ചൊവ്വാഴ്ച രാത്രിയുണ്ടായ 'നീല സുനാമി'യിൽ   ജനപ്രതിനിധി സഭയുടെയും (House of Representatives) സെനറ്റിന്റെയും നിയന്ത്രണം ഡെമോക്രാറ്റുകൾക്ക്.  റിപ്പബ്ലിക്കൻ പാർട്ടിക്ക് സുരക്ഷിതമെന്ന് കരുതിയിരുന്ന പല സീറ്റുകളും അവർ പിടിച്ചെടുത്തു.

എല്ലാ ഫലങ്ങളും വരും മുമ്പത്തെ  കണക്കു പ്രകാരം സെനറ്റിൽ ഡമോക്രാറ്റുകൾക്ക്  54 സീറ്റായി.  റിപ്പബ്ലിക്കന് 44. ഹൌസിൽ 228-139 എന്നതാണ് ഇപ്പോഴത്തെ നില.  28 ഡമോക്രാറ്റിക്  ഗവർണർമാർ ആയപ്പോൾ റിപ്പബ്ലിക്കൻ പാർട്ടിക്ക് 20 പേർ.  

അയോവ, കാൻസാസ്, മെയ്ൻ, നോർത്ത് കരോലിന, ഒഹായോ, സൗത്ത് കരോലിന, ടെക്സാസ് എന്നിവിടങ്ങളിൽ സെനറ്റ് സീറ്റുകൾ ഡെമോക്രാറ്റുകൾ പിടിച്ചെടുത്തത് ചരിത്രപരമായ തിരിച്ചടിയായി. ജനപ്രതിനിധി സഭയിലെ ഫലങ്ങളും ഞെട്ടിക്കുന്നതായിരുന്നു. ഇതോടെ, ന്യൂയോർക്ക് സ്വദേശികളായ ചക്ക് ഷുമറും ഹക്കീം ജെഫ്രീസും യഥാക്രമം സെനറ്റിലും ജനപ്രതിനിധി സഭയിലും നേതൃസ്ഥാനങ്ങളിലേക്ക് എത്തി.

അമേരിക്ക തിരിച്ചുവന്നിരിക്കുന്നു, ജെഫ്രിസ് പറഞ്ഞു. എല്ലാ പ്രതിസന്ധികളെയും അതിജീവിച്ചാണ് ഡെമോക്രാറ്റുകൾ വിജയിച്ചതെന്നും, ജനങ്ങൾക്ക് ആശ്വാസം ലഭിക്കാൻ പോകുകയാണെന്നും ഷുമർ കൂട്ടിച്ചേർത്തു.

പ്രസിഡന്റ് ട്രംപിന് കനത്ത തിരിച്ചടിയാണ് ലഭിച്ചത്. അസോസിയേറ്റഡ് പ്രസ് (AP) നടത്തിയ എക്സിറ്റ് പോൾ പ്രകാരം, 62% വോട്ടർമാരും വിലക്കയറ്റത്തിന് ട്രംപിന്റെ നയങ്ങളാണ് കാരണമെന്ന് കരുതുന്നു. 71% പേർ അഭിപ്രായപ്പെട്ടത്, പ്രസിഡന്റിനെ നിയന്ത്രിക്കാൻ കോൺഗ്രസ് കൂടുതൽ ഇടപെടലുകൾ നടത്തണമെന്നാണ്.

തിരഞ്ഞെടുപ്പിന് ശേഷം ഫോക്സ് ന്യൂസിനോട് സംസാരിക്കവെ, 'ഡെമോക്രാറ്റുകൾ മികച്ച പ്രകടനമാണ് കാഴ്ചവെച്ചത്, അവർ ശക്തമായി പോരാടി,' എന്ന് ട്രംപ് പറഞ്ഞു.   ഇരു പാർട്ടികളുമായും സഹകരിച്ച് പ്രവർത്തിക്കുമെന്ന് അദ്ദേഹം ഉറപ്പുനൽകി.

ഇറാൻ യുദ്ധത്തേക്കാൾ  അത്  ഊർജ്ജ വിലയിലുണ്ടാക്കിയ ആഘാതമാണ് തിരിച്ചടിക്ക് കാരണമെന്ന് ട്രംപ്  പറഞ്ഞു.  'ഇറാൻ വിഷയത്തിൽ ഞാൻ സ്വീകരിച്ച നടപടികളോട് ജനങ്ങൾക്ക് യോജിപ്പുണ്ട്. എന്നാൽ, ഇന്ധനവില വർദ്ധനവ് പോലുള്ള ഹ്രസ്വകാല പ്രത്യാഘാതങ്ങൾ സഹിക്കാൻ അവർ തയ്യാറായിരുന്നില്ലെന്ന് തോന്നുന്നു. അത് എനിക്ക് മനസ്സിലാക്കാൻ കഴിയുന്നുണ്ട്, പക്ഷേ ഞാൻ അതിനോട് യോജിക്കുന്നില്ല,' ട്രംപ് പറഞ്ഞു.

തന്റെ ഭരണകൂടത്തിൽ നിന്ന്  ആരെയും പുറത്താക്കില്ലെന്നും ട്രംപ് വ്യക്തമാക്കി. 'ഇതിന് എന്റെ ക്യാബിനറ്റുമായി   യാതൊരു ബന്ധവുമില്ല,' അദ്ദേഹം കൂട്ടിച്ചേർത്തു.

ഈ തിരഞ്ഞെടുപ്പ് ഫലം ട്രംപിനെ  വിവിധ അന്വേഷണങ്ങളിൽ കുടുക്കും. അദ്ദേഹത്തിന്റെ നിയമനിർമ്മാണ അജണ്ടകൾ തടസ്സപ്പെടാനും, പുതിയ ക്യാബിനറ്റ് സെക്രട്ടറിമാരെയും ജഡ്ജിമാരെയും  നിയമിക്കുന്നത് അതീവ ദുഷ്കരമാകാനും  കാരണമാകും.

ഊർജ്ജ വില വർദ്ധനവ്, പണപ്പെരുപ്പം, ഉയർന്ന പലിശ നിരക്കുകൾ എന്നിവയ്ക്ക് കാരണമായ ഇറാൻ യുദ്ധമാണ് തിരിച്ചടിക്ക് കാരണമെന്ന് പ്രസിഡന്റിന്റെ പല അനുയായികളും ചൂണ്ടിക്കാട്ടി.  സ്ഥാനാർത്ഥികളുടെ  യോഗ്യതക്കുറവാണ് (candidate quality) പരാജയത്തിന് കാരണമെന്ന് വൈറ്റ് ഹൗസ് വിലയിരുത്തി.

2006-ന് ശേഷം, അധികാരത്തിലില്ലാത്ത ഒരു പാർട്ടി ഇരുസഭകളിലും വിജയം തിരിച്ചുപിടിക്കുന്ന ആദ്യത്തെ ഇടക്കാല തിരഞ്ഞെടുപ്പാണിത്.

റിപ്പബ്ലിക്കൻ സ്വാധീനം ശക്തമായ ടെക്സാസിലും കാൻസാസിലും സെനറ്റ് സീറ്റുകൾ പിടിച്ചെടുക്കാനും, ഒഹായോയിലും ടെക്സാസിലും റിപ്പബ്ലിക്കൻ ഗവർണർ ഭരണത്തിന് അന്ത്യം കുറിക്കാനും ഡമോക്രാറ്റുകൾക്ക്  സാധിച്ചു. ഇതിൽ ടെക്സാസിൽ മൂന്നാം തവണയും ഗവർണറായിരുന്ന ഗ്രെഗ് ആബട്ടിന്റെ പരാജയം,  ഞെട്ടിച്ചു
.
'ഞാൻ ബാലറ്റിൽ ഉണ്ടായിരുന്നില്ല; ഒരുപക്ഷേ ഉണ്ടായിരുന്നെങ്കിൽ, ഞങ്ങൾ വൻ ഭൂരിപക്ഷത്തോടെ വിജയിക്കുമായിരുന്നു!' ട്രംപ്  കുറിച്ചു.  

സൗത്ത് കരോലിനയിൽ സെനറ്റിലേക്ക് മത്സരിച്ച ഡാർലിൻ ഗ്രഹാം (പരേതനായ സെനറ്റർ ലിൻഡ്‌സി ഗ്രാഹാമിന്റെ സഹോദരി), ടെക്സാസിൽ നിന്ന് സെനറ്റിലേക്ക് മത്സരിച്ച, നിലവിൽ സംസ്ഥാന അറ്റോർണി ജനറലായ കെൻ പാക്സ്റ്റൺ എന്നിവർ  ട്രംപ് തെരെഞ്ഞെടുത്ത സ്ഥാനാര്ഥികളാണ്.

ആവശ്യമെങ്കിൽ താൻ ഒരു "മിസ്റ്റർ വീറ്റോ" (Mr. Veto - വീറ്റോ അധികാരം ഉപയോഗിക്കുന്നയാൾ) ആയി മാറാൻ തയ്യാറാണെന്ന് ട്രംപ് പറഞ്ഞിരുന്നു. 'ഒന്നോ രണ്ടോ മാസം തുടർച്ചയായി വീറ്റോ ചെയ്യുമ്പോൾ, അവർ സമയം പാഴാക്കുകയാണെന്ന് തിരിച്ചറിയും. ഒടുവിൽ അവർ ചർച്ചയ്ക്ക് വരും, അപ്പോൾ നിങ്ങൾക്ക് ഒരു ധാരണയിലെത്താം. അങ്ങനെ സംഭവിക്കാൻ സാധ്യതയുണ്ട്, എന്നാൽ അങ്ങനെയൊരു സാഹചര്യം വരില്ലെന്ന് പ്രതീക്ഷിക്കാം.'

ട്രംപിന്റെ കുടുംബവുമായി ബന്ധപ്പെട്ട അഴിമതി ആരോപണങ്ങളെക്കുറിച്ചും, അവർക്ക് അനുകൂലമായി നടന്ന ബിസിനസ് ഇടപാടുകളെക്കുറിച്ചും അന്വേഷണങ്ങൾ വരാനിരിക്കുന്ന സാഹചര്യമുണ്ട് . ഇതിനെ നേരിടാൻ ട്രംപിന്റെ അടുത്ത വൃത്തങ്ങൾ ഇപ്പോൾ തന്നെ അഭിഭാഷകരെ ഒരുക്കുന്ന തിരക്കിലാണ്. 

കഴിഞ്ഞ 90 വർഷത്തിനിടയിൽ, അധികാരത്തിലിരിക്കുന്ന ഒരു പ്രസിഡന്റിന്  ഇടക്കാല തെരെഞ്ഞെടുപ്പിൽ തന്റെ പാർട്ടിക്കു  സീറ്റുകൾ നേടാനോ നിലനിർത്താനോ സാധിച്ചത് വെറും രണ്ടു തവണ മാത്രമാണ്.