മിഷിഗൺ: യു.എസ് സെനറ്റിലേക്ക് തിരഞ്ഞെടുക്കപ്പെടുന്ന ആദ്യ മുസ്ലിം അംഗമെന്ന ചരിത്രനേട്ടം സ്വന്തമാക്കി ഡെമോക്രാറ്റിക് പാർട്ടി സ്ഥാനാർഥി ഡോ. അബ്ദുൽ സയീദ്. അമേരിക്കൻ ഇടക്കാല തെരഞ്ഞെടുപ്പിൽ മിഷിഗണിൽ റിപ്പബ്ലിക്കൻ സ്ഥാനാർഥിയായ മൈക്ക് റോജേഴ്‌സിനെ അട്ടിമറിച്ചാണ് 42-കാരനായ സയീദ് ഐതിഹാസിക വിജയം കുറിച്ചത്. സ്ഥാനമൊഴിഞ്ഞ സെനറ്റർ ഗാരി പീറ്റേഴ്‌സിന് പകരക്കാരനായി സഭയിലെത്തുന്ന സയീദ് 2027 ജനുവരി മൂന്നിന് ഔദ്യോഗികമായി ചുമതലയേൽക്കും. ഈ വിജയം യു.എസ് സെനറ്റിൽ ഡെമോക്രാറ്റിക് പാർട്ടിക്ക് നിർണായകമായ മേൽക്കൈ സമ്മാനിച്ചതിനൊപ്പം അമേരിക്കൻ രാഷ്ട്രീയ ചരിത്രത്തിലെ വലിയൊരു വഴിത്തിരിവായും വിലയിരുത്തപ്പെടുന്നു.

​പ്രശസ്തനായ ഡോക്ടറും പൊതുജനാരോഗ്യ വിദഗ്ധനുമായ അബ്ദുൽ സയീദ് മുൻപ് വെയ്ൻ കൗണ്ടി ഹെൽത്ത് ഡയറക്ടറായി സേവനമനുഷ്ഠിച്ചിട്ടുണ്ട്. തൊഴിലാളി കുടുംബങ്ങളുടെ ജീവിതച്ചെലവ് കുറയ്ക്കുക, രാഷ്ട്രീയത്തിലെ കോർപ്പറേറ്റ് സ്വാധീനം അവസാനിപ്പിക്കുക, എല്ലാവർക്കും താങ്ങാനാവുന്ന ആരോഗ്യപരിരക്ഷ ഉറപ്പാക്കുക തുടങ്ങിയ വാഗ്ദാനങ്ങൾ മുൻനിർത്തി നടത്തിയ പ്രചാരണമാണ് അദ്ദേഹത്തിന് ജനപിന്തുണ നേടിക്കൊടുത്തത്. എതിരാളികൾ ഉയർത്തിയ കടുത്ത ആരോപണങ്ങളെയും വ്യാജപ്രചാരണങ്ങളെയും അതിജീവിച്ചാണ് വിജയം. തെരഞ്ഞെടുപ്പ് ഫലം വന്നതിനു പിന്നാലെ രാജ്യത്തെ സാധാരണക്കാർക്ക് മെച്ചപ്പെട്ട സൗജന്യ ചികിത്സ ലഭ്യമാക്കാൻ മുൻഗണന നൽകുമെന്ന് ഡെട്രോയിറ്റിൽ നടത്തിയ പ്രസംഗത്തിൽ അദ്ദേഹം വ്യക്തമാക്കി.

​ഈജിപ്തിൽനിന്നും യു.എസിലേക്ക് കുടിയേറിയ പച്ചക്കറി വ്യാപാരിയുടെ കുടുംബത്തിലെ മൂന്നാം തലമുറക്കാരനായ സയീദിന് ഇന്ത്യയുമായും കർണാടകയുമായും ആഴത്തിലുള്ള കുടുംബബന്ധമുണ്ട്. സയീദിന്റെ ഭാര്യയായ ഡോ. സാറാ ജുക്കാക്കു, മുൻ മൈസൂർ സംസ്ഥാന മന്ത്രിയും ഭട്കൽ എം.എൽ.എയുമായിരുന്ന ജുക്കാക്കു ഷംസുദ്ദീന്റെ കൊച്ചുമകളാണ്. 1950-കളിൽ മൈസൂർ സർക്കാരിൽ ഡെപ്യൂട്ടി ധനകാര്യ മന്ത്രിയായിരുന്ന ഷംസുദ്ദീന്റെ മകനും സാറയുടെ പിതാവുമായ ജുക്കാക്കു ത്വയ്യിബ് 1976-ൽ ബാംഗ്ലൂർ മെഡിക്കൽ കോളേജിൽനിന്ന് എം.ബി.ബി.എസ് ബിരുദം നേടിയ ശേഷമാണ് അമേരിക്കയിലേക്ക് കുടിയേറിയത്.