വാഷിങ്ടൺ: ഒഹായോ ഗവർണർ തിരഞ്ഞെടുപ്പിൽ മത്സരിക്കുന്ന ഇന്ത്യൻ വംശജനായ റിപ്പബ്ലിക്കൻ നേതാവ് വിവേക് രാമസ്വാമിയുടെ പ്രചാരണ സമിതിക്ക് 41.3 മില്യൺ ഡോളർ (ഏകദേശം 3,700 കോടി രൂപ) വായ്പാ ബാധ്യതയുള്ളതായി റിപ്പോർട്ട്. അതേസമയം, ഡെമോക്രാറ്റിക് എതിരാളി ആമി ആക്ടൻ ഏറ്റവും പുതിയ റിപ്പോർട്ടിങ് കാലയളവിൽ രാമസ്വാമിയുടെ ഇരട്ടിയിലധികം തുക സമാഹരിച്ചു.

ഒക്ടോബർ 14 വരെയുള്ള കണക്കുകൾ പ്രകാരം ആക്ടൻ 3.9 മില്യൺ ഡോളർ സമാഹരിച്ചപ്പോൾ രാമസ്വാമിക്ക് ലഭിച്ചത് 1.5 മില്യൺ ഡോളറാണ്. ആക്ടന്റെ പ്രചാരണ ഫണ്ടിൽ 3.6 മില്യൺ ഡോളർ ശേഷിക്കുന്നുണ്ട്. രാമസ്വാമിയുടെ ഫണ്ടിൽ 2.4 മില്യൺ ഡോളറാണുള്ളത്. സ്റ്റേറ്റ് അഫയേഴ്സ് പുറത്തുവിട്ട തിരഞ്ഞെടുപ്പ് ധനകാര്യ റിപ്പോർട്ടുകളെ ഉദ്ധരിച്ച് മാധ്യമങ്ങൾ ഇക്കാര്യം റിപ്പോർട്ട് ചെയ്തു.

ബയോടെക്നോളജി സംരംഭകനും മുൻ റിപ്പബ്ലിക്കൻ പ്രസിഡന്റ് സ്ഥാനാർഥിയുമായ രാമസ്വാമി ആദ്യമായി പൊതുതെരഞ്ഞെടുപ്പിലൂടെ ഒരു ഔദ്യോഗിക പദവിയിലെത്താനാണ് ശ്രമിക്കുന്നത്. ഇതുവരെ പ്രചാരണത്തിനായി 51.2 മില്യൺ ഡോളർ ചെലവഴിച്ചതായാണ് കണക്ക്. ഇതിൽ 28.5 മില്യൺ ഡോളർ പരസ്യങ്ങൾക്കായും 7.3 മില്യൺ ഡോളർ ഡിജിറ്റൽ കൺസൾട്ടിങ് സേവനങ്ങൾക്കായും വിനിയോഗിച്ചു.

പ്രചാരണ സമിതിയുടെ കണക്കിൽ സ്ഥാനാർഥിയിൽനിന്നുള്ള അഞ്ച് മില്യൺ ഡോളറിന്റെ മറ്റ് വരുമാനവും ഉൾപ്പെടുത്തിയിട്ടുണ്ട്. സമിതിക്ക് രാമസ്വാമിയോടുള്ള 41.3 മില്യൺ ഡോളറിന്റെ വായ്പാ ബാധ്യതയും രേഖപ്പെടുത്തിയിട്ടുണ്ട്.

പാർട്ടി പ്രൈമറിയിൽ എതിരില്ലാതെ നാമനിർദേശം നേടിയ ആക്ടൻ ഇതുവരെ 26.3 മില്യൺ ഡോളർ ചെലവഴിച്ചു. ഇതിൽ 18.5 മില്യൺ ഡോളർ മാധ്യമപരസ്യങ്ങൾക്കും 2.2 മില്യൺ ഡോളർ ഡിജിറ്റൽ പരസ്യങ്ങൾക്കുമാണ് വിനിയോഗിച്ചത്.

ധനസമാഹരണത്തിൽ ആക്ടൻ മുന്നിലാണെങ്കിലും പരസ്യപ്രചാരണത്തിനുള്ള മൊത്തം ചെലവിൽ റിപ്പബ്ലിക്കൻ പക്ഷത്തിനാണ് വലിയ മുൻതൂക്കം. പരസ്യച്ചെലവ് നിരീക്ഷിക്കുന്ന അഡ്ഇംപാക്ടിന്റെ കണക്കുകൾ പ്രകാരം ഒക്ടോബർ 22 വരെ രാമസ്വാമിയുടെ പാർട്ടിയും അനുബന്ധ സംഘടനകളും ചേർന്ന് 143.9 മില്യൺ ഡോളർ ചെലവഴിച്ചപ്പോൾ ഡെമോക്രാറ്റിക് പക്ഷത്തിന്റെ ചെലവ് 45 മില്യൺ ഡോളറായിരുന്നു.

