വാഷിങ്ടൺ: അമേരിക്കയിലെ ഏറ്റവും വലിയ രണ്ട് നഗരങ്ങളായ ന്യൂയോർക്കും ലോസ് ആഞ്ചലസും ഇന്ത്യൻ വംശജരായ മേയർമാരുടെ നേതൃത്വത്തിലേക്ക്. ന്യൂയോർക്ക് മേയറായി സൊഹ്‌റാൻ മംദാനി ചുമതലയേറ്റതിനു പിന്നാലെ, ഡിസംബർ 14ന് നിത്യ രാമൻ ലോസ് ആഞ്ചലസ് മേയറായി ചുമതലയേൽക്കുന്നതോടെ അമേരിക്കൻ പ്രാദേശിക ഭരണരംഗത്ത് ഇന്ത്യൻ വംശജരുടെ സാന്നിധ്യം കൂടുതൽ ശക്തമാകും.

ഏകദേശം 12.5 മില്യൺ ജനങ്ങളാണ് ഈ രണ്ട് നഗരങ്ങളിലായി താമസിക്കുന്നത്. ന്യൂയോർക്കിൽ 8.6  മില്യണും ലോസ് ആഞ്ചലസിൽ 3.9  മില്യണുമാണ് ജനസംഖ്യ. ജനുവരി ഒന്നിനാണ് മംദാനി ന്യൂയോർക്ക് മേയറായി ചുമതലയേറ്റത്. അതേസമയം, നിത്യ രാമൻ നിലവിൽ മേയർ ഇലക്ടാണ്. ഡിസംബർ 14 വരെ കരൻ ബാസ് ആണ് ലോസ് ആഞ്ചലസ് മേയർ സ്ഥാനത്ത് തുടരുന്നത്.

കേരളത്തിൽ ജനിച്ച നിത്യ രാമൻ ആറാം വയസ്സിലാണ് അമേരിക്കയിലെത്തിയത്. ഉഗാണ്ടയിലെ കംപാലയിൽ ജനിച്ച സൊഹ്‌റാൻ മംദാനി ഇന്ത്യൻ വംശജനാണ്. മലയാളിയും പ്രശസ്ത ചലച്ചിത്ര സംവിധായികയുമായ  മീര നായരുടെയും അക്കാദമിക് വിദഗ്ധൻ മഹ്മൂദ് മംദാനിയുടെയും മകനാണ് അദ്ദേഹം. ഇന്ത്യൻ വംശജരെന്ന നിലയിൽ  ഇരുവരും അമേരിക്കൻ രാഷ്ട്രീയത്തിൽ ശ്രദ്ധേയമായ നേട്ടമാണ് കൈവരിച്ചിരിക്കുന്നത്.

ന്യൂയോർക്കിനും ലോസ് ആഞ്ചലസിനും പുറമെ അമേരിക്കയിലെ വിവിധ നഗരങ്ങളിലും ഇന്ത്യൻ വംശജർ മേയർ സ്ഥാനത്ത് പ്രവർത്തിക്കുന്നുണ്ട്. ഒഹായോയിലെ സിൻസിനാറ്റിയിൽ അഫ്താബ് പുരേവാൾ രണ്ടാം തവണയും മേയറായി തുടരുന്നു. 2021ൽ ആദ്യമായി തെരഞ്ഞെടുക്കപ്പെട്ട അദ്ദേഹം നഗരത്തിലെ ആദ്യ ഏഷ്യൻ അമേരിക്കൻ മേയറാണ്. 2030 ജനുവരി വരെയാണ് അദ്ദേഹത്തിന്റെ നിലവിലെ കാലാവധി.

വിർജീനിയയുടെ തലസ്ഥാനമായ റിച്ച്മണ്ടിന്റെ മേയർ ഹൈദരാബാദിൽ ജനിച്ച ഡാനി അവുലയാണ്. 1979ൽ മാതാപിതാക്കൾക്കൊപ്പം അമേരിക്കയിലെത്തിയ അദ്ദേഹം ശിശുരോഗ വിദഗ്ധനും പൊതുജനാരോഗ്യ രംഗത്തെ മുൻ ഉദ്യോഗസ്ഥനുമാണ്. 2025 ജനുവരി ഒന്നിനാണ് റിച്ച്മണ്ടിന്റെ 81-ാമത് മേയറായി ചുമതലയേറ്റത്.

