വാഷിംഗ്ടണ്‍: എബോള വൈറസ് വ്യാപനത്തിന്റെ പശ്ചാത്തലത്തില്‍, വിദേശരാജ്യങ്ങളില്‍നിന്ന് വിമാനമാര്‍ഗം അമേരിക്കയിലേക്ക് യാത്ര ചെയ്യുന്ന എല്ലാവര്‍ക്കും പുതിയ ആരോഗ്യ പ്രഖ്യാപനം (Health Attestation) നിര്‍ബന്ധമാക്കി അമേരിക്കന്‍ സെന്റേഴ്‌സ് ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ (CDC).

2026 നവംബര്‍ 3 രാത്രി 11:59 (EST) മുതല്‍ ഈ നിബന്ധന പ്രാബല്യത്തില്‍ വരും. അമേരിക്കന്‍ പൗരന്മാര്‍, ഗ്രീന്‍ കാര്‍ഡ് ഉടമകള്‍, വിദേശ പൗരന്മാര്‍ എന്നിവര്‍ക്കെല്ലാം ഇത് ബാധകമാണ്. അമേരിക്ക വഴി കണക്ഷന്‍ വിമാനത്തില്‍ യാത്ര ചെയ്യുന്നവരും ഇതില്‍ ഉള്‍പ്പെടും.

യാത്രയ്ക്ക് മുമ്പുള്ള 21 ദിവസത്തിനുള്ളില്‍ ഡെമോക്രാറ്റിക് റിപ്പബ്ലിക് ഓഫ് കോംഗോയില്‍ (DRC) സന്ദര്‍ശിച്ചിട്ടില്ലെന്ന് ഓരോ യാത്രക്കാരനും പ്രഖ്യാപനത്തില്‍ സാക്ഷ്യപ്പെടുത്തണം. വിമാനമാറ്റത്തിനായി മാത്രം DRC-യില്‍ ഇറങ്ങിയാലും അത് സന്ദര്‍ശനമായി കണക്കാക്കും. കഴിഞ്ഞ 21 ദിവസത്തിനുള്ളില്‍ DRC-യില്‍ ഉണ്ടായിരുന്നവര്‍ക്ക് അമേരിക്കയിലേക്കുള്ള വിമാനത്തില്‍ കയറാന്‍ അനുമതിയില്ല. DRC വിട്ട് 22-ാം ദിവസം മുതല്‍ മറ്റ് യാത്രാ നിബന്ധനകള്‍ പാലിക്കുന്ന പക്ഷം യാത്ര ചെയ്യാം.

പ്രഖ്യാപനം പേപ്പര്‍ രൂപത്തിലോ ഇലക്ട്രോണിക് രൂപത്തിലോ വിമാനക്കമ്പനികള്‍ക്ക് സമര്‍പ്പിക്കാം. 18 വയസ്സിന് താഴെയുള്ള കുട്ടികള്‍ക്കുവേണ്ടി മാതാപിതാക്കള്‍ക്ക് പ്രഖ്യാപനം നല്‍കാം. പ്രഖ്യാപനം സമര്‍പ്പിക്കാത്തവര്‍ക്ക് ബോര്‍ഡിംഗ് നിഷേധിക്കാം. അറിഞ്ഞുകൊണ്ട് തെറ്റായ വിവരങ്ങള്‍ നല്‍കുന്നവര്‍ക്ക് പിഴയും തടവും ഉള്‍പ്പെടെയുള്ള നിയമനടപടികളും നേരിടേണ്ടിവരും.

യാത്രക്കാര്‍ പുറപ്പെടുന്നതിന് മുമ്പ് ബന്ധപ്പെട്ട വിമാനക്കമ്പനിയുമായി ബന്ധപ്പെട്ട് ഏറ്റവും പുതിയ നിര്‍ദേശങ്ങള്‍ ഉറപ്പാക്കണം.

CDC ഔദ്യോഗിക പ്രഖ്യാപന ഫോം (PDF):
https://www.cdc.gov/port-health/media/pdfs/2026/10/367886-A_FRM_EbolaAttestation_3_pass.pdf

CDC ഔദ്യോഗിക ഉത്തരവ്:
https://www.cdc.gov/port-health/legal-authorities/attestation-order.html