ണി വർക്കിക്ക്

Published on 18 November, 2026
 2026ലെ ഐസൻഹോവർ ഗ്ലോബൽ ട്രാൻസ്ഫർമേഷൻ പുരസ്കാരം സണ്ണി വർക്കിക്ക്

ന്യൂയോർക്ക്: ആഗോള വിദ്യാഭ്യാസ മേഖലയിൽ ശ്രദ്ധേയമായ സംഭാവനകൾ നൽകിയ മലയാളിയും വിദ്യാഭ്യാസ സംരംഭകനും മനുഷ്യസ്‌നേഹിയുമായ സണ്ണി വർക്കിക്ക് 2026ലെ ഐസൻഹോവർ ഗ്ലോബൽ ട്രാൻസ്ഫർമേഷൻ പുരസ്കാരം. നവംബർ 9ന് ന്യൂയോർക്കിൽ നടന്ന പ്രൗഢഗംഭീരമായ ചടങ്ങിലാണ് പുരസ്കാരം സമ്മാനിച്ചത്. ഗുണമേന്മയുള്ള വിദ്യാഭ്യാസം കൂടുതൽ കുട്ടികളിലേക്ക് എത്തിക്കുന്നതിനും അധ്യാപകരുടെ പ്രാധാന്യം ആഗോളതലത്തിൽ ഉയർത്തുന്നതിനുമായി നടത്തിയ ദീർഘകാല പ്രവർത്തനങ്ങളാണ് അദ്ദേഹത്തെ പുരസ്കാരത്തിന് അർഹനാക്കിയത്.

മുൻ പ്രസിഡന്റ് ബിൽ ക്ലിന്റണും മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സും വീഡിയോ സന്ദേശങ്ങളിലൂടെ വർക്കിയെ അഭിനന്ദിച്ചു. ഓരോ കുട്ടിക്കും മികച്ച വിദ്യാഭ്യാസവും മെച്ചപ്പെട്ട ഭാവിയും ഉറപ്പാക്കുന്നതിനായി ജീവിതം സമർപ്പിച്ച വ്യക്തിയാണ് വർകിയെന്ന് ക്ലിന്റൺ പറഞ്ഞു. ലോകത്തിന്റെ വിവിധ ഭാഗങ്ങളിലെ പിന്നാക്ക സമൂഹങ്ങൾക്കിടയിൽ സ്കൂളുകൾ സ്ഥാപിക്കുകയും അധ്യാപകർക്ക് പരിശീലനം നൽകുകയും ചെയ്ത അദ്ദേഹത്തിന്റെ പ്രവർത്തനങ്ങൾ വിദ്യാഭ്യാസ മേഖലയിൽ വലിയ മാറ്റങ്ങൾ സൃഷ്ടിച്ചതായും ക്ലിന്റൺ ചൂണ്ടിക്കാട്ടി.

വിദ്യാഭ്യാസ നയരൂപീകരണത്തിനായുള്ള ഗവേഷണങ്ങളിലും അന്താരാഷ്ട്ര വേദികളിലും വർക്കി നൽകിയ സംഭാവനകളെയും മികച്ച അധ്യാപകരെയും വിദ്യാർഥികളെയും വിദ്യാലയങ്ങളെയും അംഗീകരിക്കുന്നതിനായി അദ്ദേഹം നടത്തിയ പ്രവർത്തനങ്ങളെയും ക്ലിന്റൺ പ്രശംസിച്ചു. വിദ്യാഭ്യാസത്തെക്കുറിച്ച് സംസാരിക്കുക മാത്രമല്ല, പ്രായോഗികമായി ഇടപെട്ട് എണ്ണമറ്റ മനുഷ്യരുടെ ജീവിതത്തിൽ മാറ്റം സൃഷ്ടിക്കാനും യുവതലമുറയ്ക്ക് പുതിയ അവസരങ്ങൾ തുറന്നുകൊടുക്കാനും അദ്ദേഹത്തിന് കഴിഞ്ഞുവെന്നും ക്ലിന്റൺ പറഞ്ഞു.