കാലിഫോർണിയയിലെ ഫ്രീമോണ്ടിൽ 2024 ഡിസംബറിൽ രാജ് സാൽവൻ ആദ്യ ഇന്ത്യൻ അമേരിക്കൻ മേയറായി തെരഞ്ഞെടുക്കപ്പെട്ടു. ന്യൂജേഴ്‌സിയിലും ഇന്ത്യൻ വംശജരുടെ രാഷ്ട്രീയ സാന്നിധ്യം ശ്രദ്ധേയമാണ്. എഡിസണിൽ സമിപ് ജോഷി, പാർസിപ്പനി-ട്രോയ് ഹിൽസിൽ പുൽകിത് ദേശായി, വെസ്റ്റ് വിൻഡ്‌സറിൽ ഹേമന്ത് മറാത്തെ, മോണ്ട്ഗോമറിയിൽ നീന സിങ് എന്നിവർ മേയർ സ്ഥാനങ്ങൾ വഹിക്കുന്നു.

ഇവരിൽ പുൽകിത് ദേശായി ഇന്ത്യയിൽ ജനിച്ച് അമേരിക്കയിൽ വളർന്ന വ്യക്തിയാണ്. അമേരിക്കൻ മറീൻ കോർപ്സിലും സേവനമനുഷ്ഠിച്ചിട്ടുണ്ട്. നീന സിങ് ജനുവരിയിൽ മൂന്നാം തവണയും മോണ്ട്ഗോമറി മേയറായി ചുമതലയേറ്റു.

കണക്റ്റിക്കട്ടിലെ നോർവിച്ചിൽ സ്വർൺജിത് സിങ്, ഇല്ലിനോയിയിലെ മോളിനിൽ സംഗീത റായപതി, ടെക്സസിലെ പാരിസിൽ മിഹിർ 'മാർക്ക്' പങ്കജ്, ഡാളസ് കൗണ്ടിയിലെ സണ്ണിവെയിലിൽ സജി പി. ജോർജ് എന്നിവരും ഇന്ത്യൻ അമേരിക്കൻ മേയർമാരാണ്.

നേരത്തെ മേയർ പദവി വഹിച്ച ഇന്ത്യൻ വംശജരിലും നിരവധി പ്രമുഖരുണ്ട്. വാഷിങ്ടണിലെ ബുറിയനിൽ അരുൺ ഝവേരി, ന്യൂജേഴ്‌സിയിലെ ഫ്രാങ്ക്ലിൻ ടൗൺഷിപ്പിൽ ഉപേന്ദ്ര ചിവുകുള, അരിസോണയിലെ ഓറോ വാലിയിൽ സതീഷ് ഹിരേമത്ത് എന്നിവർ ഈ പട്ടികയിൽ ഉൾപ്പെടുന്നു.

ചെറുനഗരങ്ങളിലും ഇന്ത്യൻ വംശജരായ വനിതകൾ നേരത്തെ തന്നെ രാഷ്ട്രീയ നേട്ടങ്ങൾ കൈവരിച്ചിട്ടുണ്ട്. കേരളത്തിൽ ജനിച്ച വിനി സാമുവൽ 2015ൽ വാഷിങ്ടൺ സംസ്ഥാനത്തെ മോണ്ടെസാനോ മേയറായി തെരഞ്ഞെടുക്കപ്പെടുകയും 2023 വരെ ആ പദവിയിൽ തുടരുകയും ചെയ്തു.

അമേരിക്കൻ രാഷ്ട്രീയത്തിലും പ്രാദേശിക ഭരണരംഗത്തും ഇന്ത്യൻ വംശജരുടെ സ്വാധീനം വർധിച്ചുവരുന്നതിന്റെ വ്യക്തമായ സൂചനയാണ് ഈ നേട്ടങ്ങൾ. വൈവിധ്യമാർന്ന പശ്ചാത്തലങ്ങളിൽനിന്ന് എത്തിയ ഇന്ത്യൻ അമേരിക്കക്കാർ രാജ്യത്തെ പ്രധാന നഗരങ്ങളുടെ ഭരണനേതൃത്വത്തിലേക്ക് ഉയരുന്നത് പ്രവാസി സമൂഹത്തിനും അഭിമാനകരമായ നേട്ടമാണ്.