Image

വിജയ് സർക്കാരിന് തിരിച്ചടി; തമിഴ്‌നാട്ടില്‍ നിന്ന് പാറയും മണലും കൊണ്ടുപോകുന്നതിനുള്ള വിലക്ക് മദ്രാസ് ഹൈക്കോടതി നീക്കി

Published on 17 November, 2026
വിജയ് സർക്കാരിന് തിരിച്ചടി; തമിഴ്‌നാട്ടില്‍ നിന്ന് പാറയും  മണലും  കൊണ്ടുപോകുന്നതിനുള്ള വിലക്ക് മദ്രാസ് ഹൈക്കോടതി നീക്കി

തമിഴ്‌നാട്ടില്‍ നിന്നുള്ള പാറയും മണലും ഉൾപ്പെടെയുള്ള ക്വാറി ഉല്‍പന്നങ്ങള്‍ കേരളമടക്കം അയല്‍സംസ്ഥാനങ്ങളിലേക്ക് കൊണ്ടുപോകുന്നത് നിരോധിച്ച് വിജയ് സര്‍ക്കാര്‍ പുറത്തിറക്കിയ ഉത്തരവ് മദ്രാസ് ഹൈക്കോടതി റദ്ദാക്കി. 

കഴിഞ്ഞ ജൂലൈയില്‍ ഭേദഗതി വരുത്തിയ 2011ലെ നിയമത്തിലെ '3 എ' ചട്ടം ഭരണഘടനാ വിരുദ്ധമാണെന്ന് ചീഫ് ജസ്റ്റിസ് അധ്യക്ഷനായ ബെഞ്ച് വിധിച്ചു. ഇത്തരത്തില്‍ താല്‍ക്കാലിക നിയന്ത്രണങ്ങള്‍ ഏര്‍പ്പെടുത്താന്‍ ജിയോളജി വകുപ്പ് ഡയറക്ടര്‍ക്ക് അധികാരമില്ലെന്നും കോടതി വ്യക്തമാക്കി. പാറക്കല്ല്, മെറ്റല്‍ ജല്ലി, എംസാന്‍ഡ് അടക്കം നിര്‍മാണ സാമഗ്രികളുടെ നീക്കം തടഞ്ഞ ചട്ടം ഭരണഘടനാ വിരുദ്ധമാണെന്ന് ചീഫ് ജസ്റ്റിസ് ബെഞ്ച് ഉത്തരവിട്ടു.

2027 ജനുവരി 25 വരെ നിരോധനം ഏര്‍പ്പെടുത്തിക്കൊണ്ടായിരുന്നു തമിഴ്‌നാട് സര്‍ക്കാര്‍ നേരത്തെ ഉത്തരവിറക്കിയത്. ഈ നിരോധനം കേരളത്തിലെ നിര്‍മാണ മേഖലയെയും ദേശീയപാത നിര്‍മാണത്തെയും സാരമായി ബാധിച്ചിരുന്നു. നിയന്ത്രണത്തോടെ തിരുനെല്‍വേലി, തെങ്കാശി, കന്യാകുമാരി എന്നിവിടങ്ങളില്‍ നിന്ന് നിര്‍മാണ സാമഗ്രികളുടെ വരവ് കുറഞ്ഞു. ഇതില്‍ ഇളവ് വേണമെന്ന് കേരളം ആവശ്യപ്പെടുകയും വിഷയത്തില്‍ കേരള മുഖ്യമന്ത്രി വി ഡി സതീശന്‍ തമിഴ്നാട് മുഖ്യമന്ത്രി വിജയ്ക്ക് കത്തയക്കുകയും ചെയ്തിരുന്നു. അനുകൂലമായ നിലപാട് സ്വീകരിക്കാമെന്ന് അറിയിച്ചെങ്കിലും ഉത്തരവ് പിൻവലിക്കാനോ നിയന്ത്രണത്തിൽ ഇളവ് വരുത്താനോ തമിഴ്നാട് സർക്കാർ തയാറായിരുന്നില്ല.

വിഴിഞ്ഞം തുറമുഖം, വല്ലാര്‍പാടം കണ്ടെയ്‌നര്‍ ടെര്‍മിനല്‍ എന്നിവയെ ദേശീയപാതയുമായി ബന്ധിപ്പിക്കേണ്ടതിനാല്‍ ദക്ഷിണേന്ത്യയുടെ സാമ്പത്തിക വളര്‍ച്ചയ്ക്ക് ഇവയുടെ നിര്‍മാണം സമയബന്ധിതമായി പൂര്‍ത്തിയാകേണ്ടതുണ്ടെന്ന് സതീശന്‍ കത്തില്‍ ചൂണ്ടിക്കാട്ടിയിരുന്നു. ദേശീയപാതാ നിര്‍മാണം അടക്കം കേരളത്തിന്റെ ആവശ്യത്തിനുള്ള 40 ശതമാനം കരിങ്കല്ലും തമിഴ്നാട്ടില്‍ നിന്നാണ് ലഭിച്ചിരുന്നത്. ഇപ്പോള്‍ വന്ന ഉത്തരവ് കേരളത്തിലെ നിര്‍മാണ മേഖലയ്ക്ക് വലിയ ആശ്വാസമാകും.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക