കൊച്ചി: മലയാളി പ്രേക്ഷകരുടെ പ്രിയഗായികയും അവതാരകയുമായ റിമി ടോമി വീണ്ടും വിവാഹിതയാകുന്നു. തന്റെ ഔദ്യോഗിക യൂട്യൂബ് ചാനലിലൂടെ പങ്കുവെച്ച പ്രത്യേക വീഡിയോയിലാണ് ജീവിതത്തിൽ പുതിയൊരു തുടക്കത്തിന് ഒരുങ്ങുകയാണെന്ന സന്തോഷവാർത്ത റിമി ആരാധകരുമായി പങ്കുവെച്ചത്. തന്നെ സ്നേഹിക്കുന്നവർ വർഷങ്ങളായി നിരന്തരം ചോദിച്ചുകൊണ്ടിരുന്ന ചോദ്യത്തിനാണ് ഒടുവിൽ വിരാമമിടുന്നതെന്നും, ഈ വർഷം തന്റെ ജീവിതത്തിലേക്ക് ഒരാൾ കടന്നുവന്നുവെന്നും താരം വെളിപ്പെടുത്തി. വിവാഹം ഉടൻ തന്നെയുണ്ടാകുമെന്നും എന്നാൽ വരൻ ആരാണെന്ന കാര്യം പിന്നീട് കൃത്യമായി തുറന്നുപറയാമെന്നും താരം വ്യക്തമാക്കിയിട്ടുണ്ട്.

​തന്റെ പങ്കാളി നടനോ ഗായകനോ പ്രശസ്തനായ വ്യക്തിയോ വൻ കോടീശ്വരനോ ഒന്നുമല്ലെന്ന് റിമി വീഡിയോയിൽ പ്രത്യേകം അടിവരയിട്ടു പറഞ്ഞു. ജീവിതത്തിൽ പണമോ പ്രശസ്തിയോ അല്ല, മറിച്ച് മനസ്സമാധാനവും പരസ്പര ധാരണയുമാണ് വലുതെന്ന് താൻ തിരിച്ചറിഞ്ഞു. തന്റെ സന്തോഷങ്ങളും സങ്കടങ്ങളും ദേഷ്യവും വാശിയുമടക്കം എല്ലാ നല്ല വശങ്ങളെയും മോശം വശങ്ങളെയും ഒരുപോലെ മനസ്സിലാക്കി കൂടെ നിൽക്കാൻ സാധിക്കുന്ന ഒരാളാണ് അദ്ദേഹം. ഒരുമിച്ചു മുന്നോട്ടുപോയാൽ സമാധാനവും വളർച്ചയും നിറഞ്ഞ നല്ലൊരു ജീവിതം ലഭിക്കുമെന്ന ശക്തമായ ബോധ്യം വന്നപ്പോഴാണ് ഇത്തരമൊരു സുപ്രധാന തീരുമാനത്തിലേക്ക് എത്തിയതെന്നും റിമി പറഞ്ഞു.

​കുടുംബവും സഹോദരങ്ങളും മക്കളും എപ്പോഴും തനിക്ക് വലിയ പിന്തുണയാണ് നൽകുന്നതെന്നും എന്നാൽ ഒരു ജീവിതപങ്കാളി സൃഷ്ടിക്കുന്ന വിടവ് മറ്റൊന്നിനും നികത്താനാകില്ലെന്നും താരം മനസ്സുതുറന്നു. മുൻപ് താൻ രണ്ടാമത് വിവാഹം കഴിക്കുന്നതിനെക്കുറിച്ച് സോഷ്യൽ മീഡിയയിലും വേദികളിലും ഉയർന്നിരുന്ന ചർച്ചകൾക്ക് ഒടുവിലാണ് താരം തന്നെ നേരിട്ട് വ്യക്തത വരുത്തിയിരിക്കുന്നത്. എയർപോർട്ടിൽ വെച്ച് പ്രധാന രേഖകൾ അടങ്ങിയ ബാഗ് നഷ്ടപ്പെട്ടതിന്റെ മാനസിക വിഷമത്തിനിടയിലും ഈ സന്തോഷവാർത്ത പങ്കുവെക്കാൻ കാരണമായത് ആരാധകരുടെ സ്നേഹമാണെന്ന് വ്യക്തമാക്കിയ റിമി, തുടർജീവിതത്തിൽ എല്ലാവരുടെയും പ്രാർത്ഥനയും അനുഗ്രഹവും പിന്തുണയും അഭ്യർത്ഥിച്ചു.