
വാഷിംഗ്ടൺ: ജന്മനാടിന്റെ ഓർമകളും പാരമ്പര്യത്തിന്റെ ആത്മാവും ചേർത്തുപിടിച്ച് അമേരിക്കയിലും കാനഡയിലും ഛഠ് പൂജ ആഘോഷമാക്കി ഇന്ത്യൻ പ്രവാസി സമൂഹം. ഹൂസ്റ്റണിലെ ക്ഷേത്രക്കുളം മുതൽ കാലിഫോർണിയയിലെ തടാകങ്ങളും വാഷിംഗ്ടണിലെ പോട്ടോമാക് നദീതീരവും വരെ വിവിധയിടങ്ങളിൽ നൂറുകണക്കിന് കുടുംബങ്ങളാണ് സൂര്യദേവന് പ്രാർഥനകൾ അർപ്പിക്കാൻ ഒത്തുചേരുന്നത്.
ബിഹാർ, ജാർഖണ്ഡ് സംസ്ഥാനങ്ങളിൽ ഏറെ പ്രാധാന്യമുള്ള ഛഠ് പൂജയുടെ ആചാരങ്ങളും അനുഷ്ഠാനങ്ങളും വിദേശത്തും വരുംതലമുറയ്ക്ക് പരിചയപ്പെടുത്തുകയെന്ന ലക്ഷ്യത്തോടെയാണ് വിവിധ പ്രവാസി സംഘടനകൾ ആഘോഷങ്ങൾ സംഘടിപ്പിക്കുന്നത്. വ്രതാനുഷ്ഠാനങ്ങൾക്കൊപ്പം കുടുംബാംഗങ്ങളുടെയും കുട്ടികളുടെയും സന്നദ്ധപ്രവർത്തകരുടെയും പങ്കാളിത്തം ആഘോഷങ്ങൾക്ക് കൂട്ടായ്മയുടെ മുഖം നൽകുന്നു.
ഹൂസ്റ്റണിനടുത്തുള്ള റോസൻബർഗിലെ ജഗന്നാഥ ഹിന്ദു ക്ഷേത്രത്തിലെ കുളമാണ് ആഘോഷങ്ങളുടെ പ്രധാന കേന്ദ്രങ്ങളിലൊന്ന്. കുടുംബങ്ങളും സംഭാവന നൽകുന്നവരും സന്നദ്ധപ്രവർത്തകരും കൈകോർത്താണ് പരിപാടികൾ സംഘടിപ്പിക്കുന്നത്. ആഘോഷത്തിനെത്തുന്ന കുടുംബങ്ങൾക്കായി ആറ് ശാസ്ത്രജ്ഞർ ഭക്ഷണം പാകം ചെയ്യുന്നതിനും വിതരണം ചെയ്യുന്നതിനും സാമ്പത്തിക സഹായം നൽകുന്നതായും സംഘാടകർ അറിയിച്ചു. പാർക്കിങ്, വേദിയൊരുക്കൽ, ശുചീകരണം, അതിഥികളെ സ്വീകരിക്കൽ തുടങ്ങിയ പ്രവർത്തനങ്ങളിലും സന്നദ്ധപ്രവർത്തകർ പങ്കാളികളാകുന്നു. ഛഠ് ആഘോഷിക്കുന്ന എല്ലാ കുടുംബങ്ങൾക്കും പരിപാടിയിൽ പങ്കെടുക്കാമെന്ന് സംഘാടകർ വ്യക്തമാക്കിയിട്ടുണ്ട്.
വാഷിംഗ്ടൺ മേഖലയിൽ വിർജീനിയയിലെ പോട്ടോമാക് നദീതീരത്ത് കഴിഞ്ഞ രണ്ട് പതിറ്റാണ്ടായി ഛഠ് പൂജ ആഘോഷിച്ചുവരുന്നു. 2006ൽ കൃപാശങ്കർ സിങ്ങും ഭാര്യ അനിത സിങ്ങും ചേർന്ന് വിദേശത്ത് ഉത്സവം ആചരിക്കാൻ അനുയോജ്യമായ ഇടം അന്വേഷിച്ചതോടെയാണ് ഈ കൂട്ടായ്മയ്ക്ക് തുടക്കമായത്.
'വിദേശമണ്ണിൽ നമ്മുടെ സംസ്കാരം നിലനിർത്താനുള്ള ശ്രമമാണിത്. ഒരു കുടുംബത്തിന്റെ ആഘോഷമായി തുടങ്ങിയ പരിപാടി ഇന്ന് സമീപപ്രദേശങ്ങളിൽനിന്നും ദൂരസ്ഥലങ്ങളിൽനിന്നുമായി നൂറുകണക്കിന് ആളുകൾ പങ്കെടുക്കുന്ന വലിയ കൂട്ടായ്മയായി വളർന്നു,' അനിത സിങ് ഐഎഎൻഎസിനോട് പറഞ്ഞു.
