കോഴിക്കോട്: എസ്‌കെഎസ്എസ്എഫിന്റെ ചരിത്രത്തിലാദ്യമായി പാണക്കാട് കുടുംബത്തിൽ നിന്നുള്ള നേതാവില്ലാതെ പുതിയ സംസ്ഥാന കമ്മിറ്റി പ്രഖ്യാപിച്ചതോടെ സമസ്തയിലെ വിഭാഗീയത വീണ്ടും മറനീക്കി പുറത്തുവന്നു. സംഘടനയുടെ ദീർഘകാല പാരമ്പര്യം തിരുത്തിക്കുറിച്ച നീക്കത്തിലൂടെ സമസ്തയിലെ ലീഗ് വിരുദ്ധ വിഭാഗം നേതൃത്വത്തിൽ ആധിപത്യം ഉറപ്പിച്ചതായാണ് വിലയിരുത്തൽ. സയ്യിദ് ഫഖ്റുദ്ദീൻ ഹസനി തങ്ങൾ പ്രസിഡന്റായും ഒ.പി.എം. അഷ്റഫ് ജനറൽ സെക്രട്ടറിയായും തിരഞ്ഞെടുക്കപ്പെട്ടപ്പോൾ, പാണക്കാട് സയ്യിദ് ഹാഷിർ അലി ശിഹാബ് തങ്ങളെ ട്രഷറർ സ്ഥാനത്തേക്ക് മാത്രമായി ഒതുക്കി. പാണക്കാട് കുടുംബത്തെ അധ്യക്ഷപദവിയിൽ നിന്ന് ഒഴിവാക്കിയതിനെതിരെ സമസ്തയിലെ ലീഗ് അനുകൂല വിഭാഗത്തിൽ നിന്ന് ശക്തമായ പ്രതിഷേധമാണ് ഉയരുന്നത്.

​തീരുമാനം നിർഭാഗ്യകരമാണെന്നും പാണക്കാട് കുടുംബത്തിന് അർഹമായ പ്രസിഡന്റ് പദവി നൽകാൻ സമസ്ത നേതൃത്വം ഇടപെട്ട് തിരുത്തൽ വരുത്തണമെന്നും പ്രമുഖ ലീഗ് അനുകൂല നേതാവ് നാസർ ഫൈസി കൂടത്തായി ആവശ്യപ്പെട്ടു. മുൻപ് സ്ഥാനമൊഴിയാൻ താല്പര്യം പ്രകടിപ്പിച്ചപ്പോഴും പാണക്കാട് തങ്ങൾമാരെ തന്നെ പ്രസിഡന്റായി തുടരാൻ നിർബന്ധിച്ചിരുന്ന കീഴ്‌വഴക്കമാണ് ഇത്തവണ അട്ടിമറിക്കപ്പെട്ടതെന്നും അണികൾക്കിടയിൽ കടുത്ത അതൃപ്തിയുണ്ടെന്നും അദ്ദേഹം ചൂണ്ടിക്കാട്ടി. സംഘടന കമ്മ്യൂണിസ്റ്റുകൾക്ക് വഴിപ്പെടുകയാണെന്ന രൂക്ഷവിമർശനവുമായി ലീഗ് അനുകൂല സാമൂഹികമാധ്യമ കൂട്ടായ്മകളും രംഗത്തെത്തിയിട്ടുണ്ട്. വരാനിരിക്കുന്ന മഹല്ല് കമ്മിറ്റി തെരഞ്ഞെടുപ്പുകളിൽ ഇതിന്റെ പ്രതിഫലനമുണ്ടാകുമെന്ന മുന്നറിയിപ്പും ഉയരുന്നുണ്ട്.

​എന്നാൽ, പാണക്കാട് കുടുംബത്തിന്റെ പൂർണ്ണ പിന്തുണയോടെയും സമ്മതത്തോടെയുമാണ് പുതിയ സമിതിയെ പ്രഖ്യാപിച്ചതെന്ന് ജനറൽ സെക്രട്ടറി ഒ.പി.എം. അഷ്റഫ് വ്യക്തമാക്കി. സ്ഥാനമൊഴിയാൻ സയ്യിദ് ഹമീദലി ശിഹാബ് തങ്ങൾ സ്വമേധയാ തീരുമാനിക്കുകയായിരുന്നുവെന്നും അദ്ദേഹം തന്നെയാണ് പുതിയ ഭാരവാഹികളെ പ്രഖ്യാപിച്ചതെന്നും നേതൃത്വം വിശദീകരിക്കുന്നു. അതേസമയം, അംഗത്വ ക്യാമ്പയിനും കൗൺസിൽ തെരഞ്ഞെടുപ്പും തുടങ്ങിയതുമുതൽ എസ്‌കെഎസ്എസ്എഫിന്റെ നിയന്ത്രണം പിടിച്ചെടുക്കാൻ ലീഗ് അനുകൂല-വിരുദ്ധ ചേരികൾ തമ്മിൽ നിലനിന്നിരുന്ന തർക്കം പരസ്യസംഘർഷത്തിലേക്ക് നീങ്ങിയിരുന്നു. കൗൺസിലുകളിൽ നിന്ന് ലീഗ് അനുകൂലികളെ ആസൂത്രിതമായി ഒഴിവാക്കിയെന്ന് ആരോപിച്ച് കോഴിക്കോട്, സുൽത്താൻ ബത്തേരി, കണ്ണൂർ എന്നിവിടങ്ങളിൽ കഴിഞ്ഞ ദിവസങ്ങളിലും സംഘർഷം റിപ്പോർട്ട് ചെയ്തിരുന്നു.