ഫിലാഡെല്‍ഫിയ: വാരാന്ത്യത്തിലുണ്ടായ ക്രൂരമായ ആക്രമണത്തില്‍ പോലീസ് ഉദ്യോഗസ്ഥന്‍ കൊല്ലപ്പെട്ടു. വെസ്റ്റ് ഫിലാഡെല്‍ഫിയയില്‍ ശനിയാഴ്ച പുലര്‍ച്ചെയാണ് സംഭവം. ഫിലാഡെല്‍ഫിയ പോലീസ് ഡിപ്പാര്‍ട്ട്‌മെന്റിലെ ഉദ്യോഗസ്ഥനായ ഷെയ്ന്‍ സെയ്ബര്‍ (40) ആണ് കൊല്ലപ്പെട്ടത്. രണ്ടു   കുട്ടികളുടെ പിതാവാണ് അദ്ദേഹം.

വെസ്റ്റ് ഫിലാഡെല്‍ഫിയയിലെ ഒരു വരാന്തയില്‍ തോക്കുമായി ഒരാള്‍ നില്‍ക്കുന്നുവെന്ന വിവരത്തെത്തുടര്‍ന്നാണ് ഷെയ്ന്‍ സെയ്ബറും സഹപ്രവര്‍ത്തകനും സ്ഥലത്തെത്തിയത്. രാത്രി പന്ത്രണ്ട് മണിക്ക് ശേഷം ഈ വിലാസത്തിലേക്ക് പ്രവേശിച്ച ഇരുവരും അപ്രതീക്ഷിതമായ ഒരു പതിയിരിപ്പ് ആക്രമണത്തിന്  ഇരയാവുകയായിരുന്നു. മൂന്ന് തവണ വെടിയേറ്റ സെയ്ബര്‍, ഭാര്യയുടെയും കുടുംബത്തിന്റെയും സാന്നിധ്യത്തില്‍ ആശുപത്രിയില്‍ വെച്ചാണ് മരണത്തിന് കീഴടങ്ങിയത്. അദ്ദേഹത്തിന് 3 വയസ്സുള്ള മകളും  7 വയസ്സുള്ള മകനുമുണ്ട്.

അപകടത്തില്‍ സെയ്ബറിനൊപ്പമുണ്ടായിരുന്ന സഹപ്രവര്‍ത്തകന്  12 തവണ വെടിയേറ്റു. നിലവില്‍ അദ്ദേഹം അപകടനില തരണം ചെയ്‌തെങ്കിലും പൂര്‍ണ്ണമായി സുരക്ഷിതനായിട്ടില്ലെന്ന് പോലീസ് കമ്മീഷണര്‍ കെവിന്‍ ബെഥേല്‍ വാര്‍ത്താസമ്മേളനത്തില്‍ അറിയിച്ചു. ഈ കൊലപാതകത്തെ ക്രൂരവും അര്‍ത്ഥശൂന്യവും ഭീകരവുമായ കൃത്യമെന്നാണ് അദ്ദേഹം വിശേഷിപ്പിച്ചത്.

ആക്രമണത്തിന് ശേഷം ഒളിത്താവളത്തിലേക്ക് രക്ഷപ്പെടാന്‍ ശ്രമിച്ച പ്രതി, സ്ഥലത്തെത്തിയ മറ്റ് ഒമ്പത് പോലീസ് ഉദ്യോഗസ്ഥര്‍ക്ക് നേരെയും വെടിയുതിര്‍ത്തു. ഭാഗ്യവശാല്‍ ആര്‍ക്കും പരിക്കേറ്റിട്ടില്ല. തുടര്‍ന്ന് മണിക്കൂറുകള്‍ നീണ്ട തെരച്ചിലിനൊടുവില്‍ മരത്തിന് മുകളില്‍ ഒളിച്ചിരിക്കുകയായിരുന്ന 35 കാരനായ എറിക് ലൂയിസിനെ പോലീസ് പിടികൂടി. കൊലപാതകവും പത്ത് വധശ്രമങ്ങളും ഉള്‍പ്പെടെ ഏകദേശം 80-ഓളം കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നതെന്ന് ജില്ലാ അറ്റോര്‍ണി ലാറി ക്രാസ്‌നര്‍ അറിയിച്ചു.