ന്യൂജേഴ്സിയിൽ ബിഹാർ-ജാർഖണ്ഡ് അസോസിയേഷൻ ഓഫ് നോർത്ത് അമേരിക്കയും ആഘോഷങ്ങൾക്ക് നേതൃത്വം നൽകുന്നു. വ്രതമെടുക്കുന്നവർക്കൊപ്പം കുടുംബാംഗങ്ങളെയും സുഹൃത്തുക്കളെയും സ്വാഗതം ചെയ്യുന്ന സംഘടന, ജന്മനാട്ടിൽനിന്ന് അകലെയാണെങ്കിലും പാരമ്പര്യങ്ങൾ കൈവിടാതിരിക്കാനുള്ള ആഹ്വാനമാണ് മുന്നോട്ടുവയ്ക്കുന്നത്.
സിലിക്കൺ വാലിക്ക് സമീപമുള്ള കാലിഫോർണിയയിലെ ഫ്രീമോണ്ടിൽ ക്വാറി ലേക്സ് ഛഠിന്റെ നേതൃത്വത്തിലാണ് ആഘോഷം. പൊതുവിനോദകേന്ദ്രമായ ക്വാറി ലേക്സ് മേഖലയിൽ നടക്കുന്ന പരിപാടിയിൽ പങ്കെടുക്കാൻ മുൻകൂട്ടി രജിസ്ട്രേഷനും പാർക്കിങ് പാസും ആവശ്യമാണ്.
കാലിഫോർണിയയിലെ റാഞ്ചോ സാന്താ മാർഗരിറ്റയിലുള്ള ഓസോ ലേക്ക് സ്കൗട്ട് ക്യാമ്പിലും ബിഹാർ ജാർഖണ്ഡ് ബന്ധു അസോസിയേഷൻ ആഘോഷം സംഘടിപ്പിക്കുന്നു. കുട്ടികൾക്കും കുടുംബങ്ങൾക്കും സുഹൃത്തുക്കൾക്കും ഒരുമിച്ച് പങ്കെടുക്കാവുന്ന രീതിയിലാണ് പരിപാടികൾ ക്രമീകരിച്ചിരിക്കുന്നത്. പ്രകൃതിഭംഗി നിറഞ്ഞ തടാകക്കരയിൽ നടക്കുന്ന ആഘോഷത്തിലൂടെ അടുത്ത തലമുറയ്ക്ക് സാംസ്കാരിക പൈതൃകം കൈമാറുകയാണ് സംഘടനയുടെ ലക്ഷ്യം.
മേരിലാൻഡിലെ ഹിന്ദു ബുദ്ധ മന്ദിറിലും ജോർജിയയിലെ ഷുഗർ ഹില്ലിലുള്ള ശിവ മന്ദിറിലും ഛഠ് പൂജ ആഘോഷങ്ങൾ നടക്കുന്നു. സിയാറ്റിലിനടുത്തുള്ള ബോതലിലെ ഹിന്ദു ടെംപിള് ആൻഡ് കൾച്ചറൽ സെന്ററും കൂട്ടായ്മയായുള്ള പൂജയ്ക്കായി രജിസ്ട്രേഷൻ സ്വീകരിക്കുന്നുണ്ട്.
കാനഡയിലെ ഒന്റാറിയോയിലെ ഓക്വില്ലിലുള്ള വൈഷ്ണോദേവി ക്ഷേത്രത്തിലും ആഘോഷങ്ങളുടെ ഭാഗമായി വിപുലമായ ഭക്ഷണവിതരണമാണ് ഒരുക്കുന്നത്. ബിഹാർ ആൻഡ് ജാർഖണ്ഡ് അസോസിയേഷൻ ഓഫ് കാനഡയുടെ നേതൃത്വത്തിൽ നടക്കുന്ന മൂന്ന് ദിവസത്തെ പരിപാടിയിൽ ഭക്ഷണം, പൂജാ സാമഗ്രികൾ, പ്രസാദം എന്നിവ സൗജന്യമായി ലഭ്യമാക്കാൻ സംഭാവനകളും സ്പോൺസർഷിപ്പും സ്വീകരിക്കുന്നുണ്ട്.
ന്യൂജേഴ്സിയിൽ കുടുംബബന്ധങ്ങൾ ഊട്ടിയുറപ്പിക്കുന്നതിനും കാലിഫോർണിയയിൽ കുട്ടികളെ പാരമ്പര്യങ്ങളുമായി അടുപ്പിക്കുന്നതിനും കാനഡയിൽ കൂട്ടായ ഭക്ഷണവിതരണത്തിനും പ്രാധാന്യം നൽകുന്ന ആഘോഷങ്ങൾ പ്രവാസലോകത്തെ സാംസ്കാരിക ഐക്യത്തിന്റെ പ്രതീകമായി മാറുകയാണ്. ജന്മനാട്ടിൽനിന്ന് ആയിരക്കണക്കിന് കിലോമീറ്റർ അകലെയാണെങ്കിലും ആചാരങ്ങളും വിശ്വാസങ്ങളും പുതുതലമുറയിലേക്ക് പകർന്നുനൽകാനുള്ള പ്രവാസികളുടെ ശ്രമമാണ് ഛഠ് പൂജയിലൂടെ പ്രകടമാകുന്നത്.