ഹോർമുസ് കടലിടുക്ക് തുറക്കാൻ ഇറാൻ മുന്നോട്ടു വച്ച ഏഴു വ്യവസ്ഥകളിൽ ചിലതു യുഎസ് സ്വീകരിച്ചെന്നു സുപ്രീം നാഷനൽ സെക്യൂരിറ്റി കൗൺസിൽ സെക്രട്ടറി മുഹ്‌സിൻ റസായി പറഞ്ഞു. എന്നാൽ യുഎസ് പ്രതികരണം 'അപര്യാപ്തം' ആണെന്ന് അദ്ദേഹം വാദിച്ചു.  

"ഇറാന്റെ നയതന്ത്രം മാറിയിട്ടുണ്ട്, പഴയ അവസ്ഥയിലേക്കു ഞങ്ങൾ തിരിച്ചു പോകില്ല," അദ്ദേഹം എക്‌സിൽ കുറിച്ചു. ഖത്തർ വഴിയാണ് കഴിഞ്ഞ മാസം ഇറാൻ വ്യവസ്ഥകൾ വച്ചത്.

ഖത്തറിന്റെ 'അൽ ജസീറ' റിപ്പോർട്ട് ചെയ്യുന്നത് എല്ലാ യുദ്ധങ്ങളും നിർത്തണമെന്നു ഇറാൻ ആവശ്യപ്പെട്ടു എന്നാണ്. ലെബനനിൽ ഇസ്രയേൽ നടത്തുന്ന ആക്രമണങ്ങളും അതിൽ ഉൾപ്പെടുന്നു. ഗാസയും വെസ്റ്റ്  ബാങ്കും ഒഴിവല്ല.  

ഇറാന്റെ മരവിപ്പിച്ച ആസ്തികൾ വിട്ടു കൊടുക്കണം എന്നതാണ് മറ്റൊരു പ്രധാന ആവശ്യം.

ജൂണിൽ ഒപ്പുവച്ച 14 ഇന ധാരണാപത്രത്തിന്റെ അടിസ്ഥാനത്തിലാണ് ഈ ഏഴു വ്യവസ്ഥകൾ വച്ചതെന്നു പാർലമെന്റ് സ്‌പീക്കർ മുഹമ്മദ് ബാഗർ ഗാലിബഫ് ഈ മാസം ആദ്യം പറഞ്ഞിരുന്നു.

യുഎസ് നാവിക ഉപരോധം അവസാനിപ്പിക്കണം എന്നതാണ് ഇറാന്റെ പ്രധാന ആവശ്യം. ഇറാൻ എണ്ണ വിൽക്കുന്നതിനുള്ള തടസവും നീക്കണം.

Iran claims US agreed to 'some of its seven conditions'