വാഷിംഗ്ടൺ, ഡി.സി: എയർ ട്രാഫിക് കൺട്രോൾ  തകരാറിനെത്തുടർന്ന്, രാജ്യവ്യാപകമായി വിമാന സർവീസുകൾ നിർത്തിവെക്കാൻ (ground stop) ഫെഡറൽ ഏവിയേഷൻ അഡ്മിനിസ്ട്രേഷൻ (FAA) വെള്ളിയാഴ്ച ഉച്ചകഴിഞ്ഞ് ഉത്തരവിട്ടു. ഇത്തരമൊരു നടപടി വളരെ അപൂർവമാണ്.

ഗതാഗത സെക്രട്ടറി ഷോൺ ഡഫി, സോഷ്യൽ മീഡിയയിലൂടെ  ഇത്  സ്ഥിരീകരിച്ചു. 'എല്ലാ എയർ റൂട്ട് ട്രാഫിക് കൺട്രോൾ സെന്ററുകളെയും ബാധിക്കുന്ന ഒരു ആശയവിനിമയ തകരാറാണ്' ഇതിന് കാരണമെന്ന് അദ്ദേഹം വ്യക്തമാക്കി.

FAA സാങ്കേതിക വിദഗ്ധർ പ്രശ്നം പരിശോധിച്ചുവരികയാണ്. വിവരങ്ങൾ ലഭ്യമാകുന്ന മുറയ്ക്ക് അപ്പപ്പോൾ അറിയിക്കുന്നതാണ്, അദ്ദേഹം കൂട്ടിച്ചേർത്തു.

അസാധാരണ  സാഹചര്യങ്ങളും സുരക്ഷാ കാരണങ്ങളും  ചൂണ്ടിക്കാട്ടി, എല്ലാ വിമാനത്താവളങ്ങളിലും വിമാന സർവീസുകൾ നിർത്തിവെച്ചിരിക്കുന്നു എന്ന് ഏജൻസി അറിയിച്ചു.

അടുത്ത അറിയിപ്പ് ഉണ്ടാകുന്നതുവരെ പുറപ്പെടാനിരിക്കുന്ന എല്ലാ വിമാനങ്ങളും സർവീസ് നടത്താൻ പാടില്ല, എന്ന് ഔദ്യോഗിക അറിയിപ്പിൽ പറയുന്നു. അതേസമയം, വിദേശത്തുനിന്ന് വരുന്ന അന്താരാഷ്ട്ര വിമാനങ്ങളുടെ ലാൻഡിംഗ്   ഓരോ വിമാനത്തിന്റെയും സാഹചര്യം പരിഗണിച്ച് കൈകാര്യം ചെയ്യുമെന്നും അറിയിപ്പിൽ വ്യക്തമാക്കിയിട്ടുണ്ട്.

അറിയിപ്പ് പുറത്തുവന്നതിന് തൊട്ടുപിന്നാലെ, എയർ ട്രാഫിക് കൺട്രോൾ സംവിധാനവുമായി ബന്ധപ്പെട്ട അറിയിപ്പുകൾ പ്രസിദ്ധീകരിക്കുന്ന FAA-യുടെ വെബ്‌സൈറ്റും പ്രവർത്തനരഹിതമായതായി കാണപ്പെട്ടു. ഇതോടെ, നേരത്തെ അതിൽ ഉണ്ടായിരുന്ന നിരവധി അറിയിപ്പുകൾ അപ്രത്യക്ഷമായി.

വിമാനങ്ങളുടെ പുറപ്പെടൽ നിർത്തിവെച്ചത് ദൂരവ്യാപകമായ പ്രത്യാഘാതങ്ങൾ ഉണ്ടാക്കിയേക്കാം. കുറച്ചു സമയത്തേക്ക് മാത്രമാണെങ്കിൽ പോലും, ഈ തടസ്സം ആയിരക്കണക്കിന് വിമാനങ്ങളുടെ യാത്ര വൈകാൻ കാരണമാകും. ഇത് നീണ്ടുനിൽക്കുകയാണെങ്കിൽ, വിമാന ജീവനക്കാരുടെ ജോലി സമയപരിധി (നിയമപരമായ പരിധി) അവസാനിക്കുന്നതിനാൽ, വൈകിയ വിമാനങ്ങൾ റദ്ദാക്കേണ്ടി വരും.