അമേരിക്കൻ ഇടക്കാല തിരഞ്ഞെടുപ്പിന്റെ ആദ്യ ഫലസൂചനകൾ ബുധനാഴ്ച രാവിലെ ഇന്ത്യയിൽ ലഭിച്ചുതുടങ്ങുമെന്ന് പ്രതീക്ഷ. ചൊവ്വാഴ്ച അർധരാത്രിക്ക് മുമ്പ് തന്നെ വ്യക്തമായ മുന്നേറ്റം രേഖപ്പെടുത്തുന്ന മണ്ഡലങ്ങളിലെ ഫലങ്ങൾ പുറത്തുവരാനാണ് സാധ്യത. ഇന്ത്യൻ സമയം ബുധനാഴ്ച രാവിലെ 10.30ഓടെയായിരിക്കും ആദ്യ സൂചനകൾ ലഭിക്കുക.

സെനറ്റിലെ ശ്രദ്ധേയമായ 11 മത്സരങ്ങളിൽ ഒൻപതിടങ്ങളിലെ ഫലങ്ങൾ ബുധനാഴ്ച ഉച്ചയോടെ അറിയാനാകുമെന്നാണ് പ്രതീക്ഷ. എന്നാൽ, ഇതുകൊണ്ട് മാത്രം സെനറ്റിൽ ഏത് പാർട്ടിക്കാണ് ഭൂരിപക്ഷമെന്ന് പ്രഖ്യാപിക്കാനാകണമെന്നില്ല.

അലാസ്കയിലും മെയിനിലും റാങ്ക്ഡ് ചോയ്സ് വോട്ടിങ് സംവിധാനമാണ് നിലവിലുള്ളത്. ആദ്യ വോട്ടെണ്ണലിൽ ഒരു സ്ഥാനാർഥിക്ക് 50 ശതമാനം വോട്ട് ലഭിച്ചില്ലെങ്കിൽ വോട്ടർമാർ രേഖപ്പെടുത്തിയ രണ്ടാമത്തെ മുൻഗണനകൾ കൂടി കണക്കിലെടുത്ത് വീണ്ടും വോട്ടെണ്ണൽ നടത്തും. ഇതു ഫലപ്രഖ്യാപനം വൈകിപ്പിക്കാം.

പ്രത്യേകിച്ച് അലാസ്കയിലെ മത്സരങ്ങളിൽ റിപ്പബ്ലിക്കൻ പാർട്ടി മുന്നോട്ടുവച്ചേക്കാവുന്ന നിയമപരമായ വെല്ലുവിളികൾ ഫലപ്രഖ്യാപനം നീളാൻ ഇടയാക്കുമെന്നും റിപ്പോർട്ടുകൾ സൂചിപ്പിക്കുന്നു.

2022ലെയും 2024ലെയും തിരഞ്ഞെടുപ്പുകളിൽ ജനപ്രതിനിധിസഭയിലെ ഭൂരിപക്ഷം നിർണയിക്കാൻ എട്ട് ദിവസം വേണ്ടിവന്നിരുന്നു. 2022ൽ സെനറ്റിലെ നിയന്ത്രണം വ്യക്തമാകാൻ നാലു ദിവസവും എടുത്തു. 2024ൽ കാലിഫോർണിയയിലെ ഒരു ജനപ്രതിനിധിസഭാ മണ്ഡലത്തിൽ വെറും 187 വോട്ടിന്റെ വ്യത്യാസമായതിനാൽ ഫലം പ്രഖ്യാപിക്കാൻ 29 ദിവസം വേണ്ടിവന്നു.

തിരഞ്ഞെടുപ്പ് ഫലങ്ങൾ അംഗീകരിക്കുമോ എന്നതും ശ്രദ്ധാകേന്ദ്രമാണ്. 2020ലെ പ്രസിഡന്റ് തിരഞ്ഞെടുപ്പിൽ തോറ്റത് അംഗീകരിക്കാതെ തിരഞ്ഞെടുപ്പ് ‘മോഷ്ടിക്കപ്പെട്ടതാണെന്ന്’ ട്രംപ് ഇപ്പോഴും അവകാശപ്പെടുന്നുണ്ട്.

അലാസ്കയിലെ സെനറ്റ് തിരഞ്ഞെടുപ്പിനെ മുൻകൂട്ടി ചോദ്യം ചെയ്യാനുള്ള നീക്കം ട്രംപ് ഭരണകൂടത്തിന്റെ നീതിന്യായ വകുപ്പ് നടത്തിയെങ്കിലും കോടതി അത് തള്ളിയിരുന്നു. കാലിഫോർണിയയിൽ ഏകദേശം 20,000 മുൻകൂർ വോട്ടുകൾ വേർതിരിക്കണമെന്ന് ആവശ്യപ്പെട്ട് വകുപ്പ് കോടതിയെ സമീപിച്ചെങ്കിലും കീഴ്ക്കോടതിയിലും അപ്പീൽ കോടതിയിലും സുപ്രീം കോടതിയിലും പരാജയപ്പെട്ടു.

തിരഞ്ഞെടുപ്പ് ഫലങ്ങൾ വാഷിങ്ടണിലെ അധികാരസന്തുലനത്തെ നിർണയിക്കുന്നതിനാൽ രാജ്യത്തുടനീളം ഫലപ്രഖ്യാപനവും അതിനോടനുബന്ധിച്ച നിയമനടപടികളും നിരീക്ഷിക്കപ്പെടുകയാണ്.