വർക്കിയുടെ മാതാപിതാക്കൾ ആരംഭിച്ച വിദ്യാഭ്യാസ സംരംഭത്തെ ആഗോളതലത്തിൽ ശ്രദ്ധേയമായ ജെംസ് എജ്യുക്കേഷൻ ശൃംഖലയായി വളർത്തിയെടുത്തതിനെ ബിൽ ഗേറ്റ്സും അഭിനന്ദിച്ചു. ബിസിനസ് സംരംഭങ്ങളിലൂടെയും ജീവകാരുണ്യ പ്രവർത്തനങ്ങളിലൂടെയും ലോകമെമ്പാടുമുള്ള വിദ്യാഭ്യാസ പുരോഗതിക്കായി അദ്ദേഹം നടത്തുന്ന ഇടപെടലുകൾ മാതൃകാപരമാണെന്ന് ഗേറ്റ്സ് പറഞ്ഞു. 2015ൽ വർക്കി ആഗോള വിദ്യാഭ്യാസ മേഖലയിലെ ആദ്യകാല ജീവകാരുണ്യ പ്രവർത്തകരിൽ ഒരാളായി രംഗത്തെത്തിയതുമുതൽ ഇരുവരും സഹകരിച്ചുവരികയാണ്. വിദ്യാഭ്യാസ പദ്ധതികളുടെ ഫലപ്രാപ്തി വിലയിരുത്തുന്നതിനും കൂടുതൽ ആളുകളെ ഈ മേഖലയിലേക്ക് ആകർഷിക്കുന്നതിനും കുട്ടികൾക്ക് ലഭിക്കുന്ന വിദ്യാഭ്യാസത്തിന്റെ ഗുണനിലവാരം മെച്ചപ്പെടുത്തുന്നതിനും ഒരുമിച്ച് പ്രവർത്തിച്ചുവരുന്നതായും ഗേറ്റ്സ് വ്യക്തമാക്കി.

65 വർഷത്തിലേറെ നീളുന്ന കുടുംബത്തിന്റെ വിദ്യാഭ്യാസ പാരമ്പര്യമാണ് സണ്ണി വർക്കിയുടെ പ്രവർത്തനങ്ങൾക്ക് അടിത്തറ. വിവിധ സാമ്പത്തിക പശ്ചാത്തലങ്ങളിൽ നിന്നുള്ള കുട്ടികൾക്ക് ഗുണമേന്മയുള്ള വിദ്യാഭ്യാസം ലഭ്യമാക്കുകയെന്ന ലക്ഷ്യത്തോടെ അദ്ദേഹം സ്ഥാപിച്ച ജെംസ് എജ്യുക്കേഷൻ ഇന്ന് ലോകത്തിലെ ഏറ്റവും വലിയ സ്വകാര്യ സ്കൂൾ വിദ്യാഭ്യാസ ശൃംഖലകളിലൊന്നാണ്. ഇതുവരെ അഞ്ചു ലക്ഷത്തിലധികം വിദ്യാർഥികൾക്ക് വിദ്യാഭ്യാസം നൽകിയ സ്ഥാപനം നിലവിൽ സ്വന്തം ഉടമസ്ഥതയിലും നടത്തിപ്പിലുമുള്ള സ്കൂളുകളിലൂടെ ഏകദേശം രണ്ടു ലക്ഷം വിദ്യാർഥികൾക്ക് സേവനം നൽകുന്നു. വിവിധ അന്താരാഷ്ട്ര പാഠ്യപദ്ധതികളും സാമ്പത്തികശേഷിക്കനുസരിച്ചുള്ള വിദ്യാഭ്യാസ സൗകര്യങ്ങളും ജെംസ് ഒരുക്കുന്നുണ്ട്.

