ജെറുസലേം: ഇസ്രയേൽ രാഷ്ട്രീയത്തിൽ നിർണായക മാറ്റത്തിന് വഴിയൊരുക്കി മുൻ പ്രതിരോധ മേധാവിയും യഷാർ പാർട്ടി നേതാവുമായ ഗാദി ഐസൻകോട്ടിന് സർക്കാർ രൂപീകരണത്തിനായി 67 പാർലമെന്റ് അംഗങ്ങളുടെ പിന്തുണ. 120 അംഗങ്ങളുള്ള നെസറ്റിൽ കേവല ഭൂരിപക്ഷത്തിന് ആവശ്യമായ 61 പേരുടെ പിന്തുണ മറികടന്നതോടെ പ്രധാനമന്ത്രി ബെഞ്ചമിൻ നെതന്യാഹുവിന്റെ രാഷ്ട്രീയ നീക്കങ്ങൾക്ക് തിരിച്ചടിയായി.

പ്രസിഡന്റ് ഐസക് ഹെർസോഗുമായി നടത്തിയ കൂടിയാലോചനകളിലാണ് വിവിധ പാർട്ടികൾ തങ്ങളുടെ നിലപാട് വ്യക്തമാക്കിയത്. നെതന്യാഹുവിനെ പിന്തുണയ്ക്കുന്നവരുടെ എണ്ണം 46 ആയി കുറഞ്ഞു. നെതന്യാഹുവിന്റെ പരമ്പരാഗത സഖ്യകക്ഷിയായ തീവ്ര ഓർത്തഡോക്സ് പാർട്ടി യുണൈറ്റഡ് തോറ ജൂഡായിസം (UTJ) ആരെയും പിന്തുണയ്ക്കാതെ വിട്ടുനിന്നതാണ് ഇതിന് പ്രധാന കാരണം.

ഐസൻകോട്ടിന് ലഭിച്ച 67 അംഗങ്ങളുടെ പിന്തുണയിൽ ജൂത പ്രതിപക്ഷ പാർട്ടികളുടെ 48 അംഗങ്ങളും അറബ് പാർട്ടിയായ റആമിന്റെ എട്ട് അംഗങ്ങളും ജോയിന്റ് ലിസ്റ്റിന്റെ 11 അംഗങ്ങളും ഉൾപ്പെടുന്നു. നെതന്യാഹുവിന് ലഭിച്ച 46 പിന്തുണകളിൽനിന്ന് യുണൈറ്റഡ് തോറ ജൂഡായിസത്തിന്റെ ഏഴ് അംഗങ്ങൾ വിട്ടുനിന്നു.

യേശിവ വിദ്യാർഥികൾക്ക് നിർബന്ധിത സൈനിക സേവനത്തിൽനിന്ന് ഇളവ് നൽകുന്ന നിയമം കൊണ്ടുവരുന്നതിൽ നെതന്യാഹു പരാജയപ്പെട്ടതിലുള്ള അതൃപ്തിയാണ് യുണൈറ്റഡ് തോറ ജൂഡായിസത്തിന്റെ നിലപാടിന് പിന്നിലെന്ന് റിപ്പോർട്ടുകൾ പറയുന്നു. ആത്മീയ നേതാക്കളുടെ നിർദേശത്തെത്തുടർന്നാണ് പാർട്ടിയുടെ ഡെഗൽ ഹതോറ, അഗുദത് യിസ്രായേൽ വിഭാഗങ്ങൾ പിന്തുണ പ്രഖ്യാപിക്കേണ്ടെന്ന് തീരുമാനിച്ചത്. ഭാവിയിലെ സർക്കാരിനുള്ള പിന്തുണയും സൈനിക സേവന ഇളവ് ഉറപ്പാക്കുന്നതിനെ ആശ്രയിച്ചിരിക്കുമെന്ന് പാർട്ടി വ്യക്തമാക്കി.

