വാഷിങ്ടൺ: യുഎസ് കോൺഗ്രസിന്റെ നിയന്ത്രണം തീരുമാനിക്കുന്നതിൽ നിർണായകമായേക്കാവുന്ന മിഷിഗണിൽ ഇന്ത്യൻ അമേരിക്കൻ വോട്ടർമാരെ ലക്ഷ്യമിട്ട് രാഷ്ട്രീയ പാർട്ടികളും ഏഷ്യൻ അമേരിക്കൻ സംഘടനകളും പ്രചാരണം ശക്തമാക്കി. ഡോണൾഡ് ട്രംപ് ഞായറാഴ്ച പോർട്ട് ഹ്യൂറനിൽ തിരഞ്ഞെടുപ്പ് റാലിയിൽ പങ്കെടുക്കാനിരിക്കെയാണ് ഇന്ത്യൻ വംശജരുടെ പിന്തുണ ഉറപ്പാക്കാനുള്ള നീക്കങ്ങൾ സജീവമായത്.

മിഷിഗണിലെ ഏറ്റവും വലിയ ഏഷ്യൻ വംശീയ വിഭാഗമാണ് ഇന്ത്യൻ അമേരിക്കക്കാർ. എഎപിഐ ഡാറ്റയുടെ കണക്കനുസരിച്ച് സംസ്ഥാനത്ത് ഏകദേശം 1,38,644 ഇന്ത്യൻ വംശജരുണ്ട്. വോട്ടവകാശമുള്ള ഏഷ്യൻ അമേരിക്കക്കാരുടെ എണ്ണം 1,23,545 വരും.

ഏഷ്യൻ അമേരിക്കൻ സ്ഥാനാർഥികൾക്കും വോട്ടർമാർക്കും പിന്തുണ നൽകുന്ന രാഷ്ട്രീയ സംഘടനയായ എഎപിഐ വിക്ടറി ഫണ്ട് ഒക്ടോബർ 17ന് ഡിട്രോയിറ്റിലെ ഗോഡ്ഫ്രി ഹോട്ടലിൽ സ്വീകരണ പരിപാടി സംഘടിപ്പിച്ചിരുന്നു. സെനറ്റർ എലിസ സ്ലോട്ട്കിനും ഡെമോക്രാറ്റിക് ഗവർണർ സ്ഥാനാർഥിയും സ്റ്റേറ്റ് സെക്രട്ടറിയുമായ ജോസെലിൻ ബെൻസണും പരിപാടിയിൽ പങ്കെടുത്തു.

ഏഷ്യൻ അമേരിക്കൻ വോട്ടർമാർക്കും സ്ഥാനാർഥികൾക്കും ആവശ്യമായ രാഷ്ട്രീയ സാമ്പത്തിക പിന്തുണ ലഭിക്കുന്നില്ലെന്ന തിരിച്ചറിവിലാണ് സൂപ്പർ പിഎസി രൂപീകരിച്ചതെന്ന് സംഘടനാ പ്രസിഡന്റ് ലിൻ എൻഗുയെൻ പറഞ്ഞു. മിഷിഗൺ, ജോർജിയ തുടങ്ങിയ ഏഷ്യൻ അമേരിക്കൻ ജനസംഖ്യ കൂടുതലുള്ളതും കടുത്ത മത്സരങ്ങൾ നടക്കുന്നവയുമായ സംസ്ഥാനങ്ങളിൽ സംഘടന ശ്രദ്ധ കേന്ദ്രീകരിക്കുന്നതായും അദ്ദേഹം വ്യക്തമാക്കി.

ഡെമോക്രാറ്റിക് സെനറ്റ് സ്ഥാനാർഥി അബ്ദുൽ എൽ-സയീദ്, ഗവർണർ സ്ഥാനാർഥി ബെൻസൻ, ലഫ്റ്റനന്റ് ഗവർണർ ഗാർലിൻ ഗിൽക്രിസ്റ്റ് രണ്ടാമൻ, ഇന്ത്യൻ അമേരിക്കൻ സംസ്ഥാന നിയമസഭാംഗം രൺജീവ് പുരി എന്നിവർക്കാണ് മിഷിഗണിൽ സംഘടന പിന്തുണ പ്രഖ്യാപിച്ചിരിക്കുന്നത്.

