വാഷിങ്ടൺ: നവംബർ മൂന്നിന് നടക്കുന്ന അമേരിക്കൻ ഇടക്കാല തെരഞ്ഞെടുപ്പിന് അഞ്ച് ദിവസം മാത്രം ശേഷിക്കെ മുൻ പ്രസിഡന്റ് ബരാക് ഒബാമയും നിലവിലെ പ്രസിഡന്റ് ഡോണൾഡ് ട്രംപും പരസ്പരം വിമർശനങ്ങളുമായി രംഗത്ത്. ജോർജിയയിലും ഒഹായോയിലും നടന്ന പ്രചാരണ റാലികളിൽ ഇറാൻ യുദ്ധം, വിലക്കയറ്റം, വ്യാപാരനയം, വൈറ്റ് ഹൗസിലെ നവീകരണ പ്രവർത്തനങ്ങൾ തുടങ്ങിയ വിഷയങ്ങളിൽ ഇരുനേതാക്കളും ഏറ്റുമുട്ടി. ഒഹായോ ഗവർണർ സ്ഥാനത്തേക്ക് മത്സരിക്കുന്ന ഇന്ത്യൻ വംശജനായ വിവേക് രാമസ്വാമിക്ക് ട്രംപ് പിന്തുണ പ്രഖ്യാപിക്കുകയും ചെയ്തു.

ജോർജിയയിലെ അറ്റ്ലാന്റ മേഖലയിൽ ഡെമോക്രാറ്റിക് സെനറ്റർ ജോൺ ഒസോഫിനും ഗവർണർ സ്ഥാനാർഥി കെയ്ഷ ലാൻസ് ബോട്ടംസിനും വേണ്ടി പ്രചാരണം നടത്തിയ ഒബാമ, ഇറാൻ യുദ്ധത്തിന്റെ പേരിൽ ട്രംപ് ഭരണകൂടത്തെ രൂക്ഷമായി വിമർശിച്ചു.

യുദ്ധം എണ്ണയുടെയും ഡീസലിന്റെയും വില വർധനയ്ക്കും പൊതുവായ വിലക്കയറ്റത്തിനും കാരണമാകുന്നുവെന്നും അദ്ദേഹം ആരോപിച്ചു.

യുദ്ധം അവസാനിച്ചുവെന്ന ഭരണകൂടത്തിന്റെ മുൻ പ്രഖ്യാപനങ്ങൾക്കും വാഗ്ദാനങ്ങൾക്കും വിരുദ്ധമായി സംഘർഷം ഇപ്പോഴും തുടരുകയാണെന്നും അതിനാൽ ജനങ്ങൾക്ക് ഉടൻ സാമ്പത്തിക ആശ്വാസം ലഭിക്കില്ലെന്നും ഒബാമ പറഞ്ഞു.

ട്രംപിന്റെ വ്യാപാരനയത്തെയും ഒബാമ പരിഹസിച്ചു. അമേരിക്കയുടെ വടക്കൻ അയൽരാജ്യമായ കാനഡയെ ശത്രുവായി ചിത്രീകരിക്കുന്ന ട്രംപിന്റെ നിലപാടിനെ വിമർശിച്ച അദ്ദേഹം, കാനഡയുമായുള്ള വ്യാപാരയുദ്ധം അനാവശ്യമാണെന്ന് ചൂണ്ടിക്കാട്ടി.

മേപ്പിൾ സിറപ്പും ഹാസ്യനടൻ മാർട്ടിൻ ഷോർട്ടിനെയും നൽകിയ കാനഡയെ അമേരിക്കയുടെ ചരിത്രപരമായ ശത്രുവായി കാണുന്നതിനെ ഒബാമ പരിഹസിച്ചു.

വൈറ്റ് ഹൗസിലെ നവീകരണ പ്രവർത്തനങ്ങളെക്കുറിച്ചുള്ള ട്രംപിന്റെ നടപടികളെയും അദ്ദേഹം വിമർശിച്ചു. 

ജോർജിയയിലെ വോട്ടർമാരോട് വെള്ളിയാഴ്ചയ്ക്കുള്ളിൽ നേരത്തേ വോട്ട് രേഖപ്പെടുത്തണമെന്നും അദ്ദേഹം അഭ്യർഥിച്ചു.

ഒബാമ ജോർജിയയിൽ പ്രചാരണം നടത്തുന്നതിനിടെ ഒഹായോയിലെ റാലിയിൽ ട്രംപ് പങ്കെടുത്തു. സെനറ്റർ ജോൺ ഹസ്റ്റഡിനും ഗവർണർ സ്ഥാനാർഥി വിവേക് രാമസ്വാമിക്കും വേണ്ടി നടത്തിയ പ്രസംഗത്തിൽ ഒബാമയുടെ വിമർശനങ്ങൾക്ക് ട്രംപ് മറുപടി നൽകി.