രാമസ്വാമിയുടെ പ്രചാരണ സമിതി ഭാവിയിലെ പരസ്യങ്ങൾക്കായി 2.8 മില്യൺ ഡോളറിന്റെ അധിക ബുക്കിങ്ങും നടത്തിയിട്ടുണ്ട്. ഇതോടെ അദ്ദേഹത്തിന്റെ ഭാവി പരസ്യബുക്കിങ്ങുകൾ 14.8 മില്യൺ ഡോളറായി. ഡെമോക്രാറ്റുകളുടെ കണക്കിൽ ഇത് എട്ട് മില്യൺ ഡോളറാണ്.

തിരഞ്ഞെടുപ്പ് പ്രവചനങ്ങളിലും മാറ്റമുണ്ടായിട്ടുണ്ട്. വിർജീനിയ സർവകലാശാലയുടെ സെന്റർ ഫോർ പൊളിറ്റിക്സിന്റെ ‘സബാറ്റോസ് ക്രിസ്റ്റൽ ബോൾ’ ഒക്ടോബർ 22ന് മത്സരം ഇരു സ്ഥാനാർഥികൾക്കും തുല്യസാധ്യതയുള്ള വിഭാഗത്തിൽനിന്ന് ഡെമോക്രാറ്റുകൾക്ക് നേരിയ മുൻതൂക്കമുള്ള വിഭാഗത്തിലേക്ക് മാറ്റി.

ആക്ടന്റെ അകന്നുകഴിയുന്ന മാതാവ് ഡോണ ആർതറിനെ ഉൾപ്പെടുത്തി രാമസ്വാമിയുടെ പ്രചാരണസംഘം പുറത്തിറക്കിയ നാല് മില്യൺ ഡോളറിന്റെ പരസ്യവും വിവാദമായിട്ടുണ്ട്. ആക്ടനെ നുണയിയെന്ന് വിശേഷിപ്പിക്കുന്ന പരസ്യത്തിനെതിരെ വിമർശനങ്ങൾ ഉയർന്നതോടെ റിപ്പബ്ലിക്കൻ ഗവർണർ മൈക്ക് ഡിവൈനും രംഗത്തെത്തി. പരസ്യം തെറ്റാണെന്നും പിൻവലിക്കണമെന്നും അദ്ദേഹം ആവശ്യപ്പെട്ടു. എന്നാൽ പരസ്യത്തെക്കുറിച്ചുള്ള മാധ്യമവിമർശനങ്ങൾ തെറ്റാണെന്ന് രാമസ്വാമി പ്രതികരിച്ചു.

ആക്ടന്റെ കുടുംബവുമായി ബന്ധപ്പെട്ട പഴയ നിയമരേഖകളും വിവാദത്തിന്റെ ഭാഗമായി ചർച്ചയാകുന്നുണ്ട്. 1978ൽ ആക്ടന്റെ രണ്ടാനച്ഛൻ ക്ലെഡിത്ത് ആർതർ 13 വയസ്സിൽ താഴെയുള്ള കുട്ടിയെ ബലാത്സംഗം ചെയ്തെന്ന കേസിൽ അറസ്റ്റിലാകുകയും ഗ്രാൻഡ് ജൂറി കുറ്റം ചുമത്തുകയും ചെയ്തതായി എൻബിസി ന്യൂസ് റിപ്പോർട്ട് ചെയ്തു. ഏകദേശം 50 വർഷമായി മാതാവിനെ കണ്ടിട്ടില്ലെന്നും സംസാരിച്ചിട്ടില്ലെന്നും ആക്ടൻ വ്യക്തമാക്കിയിട്ടുണ്ട്.

നവംബർ മൂന്നിനാണ് ഒഹായോ ഗവർണർ തിരഞ്ഞെടുപ്പ്. ധനസമാഹരണം, പരസ്യച്ചെലവ്, വിവാദ പ്രചാരണങ്ങൾ, മാറുന്ന തിരഞ്ഞെടുപ്പ് പ്രവചനങ്ങൾ എന്നിവ മത്സരം കൂടുതൽ ശ്രദ്ധേയമാക്കിയിരിക്കുകയാണ്.