മിഷിഗണിലെ ട്രോയ്, നോവി, കാന്റൺ, ഫാർമിങ്ടൺ ഹിൽസ് തുടങ്ങിയ ഓക്ലൻഡ് കൗണ്ടി നഗരപ്രാന്തങ്ങളിലാണ് ഇന്ത്യൻ അമേരിക്കൻ ജനസംഖ്യ കൂടുതലായി കേന്ദ്രീകരിച്ചിരിക്കുന്നത്. മത്സരാധിഷ്ഠിതമായ നിരവധി ജനപ്രതിനിധിസഭാ മണ്ഡലങ്ങളുടെ പരിധിയിലോ സമീപത്തോ ഉള്ള പ്രദേശങ്ങളാണിവ.

ഡിട്രോയിറ്റ് ആസ്ഥാനമായ 13-ാം കോൺഗ്രസ് ഡിസ്ട്രിക്ടിനെ പ്രതിനിധീകരിക്കുന്ന ഡെമോക്രാറ്റ് ശ്രീ താനേദാറാണ് മിഷിഗണിൽനിന്നുള്ള ഏക ഇന്ത്യൻ അമേരിക്കൻ കോൺഗ്രസ് അംഗം.

റിപ്പബ്ലിക്കൻ പാർട്ടിക്ക് അനുകൂലമായ മിഷിഗണിലെ തംബ് മേഖലയിലാണ് പോർട്ട് ഹ്യൂറൻ സ്ഥിതി ചെയ്യുന്നത്. വെള്ളിയാഴ്ച ഫ്ലോറിഡയിലെ ഫോർട്ട് മയേഴ്സിലും ശനിയാഴ്ച ജോർജിയയിലെ പെറിയിലും റാലികളിൽ പങ്കെടുത്ത ട്രംപിന്റെ മൂന്നാമത്തെ തുടർച്ചയായ തിരഞ്ഞെടുപ്പ് റാലിയാണിത്.

കഴിഞ്ഞ തിരഞ്ഞെടുപ്പുകളിൽ ഇന്ത്യൻ അമേരിക്കൻ വോട്ടർമാർ പൊതുവെ ഡെമോക്രാറ്റുകൾക്ക് അനുകൂലമായിരുന്നെങ്കിലും ചില കുടിയേറ്റ സമൂഹങ്ങൾക്കിടയിൽ റിപ്പബ്ലിക്കൻ പാർട്ടിയും പിന്തുണ വർധിപ്പിക്കാൻ ശ്രമിക്കുന്നുണ്ട്. എച്ച്-1ബി വിസ നിയന്ത്രണങ്ങൾ കടുപ്പിച്ചതും ഓൺലൈനിൽ ഇന്ത്യക്കാർക്കെതിരായ അധിക്ഷേപ പരാമർശങ്ങൾ വർധിച്ചതും ഇത്തവണത്തെ പ്രചാരണത്തെ കൂടുതൽ സങ്കീർണമാക്കുന്നു.

നവംബർ മൂന്നിന് മിഷിഗണിൽ ഗവർണർ, യുഎസ് സെനറ്റർ, സംസ്ഥാനത്തെ 13 ഹൗസ്  അംഗങ്ങൾ എന്നിവരെ തിരഞ്ഞെടുക്കാൻ വോട്ടെടുപ്പ് നടക്കും. കോൺഗ്രസിന്റെ നിയന്ത്രണം നിർണയിക്കുന്നതിൽ സംസ്ഥാനത്തെ ഓരോ വിഭാഗം വോട്ടർമാരുടെയും പിന്തുണ നിർണായകമായേക്കുമെന്ന വിലയിരുത്തലിലാണ് രാഷ്ട്രീയ സംഘടനകൾ.