വൈറ്റ് ഹൗസിലെ നവീകരണ പ്രവർത്തനങ്ങളെക്കുറിച്ചുള്ള വിമർശനത്തിന് മറുപടിയായി, അതിന്റെ ചെലവ് താൻ തന്നെയാണ് വഹിച്ചതെന്നും നവീകരണത്തിലൂടെ കെട്ടിടം കൂടുതൽ മനോഹരവും മികച്ച നിലയിലുമായെന്നും ട്രംപ് പറഞ്ഞു.

ഒബാമയ്ക്ക് ശുചിത്വത്തെക്കുറിച്ചും തകർന്നതും പൊട്ടിയതുമായ കല്ലുകളെയും നടപ്പാതകളെയും കുറിച്ചും ധാരണയില്ലെന്ന് ട്രംപ് പരിഹസിച്ചു.

ഒബാമയുടെ മുൻ തെരഞ്ഞെടുപ്പ് പ്രചാരണങ്ങളെയും ട്രംപ് വിമർശിച്ചു. ഹിലരി ക്ലിന്റണിനും കമല ഹാരിസിനും വേണ്ടി ഒബാമ പ്രചാരണം നടത്തിയെങ്കിലും ഇരുവരും പരാജയപ്പെട്ടുവെന്ന് അദ്ദേഹം പറഞ്ഞു.

2015ലെ ഇറാൻ ആണവകരാറിനെയും ട്രംപ് വീണ്ടും കടന്നാക്രമിച്ചു. തന്റെ ജീവിതത്തിൽ കണ്ട ഏറ്റവും മണ്ടത്തരമായ കരാറുകളിലൊന്നായിരുന്നു അതെന്ന് അദ്ദേഹം വിശേഷിപ്പിച്ചു.

ഒഹായോ ഗവർണർ സ്ഥാനത്തേക്ക് മത്സരിക്കുന്ന ഇന്ത്യൻ വംശജനായ വിവേക് രാമസ്വാമിയുടെ പ്രചാരണ പരസ്യത്തെക്കുറിച്ചുള്ള വിവാദത്തിലും ട്രംപ് പ്രതികരിച്ചു.

ഡെമോക്രാറ്റിക് സ്ഥാനാർഥി ആമി ആക്ടന്റെ വേർപിരിഞ്ഞു കഴിയുന്ന മാതാവിനെ ഉൾപ്പെടുത്തിയ പരസ്യത്തെ ട്രംപ് ന്യായീകരിച്ചു. ആക്ടന്റെ മാതാവ് മകളെ നുണയാളിയെന്നും നല്ല വ്യക്തിയല്ലെന്നും വിശേഷിപ്പിച്ചതിൽ രാമസ്വാമിക്ക് എന്താണ് ഉത്തരവാദിത്തമെന്ന് അദ്ദേഹം ചോദിച്ചു.

ഒക്ടോബർ 24 മുതൽ 26 വരെ നടത്തിയ ഹാർവാർഡ് സി.എ.പി.എസ്./ഹാരിസ് സർവേയിൽ ഡെമോക്രാറ്റുകൾക്ക് 52 ശതമാനവും റിപ്പബ്ലിക്കൻമാർക്ക് 48 ശതമാനവും പിന്തുണയാണ് രേഖപ്പെടുത്തിയത്. ട്രംപിന്റെ അംഗീകാരനിരക്ക് 39 ശതമാനമാണെന്നും സർവേ വ്യക്തമാക്കുന്നു.

നവംബർ മൂന്നിലെ തെരഞ്ഞെടുപ്പിൽ നിരവധി ഇന്ത്യൻ വംശജരും മത്സരരംഗത്തുണ്ട്. വിവേക് രാമസ്വാമിക്ക് പുറമെ ഹൗസിലെ ഇന്ത്യൻ വംശജരായ റോ ഖന്ന, പ്രമീള ജയപാൽ, രാജാ കൃഷ്ണമൂർത്തി, അമി ബേര, ശ്രീ താനേദർ, സുഹാസ് സുബ്രഹ്മണ്യം എന്നിവർ വീണ്ടും തെരഞ്ഞെടുക്കപ്പെടാൻ മത്സരിക്കുന്നു.

ലോസ് ആഞ്ചലസ് മേയർ സ്ഥാനത്തേക്ക് നിത്യ രാമനും ന്യൂയോർക്ക് അറ്റോർണി ജനറൽ സ്ഥാനത്തേക്ക് റിപ്പബ്ലിക്കൻ സ്ഥാനാർഥിയായി സരിത കൊമതിരഡ്ഡിയും മത്സരിക്കുന്നുണ്ട്.

വിലക്കയറ്റം, ഇറാൻ യുദ്ധം, വ്യാപാരനയം തുടങ്ങിയ വിഷയങ്ങൾ തെരഞ്ഞെടുപ്പിൽ നിർണായകമാകുമെന്നാണ് വിലയിരുത്തൽ. ഇരുപാർട്ടികളും പ്രചാരണം ശക്തമാക്കിയതോടെ അമേരിക്കൻ രാഷ്ട്രീയത്തിലെ നിർണായകമായ ഇടക്കാല തെരഞ്ഞെടുപ്പിന് മുന്നോടിയായുള്ള പോരാട്ടം കൂടുതൽ ചൂടുപിടിക്കുകയാണ്.