വാഷിങ്ടൺ, ഒക്ടോബർ 20 : സുഹൃത്തിന്റെ അകാലമരണം ജീവിതത്തിൽ വഴിത്തിരിവായതോടെ കോർപറേറ്റ് ജോലി ഉപേക്ഷിച്ച് എഴുത്തിന്റെ ലോകത്തേക്ക് കടന്ന ഡൽഹിയിൽ ജനിച്ച മോണിക്ക സൈഗാൾ, ഇന്ന് 14 പുസ്തകങ്ങളുടെ രചയിതാവാണ്. അമേരിക്കയിലെ നോർത്തേൺ വെർജീനിയയിൽ താമസിക്കുന്ന 57-കാരിയായ ഇവരുടെ ജീവിതം സ്വപ്നസാക്ഷാത്കാരത്തിനായി നടത്തിയ ധീരമായ തീരുമാനത്തിന്റെ കഥ കൂടിയാണ്.

അഞ്ചാം വയസ്സുമുതൽ എഴുത്തിനോട് താൽപര്യമുണ്ടായിരുന്നെങ്കിലും യാഥാസ്ഥിതിക പഞ്ചാബി കുടുംബത്തിൽ വളർന്നതിനാൽ ഡോക്ടർ, അഭിഭാഷകൻ, എൻജിനീയർ തുടങ്ങിയ പരമ്പരാഗത തൊഴിൽമേഖലകളിലേക്കായിരുന്നു കുടുംബത്തിന്റെ പ്രതീക്ഷയെന്ന് അവർ വ്യക്തമാക്കി. ഇതേത്തുടർന്ന് എൻജിനീയറിങ് പഠിച്ച് രണ്ട് ബിരുദാനന്തര ബിരുദങ്ങളും നേടി.

 ആറു വയസ്സുള്ളപ്പോൾ ഇവർ കുടുംബത്തോടൊപ്പം ബഹ്‌റൈനിലേക്ക് താമസം മാറി. ഏകദേശം 30 വർഷത്തോളം അവിടെ കഴിഞ്ഞ കുടുംബം പിന്നീട് ഇന്ത്യയിലേക്ക് മടങ്ങി. ബെംഗളൂരുവിലെ ബിഎംഎസ് കോളജിൽനിന്ന് എൻജിനീയറിങ് ബിരുദം നേടിയ സൈഗാൾ,1991-ൽ ഉപരിപഠനത്തിനായി അമേരിക്കയിലെത്തി. വെർജീനിയയിലെ ലിഞ്ച്ബർഗ് കോളജിലും ജോർജ് വാഷിങ്ടൺ സർവകലാശാലയിലുമായി പഠനം തുടർന്നു.

അമേരിക്കയിലെത്തിയ ആദ്യകാലത്ത് കടുത്ത തണുപ്പും മഞ്ഞുവീഴ്ചയും പരിചയമില്ലാത്ത സാഹചര്യങ്ങളും വെല്ലുവിളിയായിരുന്നുവെന്ന് എഴുത്തുകാരിഓർത്തെടുത്തു. ഇന്ത്യയിലെ തിരക്കേറിയ ജീവിതത്തിൽനിന്ന് വ്യത്യസ്തമായി ചെറിയ പട്ടണത്തിലെ ശാന്തമായ അന്തരീക്ഷവുമായി പൊരുത്തപ്പെടാനും ഇന്ത്യൻ ഭക്ഷണസാധനങ്ങൾ ലഭ്യമാക്കാനും ബുദ്ധിമുട്ടേണ്ടിവന്നു.

പഠനത്തിനുശേഷം ഏണസ്റ്റ് ആൻഡ് യങ്, ഹ്യൂവിറ്റ് അസോസിയേറ്റ്സ് എന്നീ സ്ഥാപനങ്ങളിൽ ജോലി ചെയ്തു. എഴുത്തിലേക്ക് തിരിയാൻ അടുത്ത സുഹൃത്ത് നിരന്തരം പ്രോത്സാഹിപ്പിച്ചിരുന്നെങ്കിലും വിരമിച്ചശേഷം എഴുതാമെന്നായിരുന്നു മോണിക്കയുടെ തീരുമാനം.

എന്നാൽ, 35-ാം വയസ്സിൽ സുഹൃത്ത് അപകടത്തിൽ മരിച്ചതോടെ ആ തീരുമാനം മാറി. നടപ്പാതയിൽ വീണ് തലയ്ക്ക് പരിക്കേറ്റായിരുന്നു സുഹൃത്തിന്റെ മരണം. വിരമിക്കുന്ന പ്രായമെത്തുംവരെ കാത്തിരിക്കേണ്ടതുണ്ടോ എന്ന സുഹൃത്ത് നേരത്തേ ഉന്നയിച്ച ചോദ്യം ആഴത്തിൽ സ്വാധീനിച്ചു. തുടർന്ന് മുഴുവൻ സമയ ജോലിയുപേക്ഷിച്ച് എഴുത്തിൽ ശ്രദ്ധ കേന്ദ്രീകരിക്കാൻ അവർ തീരുമാനിച്ചു. ഇതോടെ കുടുംബത്തിന്റെ വരുമാനം പകുതിയായി കുറഞ്ഞെങ്കിലും തീരുമാനത്തിൽനിന്ന് പിന്നോട്ടുപോയില്ല.

ഭക്ഷണവുമായി ബന്ധപ്പെട്ട രചനകളിലൂടെയാണ് എഴുത്തുജീവിതത്തിന് തുടക്കമിട്ടത്. ആദ്യ വർഷം വെറും 5,000 ഡോളർ മാത്രമായിരുന്നു വരുമാനം. പിന്നീട് പാചകപുസ്തകങ്ങൾ രചിച്ചു. സൈമൺ ആൻഡ് ഷസ്റ്റർ പ്രസിദ്ധീകരിച്ച Modern Spice അവയിൽ ശ്രദ്ധേയമായി. പിതാവിനൊപ്പം പാചകം ചെയ്ത അനുഭവങ്ങളിൽനിന്ന് പ്രചോദനം ഉൾക്കൊണ്ട് കുട്ടികൾക്കായി Papa’s Butter Chicken എന്ന പുസ്തകവും രചിച്ചു. അടുത്തിടെ പിതാവിനെ നഷ്ടപ്പെട്ട സൈഗാളിന് ഈ പുസ്തകം വൈകാരികമായി ഏറെ പ്രിയപ്പെട്ടതാണ്.

വ്യക്തിജീവിതത്തിലെ പ്രതിസന്ധികളും അവരുടെ രചനകൾക്ക് വിഷയമായി. മുൻഭർത്താവ് ഗുരുതര രോഗബാധിതനായപ്പോൾ തീവ്രപരിചരണ വിഭാഗത്തിൽ അദ്ദേഹത്തെ പരിചരിച്ച അനുഭവങ്ങൾ ഐസിയുവിലെ രോഗീപരിചാരകർക്കായി ഒരു പുസ്തകം തയ്യാറാക്കാൻ പ്രേരണയായി. ഈ പുസ്തകത്തിന്റെ പകർപ്പുകൾ ഇൻഓവ ഫെയർഫാക്സ് ആശുപത്രിയിലെത്തുന്നവർക്കായി സംഭാവന ചെയ്തിട്ടുണ്ടെന്നും അവർ അറിയിച്ചു. രോഗീപരിചരണം സ്നേഹത്തിന്റെ ഏറ്റവും പ്രയാസമേറിയ പ്രകടനങ്ങളിലൊന്നാണെന്നും അത് പരിചരിക്കുന്നവരെ ശാരീരികമായും മാനസികമായും ക്ഷീണിപ്പിക്കുമ്പോഴും ആ അനുഭവങ്ങളെക്കുറിച്ച് സമൂഹത്തിൽ വേണ്ടത്ര ചർച്ച നടക്കുന്നില്ലെന്നും സൈഗാൾ നിരീക്ഷിച്ചു.

സ്ത്രീകളുടെ ജീവിതത്തിലെ മധ്യകാലഘട്ടത്തെ  ആസ്പദമാക്കിയുള്ള ചെറുകഥാസമാഹാരമാണ് അവരുടെ പുതിയ പുസ്തകമായ The Lotus Blooms Twice. മാതാപിതാക്കളുടെ വേർപാട്, ദാമ്പത്യബന്ധത്തിലെ മാറ്റങ്ങൾ, മക്കൾ സ്വതന്ത്രരാകുന്ന സാഹചര്യം തുടങ്ങിയ ജീവിതാനുഭവങ്ങൾക്കുശേഷം സ്ത്രീകൾ സ്വന്തം വ്യക്തിത്വത്തെ എങ്ങനെ തിരിച്ചറിയുന്നു എന്നതാണ് പുസ്തകത്തിന്റെ പ്രധാന പ്രമേയം.

രാത്രിയിൽ അടയുകയും പ്രഭാതത്തിൽ സൂര്യപ്രകാശത്തോടൊപ്പം വീണ്ടും വിരിയുകയും ചെയ്യുന്ന താമരയിൽനിന്നാണ് പുസ്തകത്തിന്റെ പേര് സ്വീകരിച്ചത്. ജീവിതത്തിന്റെ രണ്ടാംഘട്ടത്തെ സഹനത്തിന്റെയും അതിജീവനത്തിന്റെയും ഭാഗമായി മാത്രം കാണാതെ സന്തോഷത്തോടെയും ആത്മവിശ്വാസത്തോടെയും മുന്നോട്ടുകൊണ്ടുപോകണമെന്നാണ് തന്റെ നിലപാടെന്നും മോണിക്ക വ്യക്തമാക്കി. സ്ത്രീകൾ പരസ്പരം പിന്തുണയ്ക്കുകയും ജീവിതത്തെ കൂടുതൽ ലാളിത്യത്തോടെയും സന്തോഷത്തോടെയും സമീപിക്കുകയും ചെയ്യേണ്ടതിന്റെ പ്രാധാന്യവും പുസ്തകം മുന്നോട്ടുവയ്ക്കുന്നു.

വായനക്കാരെ ചിന്തിപ്പിക്കാനും ചർച്ചകൾക്ക് വഴിയൊരുക്കാനും ലക്ഷ്യമിട്ട് ചില കഥകൾക്ക് വ്യക്തമായ അവസാനഭാഗം നൽകിയിട്ടില്ല. വായനക്കാർക്ക് സ്വന്തം നിലയിൽ വ്യാഖ്യാനിക്കാനും വ്യത്യസ്ത അഭിപ്രായങ്ങൾ പങ്കുവയ്ക്കാനും കഴിയുന്ന രീതിയിലാണ് അവ ഒരുക്കിയിരിക്കുന്നത്.

ഇന്ത്യൻ ഇംഗ്ലീഷ് സാഹിത്യത്തിന് ഇപ്പോൾ മികച്ച അവസരങ്ങളാണുള്ളതെന്ന് സൈഗാൾ വിലയിരുത്തി. ഇന്ത്യയിലെ പുസ്തകശാലകളിൽ വായനക്കാർക്ക് തിരഞ്ഞെടുക്കാൻ നിരവധി പുസ്തകങ്ങളുണ്ടെന്നും രാജ്യത്ത് വായനാസംസ്കാരം ശക്തമായി നിലനിൽക്കുന്നുവെന്നും അവർ ചൂണ്ടിക്കാട്ടി.

എഴുത്തുകാരാകാൻ ആഗ്രഹിക്കുന്നവർ ആശയങ്ങൾ മനസ്സിൽ സൂക്ഷിക്കുന്നതിനു പകരം എഴുതി തുടങ്ങണമെന്നും എഴുതി പൂർത്തിയാക്കിയ ശേഷമേ തിരുത്തലുകൾ സാധ്യമാകൂ എന്നും സൈഗാൾ ഉപദേശിച്ചു. ആറക്ക ശമ്പളമുള്ള ജോലി ഉപേക്ഷിച്ചതിൽ ചിലപ്പോൾ പശ്ചാത്താപം തോന്നാറുണ്ടെങ്കിലും എഴുത്ത് നൽകുന്ന സംതൃപ്തിയും മനസ്സമാധാനവും അതിനേക്കാൾ വിലപ്പെട്ടതാണെന്നാണ് അവരുടെ വിലയിരുത്തൽ. ചില കലകൾ വെറുമൊരു തൊഴിൽമേഖലയല്ലെന്നും വ്യക്തിയെ നിരന്തരം മുന്നോട്ടുനയിക്കുന്ന ആന്തരികമായ ആഹ്വാനമാണെന്നും എഴുത്തുകാരിയുടെ അനുഭവം വ്യക്തമാക്കുന്നു.