നെതന്യാഹുവിനെ അധികാരത്തിൽനിന്ന് മാറ്റണമെന്ന പൊതുജനാഭിപ്രായം കണക്കിലെടുത്താണ് ഐസൻകോട്ടിന് പിന്തുണ നൽകിയതെന്ന് ജോയിന്റ് ലിസ്റ്റ് അറിയിച്ചു. എന്നാൽ ഐസൻകോട്ടിന്റെ നേതൃത്വത്തിലുള്ള സഖ്യസർക്കാരിൽ ഔദ്യോഗികമായി ചേരില്ലെന്നും പുറത്തുനിന്ന് പിന്തുണ നൽകുന്ന കാര്യം പരിഗണിക്കാമെന്നും അവർ വ്യക്തമാക്കി. ഐസൻകോട്ടിന്റെ നയങ്ങളുമായി തങ്ങൾക്ക് അഭിപ്രായവ്യത്യാസങ്ങളുണ്ടെന്നും പാർട്ടി ചൂണ്ടിക്കാട്ടി.

അതേസമയം, ഐസൻകോട്ടിന് 67 അംഗങ്ങളുടെ ശുപാർശ ലഭിച്ചത് സർക്കാർ രൂപീകരണം ഉറപ്പാക്കിയെന്നർഥമില്ല. പിന്തുണ പ്രഖ്യാപിച്ച എല്ലാ പാർട്ടികളും മന്ത്രിസഭയിൽ പങ്കാളികളാകണമെന്നില്ല. അതിനാൽ ഭൂരിപക്ഷ പിന്തുണയുള്ള സ്ഥിരതയുള്ള സർക്കാർ രൂപീകരിക്കുക അദ്ദേഹത്തിന് വെല്ലുവിളിയാകും.

അതിനിടെ, ഐസൻകോട്ടിനോട് നെതന്യാഹുവുമായി ചേർന്ന് അധികാരം പങ്കിടുന്ന ഐക്യസർക്കാർ രൂപീകരിക്കാൻ ഷാസ് പാർട്ടിയുടെ മുതിർന്ന ആത്മീയ നേതാവ് റബ്ബി മോശെ മായ ആവശ്യപ്പെട്ടു. തീവ്ര ഇടതുപക്ഷ നിലപാടുകളുള്ളവരുമായി സഖ്യമുണ്ടാക്കുന്നതിനുപകരം നെതന്യാഹുവുമായി പ്രധാനമന്ത്രി പദം പങ്കിടുന്നതാണ് ഉചിതമെന്നാണ് അദ്ദേഹത്തിന്റെ അഭിപ്രായം.

ലിക്കുഡ്, യഷാർ പാർട്ടികൾക്ക് 48 സീറ്റുകളും ഷാസ്, യുണൈറ്റഡ് തോറ ജൂഡായിസം, റിലീജിയസ് സയണിസം പാർട്ടികൾക്ക് കൂടി 19 സീറ്റുകളും ചേർന്നാൽ ഐക്യസർക്കാരിന് ഭൂരിപക്ഷത്തിലേക്ക് എത്താനാകുമെന്നാണ് മായയുടെ വാദം.

കഴിഞ്ഞ തിരഞ്ഞെടുപ്പിൽ ഷാസ് പാർട്ടിയുടെ അംഗബലം 11ൽനിന്ന് ആറായി കുറഞ്ഞിരുന്നു. 1992നുശേഷമുള്ള പാർട്ടിയുടെ ഏറ്റവും മോശം തിരഞ്ഞെടുപ്പ് പ്രകടനമാണിത്. മറുവശത്ത്, പുതിയ നെസറ്റിന്റെ ആദ്യ സമ്മേളനം നവംബർ 10ന് ചേരാനിരിക്കെ സ്പീക്കർ അമീർ ഒഹാനയെ മാറ്റാനുള്ള നീക്കവും പ്രതിപക്ഷ പാർട്ടികൾ ആരംഭിച്ചിട്ടുണ്ട്.

ഒക്ടോബർ 27ന് നടന്ന തിരഞ്ഞെടുപ്പിനുശേഷം ഇസ്രയേലിൽ സർക്കാർ രൂപീകരണത്തിനായുള്ള രാഷ്ട്രീയ ചർച്ചകൾ നിർണായക ഘട്ടത്തിലെത്തിയിരിക്കുകയാണ്. ഐസൻകോട്ടിനെ സർക്കാർ രൂപീകരിക്കാൻ ഔദ്യോഗികമായി ക്ഷണിക്കുമോ എന്നതിലാണ് ഇനി രാഷ്ട്രീയ ശ്രദ്ധ.