വാഷിംഗ്ടണ്‍ : ഭരണകൂടത്തിനെതിരെയുള്ള ജനങ്ങളുടെ വ്യക്തമായ ജനവിധിയാണെന്ന് മുന്‍ വൈസ് പ്രസിഡന്റ് കമല ഹാരിസ്.'തിരഞ്ഞെടുപ്പ് ദിനത്തില്‍ അമേരിക്കന്‍ ജനത ഉറക്കെയും വ്യക്തമായും തങ്ങളുടെ നിലപാട് വ്യക്തമാക്കിയിരിക്കുന്നു: വൈറ്റ് ഹൗസില്‍ നിന്നുള്ള അഴിമതിയും അപ്രാപ്തിയും ക്രൂരതയും, റിപ്പബ്ലിക്കന്‍ നേതാക്കളുടെ കീഴടങ്ങലും കണ്ട് അവര്‍ മടുത്തിരിക്കുന്നു,' ബുധനാഴ്ച രാവിലെ പുറപ്പെടുവിച്ച പ്രസ്താവനയില്‍ കമല ഹാരിസ് വ്യക്തമാക്കി.

വിവിധ സംസ്ഥാനങ്ങളിലെ പ്രചാരണങ്ങളില്‍ പങ്കെടുത്ത കാര്യം ഓര്‍മ്മിപ്പിച്ചുകൊണ്ട്, 'വേദനകളെ ലക്ഷ്യബോധമുള്ളതും കോപത്തെ പ്രവര്‍ത്തനവുമാക്കി മാറ്റാനുള്ള ജനങ്ങളുടെ നിശ്ചയദാര്‍ഢ്യം ഞാന്‍ നേരിട്ട് കണ്ടു' എന്ന് അവര്‍ കൂട്ടിച്ചേര്‍ത്തു.ഗവര്‍ണര്‍ പദവികളിലും സംസ്ഥാന നിയമസഭകളിലും യു.എസ് കോണ്‍ഗ്രസിന്റെ ഇരു സഭകളിലും ഭൂരിപക്ഷം നേടിയ സാഹചര്യത്തില്‍, ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിക്കുന്നതില്‍ പാര്‍ട്ടി ശ്രദ്ധ കേന്ദ്രീകരിക്കണമെന്ന് ഹാരിസ് ആവശ്യപ്പെട്ടു.

സാധാരണക്കാരായ കുടുംബങ്ങള്‍ക്ക് സാമ്പത്തിക ആശ്വാസം നല്‍കാനും ഭരണകൂടത്തിന്റെ അഴിമതിക്കെതിരെ ശക്തമായി നിലകൊള്ളാനും ജനങ്ങള്‍ ആവശ്യപ്പെടുന്നുവെന്ന് അവര്‍ പറഞ്ഞു.കോണ്‍ഗ്രസിന്റെ ഇരുസഭകളിലും ഭൂരിപക്ഷം നേടിയതോടെ പ്രസിഡന്റ് ഡൊണാള്‍ഡ് ട്രംപിന്റെ നയങ്ങളെ തടയാനും അന്വേഷണങ്ങള്‍ ശക്തമാക്കാനും ഡെമോക്രാറ്റുകള്‍ക്ക് വഴിതുറന്നു.സെനറ്റ്, ഹൗസ് ഓഫ് റപ്രസന്റേറ്റീവ്‌സ് എന്നിവയുടെ നിയന്ത്രണം തിരികെ പിടിച്ച ഡെമോക്രാറ്റിക് നേതാക്കള്‍, സമന്‍സുകളും ഹിയറിംഗുകളും വഴി ട്രംപ് ഭരണകൂടത്തെ പ്രതിരോധത്തിലാക്കുമെന്ന് പ്രഖ്യാപിച്ചു.

ജീവനോപാധികളുടെ ചെലവ് കുറയ്ക്കുന്നതിനാണ്  പ്രഥമ പരിഗണനയെന്ന് നിയുക്ത സെനറ്റ് ഭൂരിപക്ഷ നേതാവ് ചാക്ക് ഷൂമറും ഹൗസ് ഡെമോക്രാറ്റിക് നേതാവ് ഹകീം ജെഫ്രിയും വ്യക്തമാക്കി.'ജനങ്ങളുടെ താല്പര്യങ്ങള്‍ക്കോ നിയമത്തിനോ എതിരായി ട്രംപ് പ്രവര്‍ത്തിക്കുമ്പോഴെല്ലാം ഞങ്ങള്‍ അന്വേഷണങ്ങള്‍ ആരംഭിക്കുകയും കോടതിയില്‍ നേരിടുകയും ചെയ്യും,' എന്ന് ചാക്ക് ഷൂമര്‍ പറഞ്ഞു.

പ്രതിനിധി സഭയില്‍ ഭൂരിപക്ഷം നേടിയതോടെ ട്രംപ് കുടുംബത്തിന്റെ ബിസിനസ് ഇടപാടുകള്‍, ഭരണകൂടത്തിലെ അഴിമതികള്‍, ഫെഡറല്‍ ഇമിഗ്രേഷന്‍ ഏജന്റുമാരുടെ വീഴ്ചകള്‍ എന്നിവ അന്വേഷിക്കാന്‍ ഡെമോക്രാറ്റുകള്‍ പദ്ധതിയിടുന്നു. ഹൗസ് ഓവര്‍സൈറ്റ് കമ്മിറ്റി തലവനാകാന്‍ സാധ്യതയുള്ള റോബര്‍ട്ട് ഗാര്‍സിയ 'അഭിഭാഷകരെ സജ്ജരാക്കിക്കോളൂ'എന്ന് എക്‌സില്‍ (X) കുറിച്ചത് ഇതിന്റെ സൂചനയായി ചൂണ്ടിക്കാണിക്കപ്പെടുന്നു.   സെനറ്റിലെ ഭൂരിപക്ഷം ട്രംപിന്റെ ജുഡീഷ്യല്‍ നിയമനങ്ങളെയും സുപ്രീം കോടതി നിയമനങ്ങളെയും തടയാന്‍ ഡെമോക്രാറ്റുകള്‍ക്ക് കരുത്തുപകരും. എന്നാല്‍ പ്രസിഡന്റിന്റെ വീറ്റോ മറികടക്കാന്‍ ആവശ്യമായ മൂന്നില്‍ രണ്ട് (2/3) ഭൂരിപക്ഷം അവര്‍ക്കില്ല.