
വാഷിംഗ്ടൺ: ക്രിസ്തുമതത്തിനാണ് അമേരിക്കൻ സ്വത്വത്തിൽ സ്ഥാനമുള്ളതെന്നും ഹിന്ദുമതം, ഇസ്ലാം, ജൂതമതം എന്നിവ അമേരിക്കൻ സ്വത്വത്തിന്റെ ഭാഗമല്ലെന്നും പ്രഖ്യാപിച്ച് അമേരിക്കൻ പുരോഹിതൻ. ടെക്സസിൽ കഴിഞ്ഞയാഴ്ച നടന്ന തീവ്ര വലതുപക്ഷ സമ്മേളനത്തിലാണ് ജോയൽ വെബ്ബൺ എന്ന പുരോഹിതന്റെ വിവാദ പരാമർശം. വിവിധ മതങ്ങൾക്ക് അമേരിക്കൻ സ്വത്വത്തിൽ തുല്യസ്ഥാനമുണ്ടെന്ന ആശയത്തെ അദ്ദേഹം തള്ളിക്കളഞ്ഞു.
നവംബർ 12 മുതൽ 14 വരെ ഡാളസിനു സമീപമുള്ള ഇർവിങ് കൺവെൻഷൻ സെന്ററിൽ നടന്ന 'ക്രൈസ്റ്റ് ഈസ് കിങ്: അമേരിക്ക ആഫ്റ്റർ ട്രംപ്' എന്ന സമ്മേളനത്തിൽ നൂറുകണക്കിന് ആളുകൾ പങ്കെടുത്തതായി റിപ്പോർട്ടുകൾ പറയുന്നു. സമ്മേളനത്തിന് സാമ്പത്തിക പിന്തുണ നൽകുന്ന മാധ്യമസ്ഥാപനത്തിന്റെ നടത്തിപ്പുകാരൻ കൂടിയാണ് വെബ്ബൺ.
'സമത്വത്തിന്റെ കാലം കഴിഞ്ഞു. ക്രിസ്തുമതമാണ് അമേരിക്കൻ മതം. ഇസ്ലാമും ഹിന്ദുമതവും ജൂതമതവും അങ്ങനെയല്ല' എന്നായിരുന്നു അദ്ദേഹത്തിന്റെ പ്രസ്താവന. പരാമർശത്തിന് സദസ്സിൽ നിന്ന് കൈയടിയും ലഭിച്ചു. ക്രിസ്തുമതത്തിന് പ്രാമുഖ്യം നൽകുക, കുടിയേറ്റക്കാരെ കൂട്ടത്തോടെ നാടുകടത്തുക, വെള്ളക്കാരുടെ ഭൂരിപക്ഷം നിലനിർത്തുക തുടങ്ങിയ ആശയങ്ങൾ സമ്മേളനത്തിൽ ഉയർന്നുവന്നതായി സിഎൻഎൻ റിപ്പോർട്ട് ചെയ്തു. ജൂതവിരുദ്ധ പരാമർശങ്ങളും സ്ത്രീകളുടെ വോട്ടവകാശം റദ്ദാക്കുന്നതിനെക്കുറിച്ചുള്ള ചർച്ചകളും സമ്മേളനത്തിലുണ്ടായിരുന്നുവെന്ന് റിപ്പോർട്ടുകളിലുണ്ട്.
സമ്മേളനത്തിന്റെ സമാപന പ്രസംഗം നടത്തിയ വൈറ്റ് ദേശീയവാദിയായ നിക്ക് ഫ്യൂന്റസ്, ഇന്ത്യൻ വംശജനായ റിപ്പബ്ലിക്കൻ നേതാവ് വിവേക് രാമസ്വാമിയെയും വൈസ് പ്രസിഡന്റ് ജെ.ഡി. വാൻസിനെയും വിമർശിച്ചു. ഇരുവരുടെയും 'എല്ലാവരെയും ഉൾക്കൊള്ളുന്ന ജനകീയ രാഷ്ട്രീയ സന്ദേശ'ത്തോടായിരുന്നു അദ്ദേഹത്തിന്റെ എതിർപ്പ്. അമേരിക്കയുടെ അടിത്തറ ധാർമിക ഏകദൈവവിശ്വാസമാണെന്ന ടേണിങ് പോയിന്റ് യുഎസ്എയുടെ നിലപാടിനെയും അദ്ദേഹം ചോദ്യം ചെയ്തു. ക്രിസ്തീയ സ്വത്വത്തിന് മാത്രമായിരിക്കണം രാജ്യത്ത് പ്രാധാന്യമെന്ന നിലപാടാണ് ഫ്യൂന്റസ് മുന്നോട്ടുവെച്ചത്.
സമ്മേളനത്തിലെ വംശീയ പരാമർശങ്ങൾ യാഥാസ്ഥിതിക ക്രൈസ്തവ വൃത്തങ്ങളിൽനിന്നുപോലും വിമർശനം ക്ഷണിച്ചുവരുത്തി. ട്രംപ് അനുകൂലിയായ എഴുത്തുകാരൻ എറിക് മെറ്റാക്സാസ്, അമേരിക്ക വെള്ളക്കാരുടെ രാജ്യമായിരിക്കണമെന്ന വാദത്തെ ക്രിസ്തുമതവുമായി ബന്ധിപ്പിക്കുന്നതിനെ എതിർത്തു. വംശത്തിന്റെ അടിസ്ഥാനത്തിൽ മനുഷ്യരെ വേർതിരിക്കുന്ന ചിന്താഗതിയെ ബൈബിൾ അപലപിക്കുന്നുവെന്നും അത്തരം നിലപാടുകൾ ക്രിസ്തീയതയ്ക്ക് വിരുദ്ധമാണെന്നും അദ്ദേഹം എക്സിൽ കുറിച്ചു.
