ജറുസലേം: ഇസ്രയേലിൽ ചൊവ്വാഴ്ച നടക്കുന്ന പാർലമെന്റ് തിരഞ്ഞെടുപ്പിൽ 7.3 മില്യൺ വോട്ടർമാർ സമ്മതിദാനാവകാശം വിനിയോഗിക്കും. 120 അംഗ പാർലമെന്റിലേക്ക് ജനപ്രതിനിധികളെ തിരഞ്ഞെടുക്കുന്നതിനുള്ള വോട്ടെടുപ്പിൽ പ്രധാനമന്ത്രി ബെഞ്ചമിൻ നെതന്യാഹുവിന്റെ രാഷ്ട്രീയ ഭാവിയും രാജ്യത്തിന്റെ ഭാവി ഭരണസംവിധാനവും നിർണായകമാകും.

ഇന്ത്യയിലെ ഇസ്രയേൽ എംബസി വക്താവ് മിഷേൽ സിറോട്ടയാണ് തിരഞ്ഞെടുപ്പിന്റെ പ്രാധാന്യം വിശദീകരിച്ചത്. രാജ്യത്തിന്റെ ഭാവി നിർണയിക്കുന്നതിൽ ജനങ്ങൾക്കുള്ള താൽപര്യമാണ് തിരഞ്ഞെടുപ്പിൽ പ്രതിഫലിക്കുന്നതെന്ന് അവർ പറഞ്ഞു. ഇഷ്ടമുള്ള രാഷ്ട്രീയ പാർട്ടിക്ക് വോട്ട് ചെയ്യാനും ഭരണസഖ്യത്തിലോ പ്രതിപക്ഷത്തോ പ്രതിനിധികളാകുന്നവരെ തിരഞ്ഞെടുക്കാനും വോട്ടർമാർക്ക് അവസരമുണ്ട്.

ഇസ്രയേലിലെ ആനുപാതിക പ്രാതിനിധ്യ സംവിധാനപ്രകാരം ഓരോ പാർട്ടിക്കും ലഭിക്കുന്ന വോട്ടുകളുടെ അടിസ്ഥാനത്തിലാണ് പാർലമെന്റിലെ സീറ്റുകൾ നിശ്ചയിക്കുന്നത്. തിരഞ്ഞെടുപ്പിനുശേഷം സർക്കാർ രൂപീകരിക്കാൻ ഏത് പാർട്ടിയെ ആദ്യം ക്ഷണിക്കണമെന്ന് പ്രസിഡന്റ് തീരുമാനിക്കും. സർക്കാർ രൂപീകരിക്കാൻ ക്ഷണം ലഭിക്കുന്ന പാർട്ടിക്ക് മറ്റ് പാർട്ടികളുടെ പിന്തുണ ഉറപ്പാക്കാൻ 28 ദിവസത്തെ സമയമുണ്ട്.

ആദ്യ പാർട്ടിക്ക് സർക്കാർ രൂപീകരിക്കാൻ കഴിയാത്തപക്ഷം മറ്റൊരു പാർട്ടിക്ക് അവസരം ലഭിക്കും. അതിനും സാധിച്ചില്ലെങ്കിൽ 90 ദിവസത്തിനുള്ളിൽ വീണ്ടും തിരഞ്ഞെടുപ്പ് നടക്കാൻ സാധ്യതയുണ്ടെന്ന് സിറോട്ട വ്യക്തമാക്കി.

തിരഞ്ഞെടുപ്പിന് മുന്നോടിയായുള്ള അഭിപ്രായ സർവേകളിൽ ഒരു മുന്നണിക്കും വ്യക്തമായ ഭൂരിപക്ഷം പ്രവചിക്കുന്നില്ല. ഇതോടെ നെതന്യാഹുവിന്റെ നേതൃത്വത്തിലുള്ള പക്ഷവും അദ്ദേഹത്തെ അധികാരത്തിൽനിന്ന് മാറ്റാൻ ശ്രമിക്കുന്ന പ്രതിപക്ഷവും തമ്മിലുള്ള പോരാട്ടം നിർണായകമായിരിക്കുകയാണ്.

മുതിർന്ന ഇസ്രയേലി മാധ്യമപ്രവർത്തകൻ യാരോൺ ഡെസൽ ഐഎഎൻഎസിനോട് പറഞ്ഞതനുസരിച്ച്, തിരഞ്ഞെടുപ്പിനുശേഷം മൂന്ന് പ്രധാന സാധ്യതകളാണുള്ളത്. വീണ്ടും തിരഞ്ഞെടുപ്പ് നടത്തുക, പ്രധാന രാഷ്ട്രീയ കക്ഷികൾ സഹകരിച്ച് ദേശീയ ഐക്യസർക്കാർ രൂപീകരിക്കുക, അല്ലെങ്കിൽ പ്രതിപക്ഷം ന്യൂനപക്ഷ സർക്കാർ രൂപീകരിക്കുക എന്നിവയാണവ.

120 അംഗ പാർലമെന്റിൽ ഭൂരിപക്ഷത്തിന് 61 സീറ്റുകൾ വേണം. എന്നാൽ അത്രയും സീറ്റുകൾ ലഭിക്കാതെയും മറ്റ് പാർട്ടികളുടെയോ സ്വതന്ത്ര അംഗങ്ങളുടെയോ പിന്തുണയോടെ സഭയിൽ ആവശ്യമായ ഭൂരിപക്ഷം ഉറപ്പാക്കി സർക്കാരുണ്ടാക്കാൻ പ്രതിപക്ഷം ശ്രമിച്ചേക്കാമെന്നും ഡെസൽ പറഞ്ഞു.

യുദ്ധങ്ങളും സുരക്ഷാ വെല്ലുവിളികളും നേരിടുന്ന സാഹചര്യത്തിൽ ദേശീയ ഐക്യവും സമാധാനവുമാണ് വോട്ടർമാരുടെ പ്രധാന ആശങ്കകളിലൊന്ന്. തിരഞ്ഞെടുപ്പ് ഫലം എന്തായാലും ജനങ്ങൾ ഒറ്റക്കെട്ടായി നിൽക്കേണ്ടത് അനിവാര്യമാണെന്ന് ഒരു ഇസ്രയേലി പൗരൻ പ്രതികരിച്ചു.

മൂന്നു വർഷത്തെ യുദ്ധത്തിനുശേഷം ജനങ്ങൾ സമാധാനമാണ് ആഗ്രഹിക്കുന്നതെന്നും തിരഞ്ഞെടുപ്പിൽ ദേശീയ സുരക്ഷയ്ക്കായിരിക്കും പലരും മുൻഗണന നൽകുകയെന്നും മറ്റൊരു വോട്ടർ പറഞ്ഞു.

തിരഞ്ഞെടുപ്പിൽ ആർക്കു മേൽക്കൈ ലഭിക്കുമെന്നതിനു പുറമെ, പുതിയ സർക്കാർ രൂപീകരിക്കാൻ ആവശ്യമായ പിന്തുണ സമാഹരിക്കാൻ ഏത് പക്ഷത്തിന് കഴിയുമെന്നതും ഇസ്രയേലിന്റെ രാഷ്ട്രീയ ഭാവി നിർണയിക്കും.