ഫ്‌ലോറിഡ: മരണം ഉറപ്പാക്കാന്‍ വേണ്ടി സ്വന്തം സഹ തടവുകാരനെ കൊലപ്പെടുത്തിയ ജെയിംസ് റോബര്‍ട്ട്‌സണ്‍ (63) എന്ന തടവുകാരന്റെ വധശിക്ഷ ഒക്ടോബര് 13 ചൊവ്വാഴ്ച  ഫ്‌ലോറിഡയില്‍ നടപ്പാക്കി. ഫ്‌ലോറിഡ സ്റ്റേറ്റ് പ്രിസണില്‍ മാരകമായ വിഷാംശം അടങ്ങിയ മൂന്ന് മരുന്നുകള്‍ കുത്തിവെച്ചാണ് ശിക്ഷ നടപ്പാക്കിയത്. മരണകരമായ ഇഞ്ചക്ഷന്‍ നല്‍കിത്തുടങ്ങി ഏകദേശം 10 മിനുട്ടിനുള്ളില്‍ അദ്ദേഹം  മരിച്ചതായി പ്രഖ്യാപിച്ചു.

ഫ്‌ലോറിഡ സംസ്ഥാനത്ത് ഈ വര്‍ഷം നടക്കുന്ന 17-ാമത്തെ വധശിക്ഷയാണിത്.

2008-ല്‍ ഉറങ്ങിക്കിടക്കുകയായിരുന്ന സഹ തടവുകാരന്‍ ഫ്രാങ്ക് ഹാര്‍ട്ടിനെ കഴുത്ത് ഞെരിച്ച് കൊലപ്പെടുത്തിയ കേസില്‍ റോബര്‍ട്ട്‌സണ്‍ കുറ്റക്കാരനാണെന്ന് തെളിഞ്ഞിരുന്നു. ജീവിതാവസാനം വരെ ജയിലില്‍ കഴിയുന്നതിനേക്കാള്‍ ഭേദം വധശിക്ഷയാണെന്ന് കരുതിയാണ് താന്‍ കൊലപാതകം നടത്തിയതെന്ന് ഇയാള്‍ അന്വേഷണ ഉദ്യോഗസ്ഥരോട് സമ്മതിച്ചിരുന്നു. ശിക്ഷാവിധിക്കെതിരെയുള്ള അപ്പീലുകളെല്ലാം ഇയാള്‍ പിന്‍വലിക്കുകയും ചെയ്തിരുന്നു.

വധശിക്ഷയ്ക്ക് തൊട്ടുമുമ്പ് അവസാനമായി എന്തെങ്കിലും പറയാനുണ്ടോ എന്ന് ചോദിച്ചപ്പോള്‍, 'വേണ്ട, എനിക്ക് കുഴപ്പമൊന്നുമില്ല' എന്നായിരുന്നു റോബര്‍ട്ട്‌സന്റെ മറുപടി.