വാഷിങ്ടൺ: ഗ്രീൻ കാർഡ്, എച്ച്-1ബി വിസ പദ്ധതികൾ അമേരിക്കയുടെ സാമ്പത്തിക വളർച്ചയ്ക്കും സാങ്കേതിക നൂതനത്വത്തിനും ആഗോള മത്സരക്ഷമതയ്ക്കും നിർണായക സംഭാവന നൽകുന്നതായി യുഎസ്-ഇന്ത്യ സ്ട്രാറ്റജിക് പാർട്ണർഷിപ്പ് ഫോറം (യുഎസ്ഐഎസ്പിഎഫ്). നിയമപരമായ കുടിയേറ്റ സംവിധാനങ്ങളിൽ ട്രംപ് ഭരണകൂടം പരിശോധനകൾ കർശനമാക്കുന്ന സാഹചര്യത്തിലാണ് സംഘടനയുടെ പ്രതികരണം.

2022-ലെ യുഎസ് സെൻസസ് ബ്യൂറോ വിവരങ്ങളെ അടിസ്ഥാനമാക്കിയുള്ള വിശകലനമനുസരിച്ച്, ഈ കുടിയേറ്റ മാർഗങ്ങളിലൂടെ എത്തിയവർക്ക് ആകെ 2.1 ട്രില്യൺ ഡോളറിന്റെ കുടുംബവരുമാനം ലഭിച്ചതായി സംഘടന വ്യക്തമാക്കി. ഇവർ ഫെഡറൽ നികുതിയായി 382.9 ബില്യൺ ഡോളറും സംസ്ഥാന, പ്രാദേശിക നികുതികളായി 196.3 ബില്യൺ ഡോളറും അടച്ചതായും പ്രസ്താവനയിൽ പറയുന്നു. ഇവരുടെ മൊത്തം ചെലവഴിക്കൽ ശേഷി 1.6 ട്രില്യൺ ഡോളറാണ്.

കുടിയേറ്റ പദ്ധതികളിലെ തട്ടിപ്പുകളും ദുരുപയോഗവും തടയാനുള്ള ഭരണകൂടത്തിന്റെ ശ്രമങ്ങളെ പിന്തുണയ്ക്കുന്നതായി യുഎസ്ഐഎസ്പിഎഫ് വ്യക്തമാക്കി. എന്നാൽ, ഇത്തരം നടപടികൾ അമേരിക്കയുടെ സാമ്പത്തിക വളർച്ചയിൽ കുടിയേറ്റക്കാർ വഹിക്കുന്ന പങ്ക് അവഗണിക്കുന്നതാകരുതെന്നും സംഘടന ചൂണ്ടിക്കാട്ടി.

അമേരിക്കൻ ജനസംഖ്യയുടെ 1.5 ശതമാനം മാത്രമുള്ള ഇന്ത്യൻ വംശജർ രാജ്യത്തിന്റെ മൊത്ത ആഭ്യന്തര ഉൽപാദനത്തിൽ ആറു ശതമാനം സംഭാവന ചെയ്യുന്നുണ്ടെന്നാണ് സംഘടനയുടെ കണക്ക്. സംരംഭകത്വം, ശാസ്ത്രം, സാങ്കേതികവിദ്യ തുടങ്ങിയ മേഖലകളിൽ ഇന്ത്യൻ വംശജർ നിർണായക പങ്കുവഹിക്കുന്നതായും പ്രസ്താവനയിൽ പറയുന്നു. 2024-ൽ അമേരിക്കയിലെ 648 യൂണികോൺ കമ്പനികളിൽ 72 എണ്ണത്തിന്റെ സഹസ്ഥാപകർ ഇന്ത്യൻ വംശജരായിരുന്നുവെന്നും സംഘടന വ്യക്തമാക്കി.

അടുത്തിടെ വൈറ്റ് ഹൗസിൽ പ്രസിഡന്റ് ഡോണൾഡ് ട്രംപ് ആറ് പ്രമുഖ കണ്ടുപിടിത്തക്കാർക്ക് നാഷണൽ മെഡൽ ഓഫ് സയൻസ്, നാഷണൽ മെഡൽ ഓഫ് ടെക്നോളജി ആൻഡ് ഇന്നൊവേഷൻ പുരസ്കാരങ്ങൾ സമ്മാനിച്ച ചടങ്ങും സംഘടന ചൂണ്ടിക്കാട്ടി. പുരസ്കാരം നേടിയ ആറുപേരിൽ അഞ്ചുപേരും അമേരിക്കയ്ക്ക് പുറത്ത് ജനിച്ചവരാണെന്ന് യുഎസ്ഐഎസ്പിഎഫ് പറഞ്ഞു. ആഗോള പ്രതിഭകളുടെ സംഭാവന അമേരിക്കയുടെ ശാസ്ത്ര-സാങ്കേതിക മുന്നേറ്റത്തിൽ എത്രത്തോളം പ്രധാനമാണെന്ന് ഇത് വ്യക്തമാക്കുന്നതായും സംഘടന വിലയിരുത്തി.

പ്രത്യേക വൈദഗ്ധ്യം ആവശ്യമായ തൊഴിലുകളിൽ വിദേശ പ്രൊഫഷണലുകളെ നിയമിക്കാൻ അമേരിക്കൻ തൊഴിലുടമകളെ അനുവദിക്കുന്നതാണ് എച്ച്-1ബി വിസ പദ്ധതി. അമേരിക്കയിൽ സ്ഥിരതാമസത്തിനുള്ള നിയമപരമായ അനുമതിയാണ് ഗ്രീൻ കാർഡ്. ഇവ രണ്ടും ഇന്ത്യൻ പ്രൊഫഷണലുകൾ ഉൾപ്പെടെയുള്ള വിദേശ തൊഴിലാളികൾക്ക് അമേരിക്കയിൽ തൊഴിൽജീവിതം കെട്ടിപ്പടുക്കുന്നതിനുള്ള പ്രധാന മാർഗങ്ങളാണ്.