വാഷിങ്ടൺ: കുട്ടികളിൽ വായനാശീലം വളർത്തുന്നതിനുള്ള പ്രവർത്തനങ്ങളുടെ ഭാഗമായി അമേരിക്കൻ സെക്കൻഡ് ലേഡി ഉഷ വാൻസ് അർക്കൻസസിലെ സ്കൂളുകൾ സന്ദർശിച്ചു. ഗവർണർ സാറാ ഹക്കബി സാൻഡേഴ്സിനൊപ്പം നോർത്ത് ലിറ്റിൽ റോക്കിലെ ഗ്ലെൻവ്യൂ എലിമെന്ററി സ്കൂളിലെത്തിയ അവർ ക്ലാസ് മുറികൾ സന്ദർശിക്കുകയും വിദ്യാർഥികൾക്ക് പുസ്തകം വായിച്ചുകൊടുക്കുകയും ചെയ്തു.

കുട്ടികളുടെ വായനാശേഷി മെച്ചപ്പെടുത്തുന്നതിനുള്ള പ്രവർത്തനങ്ങൾ വിലയിരുത്തിയ ഇരുവരും സംസ്ഥാനത്തെ വിദ്യാഭ്യാസ രംഗത്തെ പ്രമുഖരുമായി ചർച്ച നടത്തി. അധ്യാപകരും കുടുംബങ്ങളും ഒരുമിച്ച് പ്രവർത്തിച്ചാൽ കുട്ടികളുടെ പഠനമികവ് വർധിപ്പിക്കാനാകുമെന്ന് ഉഷ വാൻസ് പറഞ്ഞു. വായനാശേഷി മെച്ചപ്പെടുത്താനും അധ്യാപകർക്ക് പിന്തുണ നൽകാനും എല്ലാ കുട്ടികൾക്കും വളർച്ചയ്ക്കുള്ള അവസരമൊരുക്കാനും തുടർന്നും പ്രവർത്തിക്കുമെന്നും അവർ വ്യക്തമാക്കി.

പിന്നീട് ഗവർണറുമായി നടത്തിയ കൂടിക്കാഴ്ചയിൽ സംസ്ഥാനത്തെ വായനാ വിദ്യാഭ്യാസത്തിന്റെ പുരോഗതിയും തുടർനടപടികളും വിലയിരുത്തി. മെറിറ്റ് ടീച്ചർ ഇൻസെന്റീവ് ഫണ്ടിലൂടെ ബോണസ് നേടിയ 50 അധ്യാപകരെ ഗവർണറുടെ വസതിയിൽ നടന്ന ചടങ്ങിൽ ആദരിക്കുകയും ചെയ്തു.

കുട്ടികളുടെ വിദ്യാഭ്യാസ വിജയത്തിൽ വായന നിർണായകമാണെന്നും വായനാശേഷി അവരുടെ ഭാവിയെ സ്വാധീനിക്കുന്ന പ്രധാന ഘടകമാണെന്നും ഗവർണർ സാറാ ഹക്കബി സാൻഡേഴ്സ് പറഞ്ഞു. വായനയുടെ പ്രാധാന്യം ഉയർത്തിക്കാട്ടുന്ന ഉഷ വാൻസിന്റെ പ്രവർത്തനങ്ങളെ അവർ അഭിനന്ദിച്ചു.

അർക്കൻസസിൽ മൂന്നാം ക്ലാസിലെ വിദ്യാർഥികളിൽ വായനയിൽ നിശ്ചിത മികവ് കൈവരിച്ചവരുടെ അനുപാതം 2024-ലെ 35 ശതമാനത്തിൽനിന്ന് 2026-ൽ 43 ശതമാനമായി ഉയർന്നതായി ഗവർണറുടെ ഓഫീസ് അറിയിച്ചു. അധ്യാപകരെ പ്രോത്സാഹിപ്പിക്കുന്ന മെറിറ്റ് പേ പദ്ധതിയിലൂടെ കഴിഞ്ഞ മൂന്നു വർഷത്തിനിടെ 12,000-ത്തിലധികം അധ്യാപകർക്ക് 50 മില്യൺ ഡോളറിലേറെ ബോണസ് നൽകിയതായും അധികൃതർ വ്യക്തമാക്കി.

ഇന്ത്യൻ കുടിയേറ്റക്കാരുടെ മകളായ ഉഷ വാൻസ്, ഭർത്താവ് ജെ.ഡി. വാൻസ് 2025 ജനുവരിയിൽ വൈസ് പ്രസിഡന്റായി ചുമതലയേറ്റതോടെയാണ് അമേരിക്കയുടെ ആദ്യ ഇന്ത്യൻ-അമേരിക്കൻ സെക്കൻഡ് ലേഡിയായത്. അഭിഭാഷകയായ അവർ കുട്ടികളുടെ വായനാശേഷി മെച്ചപ്പെടുത്തുന്നതിന് പ്രത്യേക പ്രാധാന്യം നൽകിവരുന്നു.

കിന്റർഗാർട്ടൻ മുതൽ എട്ടാം ക്ലാസ് വരെയുള്ള വിദ്യാർഥികളെ വേനലവധിക്കാലത്ത് 12 പുസ്തകങ്ങൾ വായിക്കാൻ പ്രോത്സാഹിപ്പിക്കുന്ന സമ്മർ റീഡിങ് ചലഞ്ചിനും ഉഷ വാൻസ് തുടക്കമിട്ടിരുന്നു. ഈ വർഷം 50 സംസ്ഥാനങ്ങൾ, വാഷിങ്ടൺ ഡി.സി., നാല് യു.എസ്. ടെറിട്ടറികൾ എന്നിവിടങ്ങളിൽനിന്നുള്ള വിദ്യാർഥികൾ പങ്കെടുത്തു. മുൻവർഷത്തെ അപേക്ഷിച്ച് പങ്കാളിത്തം ഇരട്ടിയിലധികമായെന്നും ഗവർണറുടെ ഓഫീസ് അറിയിച്ചു.