അതിനിടെ, ഇന്ത്യൻ വംശജയായ അമേരിക്കൻ അഭിഭാഷകയും മുൻ ജസ്റ്റിസ് ഡിപ്പാർട്ട്മെന്റ് സിവിൽ റൈറ്റ്സ് ഡിവിഷൻ മേധാവിയുമായ ഹർമീത് ധില്ലണിന്റെ പേരും സമ്മേളനത്തിൽ പരാമർശിക്കപ്പെട്ടു. ഇതിനെ പരിഹസിച്ചുകൊണ്ട് ധില്ലൺ സമൂഹമാധ്യമത്തിൽ പ്രതികരിച്ചു. ഫ്യൂന്റസിന്റെ അനുയായികളെ വിശേഷിപ്പിക്കാൻ ഉപയോഗിക്കുന്ന 'ഗ്രോയ്പേഴ്സ്' എന്ന പേരും അവർ പരാമർശിച്ചു.
ടെക്സസ് റിപ്പബ്ലിക്കൻ നേതാവ് ബോ ഫ്രഞ്ചുമായുള്ള മറ്റൊരു തർക്കത്തിലും ധില്ലൺ അമേരിക്കൻ സ്വത്വത്തെക്കുറിച്ചുള്ള നിലപാട് വ്യക്തമാക്കി. തന്റെ കുടുംബത്തിന് അമേരിക്കയിൽ 400 വർഷത്തെ പാരമ്പര്യമുണ്ടെന്ന് ചൂണ്ടിക്കാട്ടിയ ഫ്രഞ്ച്, രാജ്യത്തിന്റെ സംസ്കാരം പങ്കിടാത്ത പുറത്തുനിന്നുള്ളവരുടെ അഭിപ്രായങ്ങൾ കേൾക്കേണ്ട ബാധ്യത തനിക്കില്ലെന്ന നിലപാടാണ് സ്വീകരിച്ചത്. വംശപരമ്പരയുടെ പേരിൽ ആർക്കും അമേരിക്കയിൽ കൂടുതൽ അവകാശവാദമുന്നയിക്കാനാവില്ലെന്ന് ധില്ലൺ തിരിച്ചടിച്ചു.
താൻ സ്വാഭാവിക പൗരത്വം നേടിയ അമേരിക്കൻ പൗരയാണെന്നും രാജ്യത്ത് മറ്റുള്ളവർക്കുള്ള അതേ അവകാശം തനിക്കുമുണ്ടെന്നും അവർ വ്യക്തമാക്കി. താൻ ധില്ലണിനെ ഉദ്ദേശിച്ചല്ല പരാമർശം നടത്തിയതെന്ന് ഫ്രഞ്ച് പിന്നീട് പ്രതികരിച്ചു.
2028ലെ തിരഞ്ഞെടുപ്പിന് മുന്നോടിയായി ഓൺലൈൻ പ്രവർത്തനങ്ങൾക്കപ്പുറം നേരിട്ടുള്ള രാഷ്ട്രീയ സംഘടനാ പ്രവർത്തനങ്ങളിലേക്ക് കടക്കാൻ ഫ്യൂന്റസ് അനുയായികളോട് ആഹ്വാനം ചെയ്തതായും സിഎൻഎൻ റിപ്പോർട്ട് ചെയ്തു. ഫോൺ പ്രചാരണം, വീടുകൾ കയറിയുള്ള പ്രചാരണം, അയോവ കോക്കസിൽ പങ്കാളിത്തം എന്നിവയെക്കുറിച്ചും അദ്ദേഹം സംസാരിച്ചു.
നേരത്തേ പ്രസിഡന്റ് ഡൊണാൾഡ് ട്രംപിനെ പിന്തുണച്ചിരുന്ന പലരും ഇപ്പോൾ അദ്ദേഹത്തോട് അതൃപ്തിയുള്ളവരായി മാറിയിട്ടുണ്ടെന്നും സമ്മേളനത്തിൽ പങ്കെടുത്തവരിൽ ഇത്തരക്കാരുണ്ടായിരുന്നുവെന്നും റിപ്പോർട്ടിൽ പറയുന്നു. ഇറാനുമായുള്ള യുദ്ധത്തോടുള്ള എതിർപ്പും അവരുടെ അതൃപ്തിക്ക് കാരണമാണ്.
അതേസമയം, സമ്മേളനത്തിൽ ഉയർന്നുവന്ന ആശയങ്ങൾ അമേരിക്കൻ സമൂഹത്തിൽ എത്രത്തോളം വ്യാപകമായി പിന്തുണയ്ക്കപ്പെടുന്നുവെന്ന് റിപ്പോർട്ടുകൾ വ്യക്തമാക്കുന്നില്ല.