അധ്യാപക പരിശീലനവും പിന്നാക്ക മേഖലകളിലെ വിദ്യാഭ്യാസ അവസരങ്ങളുടെ വിപുലീകരണവും ലക്ഷ്യമിട്ട് വർകി സ്ഥാപിച്ച വർക്കി ഫൗണ്ടേഷനും ആഗോളതലത്തിൽ ശ്രദ്ധേയമാണ്. 2015ൽ മികച്ച അധ്യാപകരെ ആദരിക്കുന്നതിനായി പത്തുലക്ഷം ഡോളർ സമ്മാനത്തുകയുള്ള ഗ്ലോബൽ ടീച്ചർ പ്രൈസ് ഫൗണ്ടേഷൻ ആരംഭിച്ചു. 2021ൽ ഒരു ലക്ഷം ഡോളർ സമ്മാനത്തുകയുള്ള ഗ്ലോബൽ സ്റ്റുഡന്റ് പ്രൈസും 2026ൽ പത്തുലക്ഷം ഡോളർ സമ്മാനത്തുകയുള്ള ഗ്ലോബൽ സ്കൂൾസ് പ്രൈസും അവതരിപ്പിച്ചു.

അധ്യാപക പരിശീലനം, വിദ്യാഭ്യാസ സാങ്കേതികവിദ്യ, പെൺകുട്ടികളുടെ വിദ്യാഭ്യാസം, അഭയാർഥി വിദ്യാഭ്യാസം തുടങ്ങിയ മേഖലകളിൽ വിവിധ സർക്കാരുകളുമായും സംഘടനകളുമായും സഹകരിച്ച് ഫൗണ്ടേഷൻ പ്രവർത്തിക്കുന്നു. ഫൗണ്ടേഷന്റെ കണക്കുകൾ പ്രകാരം, ഇതിന്റെ പദ്ധതികളിലൂടെ ലോകമെമ്പാടുമായി 40,000ത്തിലധികം അധ്യാപകരിലേക്കും 16 ലക്ഷം കുട്ടികളിലേക്കും സഹായമെത്തിച്ചിട്ടുണ്ട്.

തന്റെ സമ്പത്തിന്റെ പകുതിയിലധികം ജീവകാരുണ്യ പ്രവർത്തനങ്ങൾക്കായി സംഭാവന ചെയ്യുമെന്ന് പ്രതിജ്ഞയെടുത്ത് ഗിവിങ് പ്ലെഡ്ജിൽ ഒപ്പുവെച്ച ആദ്യ വിദ്യാഭ്യാസ സംരംഭകനാണ് സണ്ണി വർക്കി. വിദ്യാഭ്യാസ പങ്കാളിത്തത്തിനായുള്ള യുനെസ്കോ ഗുഡ്‌വിൽ അംബാസഡറായി നിയമിക്കപ്പെട്ട അദ്ദേഹം ഇന്ത്യയുടെ പത്മശ്രീ പുരസ്കാരത്തിനും അർഹനായിട്ടുണ്ട്.

മുൻ പ്രസിഡന്റ് ഡ്വൈറ്റ് ഡി. ഐസൻഹോവറിന്റെ നേതൃത്വത്തിൽ സ്ഥാപിതമായ ബിസിനസ് കൗൺസിൽ ഫോർ ഇന്റർനാഷണൽ അണ്ടർസ്റ്റാൻഡിങ് 1984ലാണ് ഐസൻഹോവർ അവാർഡുകൾക്ക് തുടക്കമിട്ടത്. ആഗോള നേതൃത്വത്തിനും രാജ്യാന്തര സഹകരണത്തിനും സംഭാവനകൾ നൽകുന്ന ബിസിനസ്, സർക്കാർ, അന്താരാഷ്ട്ര സംഘടനാ മേഖലകളിലെ പ്രമുഖരെയാണ് പുരസ്കാരങ്ങൾക്കായി പരിഗണിക്കുന്നത്. 'ലീഡിങ് വിത്ത് പർപ്പസ്: ഇൻവെസ്റ്റിങ് ഇൻ ടുമോറോ' എന്ന പ്രമേയത്തിലായിരുന്നു 2026ലെ പുരസ്കാരച്ചടങ്ങ്.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക