ന്യൂഡൽഹി: റഷ്യൻ സൈന്യത്തിൽനിന്ന് നയതന്ത്ര ഇടപെടലിലൂടെ മോചിപ്പിച്ച് ഇന്ത്യയിൽ തിരിച്ചെത്തിച്ച ചിലർ വീണ്ടും റഷ്യൻ സൈന്യത്തിൽ ചേർന്നതായും പിന്നീട് അവരെക്കുറിച്ച് വിവരമില്ലാതായതായും കേന്ദ്രസർക്കാർ സുപ്രീം കോടതിയെ അറിയിച്ചു. സാമ്പത്തിക നേട്ടങ്ങൾ പ്രതീക്ഷിച്ച് ചില ഇന്ത്യക്കാർ സ്വമേധയാ റഷ്യൻ സൈന്യത്തിൽ ചേരുന്നുണ്ടെന്നും വിദേശകാര്യ മന്ത്രാലയം കോടതിയിൽ സമർപ്പിച്ച റിപ്പോർട്ടിൽ വ്യക്തമാക്കി.

റഷ്യൻ സൈന്യത്തിൽ കുടുങ്ങിയ ഇന്ത്യക്കാരുടെ സുരക്ഷ, മോചനം, നാട്ടിലേക്കുള്ള മടക്കം എന്നിവ സംബന്ധിച്ച ഹർജി പരിഗണിക്കവേയാണ് കേന്ദ്രം നിലപാട് അറിയിച്ചത്. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചിനു മുമ്പാകെ വിദേശകാര്യ മന്ത്രാലയത്തിന്റെ റിപ്പോർട്ട് അഡീഷണൽ സോളിസിറ്റർ ജനറൽ ഐശ്വര്യ ഭാട്ടി സമർപ്പിച്ചു.

താൽക്കാലിക സാമ്പത്തിക നേട്ടങ്ങൾ ലക്ഷ്യമിട്ട് വിനോദസഞ്ചാര, വിദ്യാർഥി, തൊഴിൽ വിസകളിൽ റഷ്യയിലെത്തുന്ന ചില ഇന്ത്യക്കാർ റഷ്യൻ സൈന്യത്തിൽ ചേരാൻ താൽപര്യം പ്രകടിപ്പിക്കുന്നതായി റിപ്പോർട്ടിൽ പറയുന്നു. പിന്നീട് ഇന്ത്യൻ സർക്കാരിന്റെ സഹായത്തോടെ സൈനിക സേവനത്തിൽനിന്ന് മോചനം നേടാമെന്ന പ്രതീക്ഷയിലാണ് ചിലർ ഇത്തരത്തിൽ തീരുമാനമെടുക്കുന്നതെന്നും സർക്കാർ ചൂണ്ടിക്കാട്ടി.

ഇന്ത്യൻ പൗരത്വം ഉപേക്ഷിച്ച് റഷ്യൻ പാസ്‌പോർട്ട് സ്വീകരിക്കാനും തുടർന്ന് റഷ്യൻ സൈന്യത്തിൽ ചേരാനും താൽപര്യം പ്രകടിപ്പിച്ച് ഇന്ത്യൻ എംബസിയെ സമീപിച്ചവരുമുണ്ടെന്ന് വിദേശകാര്യ മന്ത്രാലയം അറിയിച്ചു. നയതന്ത്ര ഇടപെടലിലൂടെ സൈനിക സേവനത്തിൽനിന്ന് മോചിപ്പിച്ച് നാട്ടിലെത്തിച്ച ചിലർ വീണ്ടും സൈന്യത്തിൽ ചേർന്നത് ആശങ്കാജനകമാണെന്നും അവരെ കണ്ടെത്താനുള്ള ശ്രമങ്ങൾ തുടരുകയാണെന്നും റിപ്പോർട്ടിൽ വ്യക്തമാക്കുന്നു.

റഷ്യൻ സൈന്യത്തിൽ ചേർന്ന ഇന്ത്യക്കാരുടെ എണ്ണം ഏകദേശം 267 ആണെന്നാണ് കേന്ദ്രത്തിന്റെ കണക്ക്. ഇവരിൽ 51 പേർ കൊല്ലപ്പെട്ടതായും 139 പേർ സൈനിക സേവനത്തിൽനിന്ന് മോചിതരായതായും സർക്കാർ അറിയിച്ചു. 77 പേരെക്കുറിച്ച് ഇപ്പോഴും വിവരമില്ല. കാണാതായവരിൽ ഏഴുപേരെ റഷ്യൻ അധികൃതർ കാണാതായതായി സ്ഥിരീകരിച്ചിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു.

റഷ്യൻ സൈന്യത്തിൽ കൊല്ലപ്പെട്ട ഇന്ത്യക്കാരുടെ കുടുംബങ്ങൾക്ക് നഷ്ടപരിഹാരം ലഭ്യമാക്കുന്നതിനുള്ള നടപടികളും സുപ്രീം കോടതി പരിഗണിച്ചു. മരിച്ച 51 പേരുടെയും കുടുംബങ്ങൾക്ക് നഷ്ടപരിഹാരം ആവശ്യപ്പെടാനുള്ള അവകാശമുണ്ടെന്ന് കോടതി നിരീക്ഷിച്ചു. അർഹരായ കുടുംബങ്ങൾക്ക് സഹായം ലഭ്യമാക്കുന്നതിനായി പൊതുഅറിയിപ്പ് പുറപ്പെടുവിക്കുന്ന കാര്യം പരിഗണിക്കാൻ വിദേശകാര്യ മന്ത്രാലയത്തോട് കോടതി നിർദേശിച്ചു.

നഷ്ടപരിഹാര അപേക്ഷകളിൽ റഷ്യൻ സർക്കാർ ഇതുവരെ ആറു കേസുകൾ പ്രോസസ് ചെയ്തതായും അഞ്ചെണ്ണത്തിൽ പൂർണമായും ഒന്നിൽ ഭാഗികമായും നഷ്ടപരിഹാരം അനുവദിച്ചതായും കേന്ദ്രം കോടതിയെ അറിയിച്ചു. മൃതദേഹങ്ങൾ തിരിച്ചറിയുന്നതിനുള്ള ഡിഎൻഎ പരിശോധന, ഭൗതികാവശിഷ്ടങ്ങൾ നാട്ടിലെത്തിക്കൽ, കുടുംബങ്ങൾക്ക് നിയമസഹായം ലഭ്യമാക്കൽ തുടങ്ങിയ വിഷയങ്ങളും കോടതിയുടെ പരിഗണനയിലുണ്ട്.

റഷ്യയിൽ ജോലി വാഗ്ദാനം ചെയ്ത് ഇന്ത്യക്കാരെ സൈന്യത്തിൽ എത്തിച്ചെന്ന ആരോപണത്തിൽ ഇടനിലക്കാർക്കെതിരെ നടപടിയെടുക്കണമെന്ന ആവശ്യവും ഹർജിക്കാർ ഉന്നയിച്ചിട്ടുണ്ട്. 2024–25 കാലയളവിൽ ഹോട്ടൽ മേഖലയുൾപ്പെടെ വിവിധ ജോലികൾക്കായി റഷ്യയിലെത്തിയ ഇന്ത്യക്കാരിൽ ചിലർ യാത്രാ ഏജന്റുമാരുടെ വഞ്ചനയെ തുടർന്ന് യുദ്ധമേഖലകളിൽ എത്തപ്പെട്ടതായും പരാതികളുണ്ട്.

വിദേശത്ത് ജോലി തേടുന്ന ഇന്ത്യക്കാർ വ്യാജ വാഗ്ദാനങ്ങളിൽ വീഴരുതെന്നും വിദേശ സൈന്യങ്ങളിൽ ചേരുന്നതുമായി ബന്ധപ്പെട്ട അപകടസാധ്യതകൾ തിരിച്ചറിയണമെന്നും ഈ സംഭവങ്ങൾ വീണ്ടും മുന്നറിയിപ്പ് നൽകുന്നു.