ഗഡഗ് (കർണാടക): അതിരുകളില്ലാത്ത മതസൗഹാർദത്തിന്റെ മനോഹര മാതൃക തീർക്കുകയാണ് കർണാടകയിലെ ഗഡഗ് ജില്ലയിലുള്ള ഒരു മുസ്ലിം കുടുംബം. ജക്കളി ഗ്രാമവാസിയായ ഖുത്ബുദ്ദീൻ ഗഡദും കുടുംബവുമാണ് കഴിഞ്ഞ മൂന്നര പതിറ്റാണ്ടായി മുടങ്ങാതെ ദീപാവലി നാളിൽ ലക്ഷ്മീദേവിയെ പൂജിച്ച് നാടിന്റെ സ്നേഹാദരങ്ങൾ ഏറ്റുവാങ്ങുന്നത്. ഗ്രാമത്തിലെ ബസ് സ്റ്റാൻഡിന് സമീപം സൈക്കിൾ റിപ്പയറിങ് കട നടത്തുന്ന ഖുത്ബുദ്ദീൻ, ഉത്സവത്തിന് ദിവസങ്ങൾക്ക് മുൻപുതന്നെ കട വൃത്തിയാക്കി ദീപാലങ്കാരങ്ങളോടെ ദേവിയുടെ വിഗ്രഹം പ്രതിഷ്ഠിച്ചാണ് ആരാധന നടത്തുന്നത്.

​ഹിന്ദു പുരോഹിതന്മാരുടെ നേതൃത്വത്തിൽ പരമ്പരാഗത ആചാരവിധികളോടെയും മന്ത്രോച്ചാരണങ്ങളോടെയുമാണ് ഇവിടെ പൂജകൾ നടക്കുന്നത്. ഖുത്ബുദ്ദീനും കുടുംബാംഗങ്ങളും ഭക്തിപൂർവം ആരതിയിലും പ്രാർഥനകളിലും സജീവമായി പങ്കുചേരും. മതഭേദമന്യേ നാട്ടുകാരാണ് തന്റെ ഉപജീവനത്തിന് തുണയാകുന്നതെന്നും, അതിനാൽ എല്ലാ മതങ്ങളെയും ആദരിക്കണമെന്നാണ് തന്റെ വിശ്വാസമെന്നും അദ്ദേഹം പറയുന്നു. പൂജയ്ക്ക് ശേഷം 'കടുബു' ഉൾപ്പെടെയുള്ള പരമ്പരാഗത ദീപാവലി വിഭവങ്ങൾ തയാറാക്കി അയൽവാസികൾക്കും സുഹൃത്തുക്കൾക്കും വിതരണം ചെയ്യുകയും ആഘോഷങ്ങളിൽ പങ്കാളികളാക്കുകയും ചെയ്യാറുണ്ട്.

​തുടക്കത്തിൽ പത്തുപേർ മാത്രം പങ്കെടുത്ത ലളിതമായ ചടങ്ങായിരുന്നുവെങ്കിൽ ഇന്നത് അൻപതിലധികം പേർ ഒത്തുചേരുന്ന വലിയൊരു സൗഹൃദ കൂട്ടായ്മയായി മാറിയിട്ടുണ്ട്. 'ഗാന്ധി വില്ലേജ്' എന്നറിയപ്പെടുന്ന ജക്കളിയിൽ വർഗീയ ചേരിതിരിവുകളില്ലാതെ ഗ്രാമവാസികൾ ഐക്യത്തോടെ കഴിയുന്നതിന് പിന്നിൽ ഖുത്ബുദ്ദീനെപ്പോലുള്ളവരുടെ കരുതലും വിശാലമനസ്സുമാണെന്ന് നാട്ടുകാർ സാക്ഷ്യപ്പെടുത്തുന്നു. കുടുംബത്തിന്റെ ഐശ്വര്യത്തിനൊപ്പം ഗ്രാമത്തിന്റെ മുഴുവൻ നന്മയ്ക്കുമായാണ് തങ്ങൾ പ്രാർഥിക്കുന്നതെന്ന് ഈ കുടുംബം അഭിമാനത്തോടെ വ്യക്തമാക്കുന്നു.