തിരുവനന്തപുരം: പൊതുസ്ഥലത്തെ സമരപ്പന്തലുകളുമായി ബന്ധപ്പെട്ട് നിരവധി കോടതി അലക്ഷ്യ കേസുകൾ നിലനിൽക്കുന്നതിനാലാണ് എൽപിഎസ്ടി ഉദ്യോഗാർത്ഥികളുടെ സമരപ്പന്തൽ പൊലീസ് പൊളിച്ചുമാറ്റിയതെന്ന് ആഭ്യന്തരമന്ത്രി രമേശ് ചെന്നിത്തല. സമരങ്ങളോട് സർക്കാരിന് യാതൊരു എതിർപ്പുമില്ലെന്നും, സുപ്രീംകോടതി ഉത്തരവ് പാലിക്കേണ്ടതിനാലാണ് പൊലീസ് നടപടി സ്വീകരിച്ചതെന്നും അദ്ദേഹം വ്യക്തമാക്കി. ദിവസങ്ങളായി നിരാഹാരം കിടന്നിരുന്ന വളർമതിയെ ഡോക്ടർമാരുടെ നിർദേശപ്രകാരമാണ് ആശുപത്രിയിലേക്ക് മാറ്റിയത്. ഉദ്യോഗാർത്ഥികളുടെ അഞ്ചിൽ നാല് ആവശ്യങ്ങളും സർക്കാർ അംഗീകരിച്ചതാണെന്നും, പ്രായോഗികമല്ലാത്തതിനാൽ അഞ്ചാമത്തെ ആവശ്യം നടപ്പാക്കാനാകില്ലെന്നും ചൂണ്ടിക്കാട്ടിയ മന്ത്രി, സമരക്കാർ സമരം അവസാനിപ്പിച്ച് സർക്കാരുമായി സഹകരിക്കണമെന്ന് അഭ്യർത്ഥിച്ചു.

​മന്ത്രിസഭയ്ക്കുള്ളിലോ പാർട്ടിയിലോ യുഡിഎഫിലോ യാതൊരുവിധ അഭിപ്രായവ്യത്യാസങ്ങളുമില്ലെന്ന് രമേശ് ചെന്നിത്തല പറഞ്ഞു. മുഖ്യമന്ത്രിയും കെപിസിസി പ്രസിഡന്റ് സണ്ണി ജോസഫും താനും മണിക്കൂറുകളോളം ഒരുമിച്ച് ചർച്ച നടത്തിയിരുന്നു. ചില വിഷയങ്ങളിൽ വ്യത്യസ്ത അഭിപ്രായങ്ങൾ ഉയരുന്നത് സ്വാഭാവികമാണെങ്കിലും, അവയെല്ലാം പരിഹരിച്ച് ഒറ്റക്കെട്ടായി മുന്നോട്ടുപോകാനുള്ള ഇച്ഛാശക്തി കോൺഗ്രസിനും യുഡിഎഫിനുമുണ്ടെന്നും, ജനങ്ങൾ അർപ്പിച്ച വിശ്വാസം സർക്കാർ കാത്തുസൂക്ഷിക്കുമെന്നും അദ്ദേഹം വ്യക്തമാക്കി.

​അതേസമയം, യുഡിഎഫ് സഖ്യകക്ഷി നേതാവായ രാജേന്ദ്രൻ വെണ്ണപ്പാലത്തിന്റെ അറസ്റ്റിൽ നിയമം നിയമത്തിന്റെ വഴിക്ക് പോകുമെന്ന് മന്ത്രി പ്രതികരിച്ചു. ആരാണെങ്കിലും പൊലീസിന് നിയമപരമായി മാത്രമേ പ്രവർത്തിക്കാൻ കഴിയൂ. ഇദ്ദേഹം കഴിഞ്ഞ കുറച്ചുകാലങ്ങളായി യുഡിഎഫ് യോഗങ്ങളിലൊന്നും പങ്കെടുക്കാറില്ലെന്നും രമേശ് ചെന്നിത്തല കൂട്ടിച്ചേർത്തു.