തിരഞ്ഞെടുപ്പ് കമ്മീഷനെതിരായ പ്രതിഷേധങ്ങൾ ശക്തമാകുന്നതിനിടെ രാജ്യത്തെ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ സുരക്ഷ കൂടുതൽ കർശനമാക്കിയെന്ന വാർത്തയാണ് ഇപ്പോൾ ശ്രദ്ധ നേടുന്നത്. വോട്ട് മോഷണ ആരോപണങ്ങളും വോട്ടർ പട്ടികയിലെ ക്രമക്കേടുകളെച്ചൊല്ലിയുള്ള വിവാദങ്ങളും തുടരുന്നതിനിടെ, ഗ്യാനേഷ് കുമാറിന്റെ ഡൽഹിയിലെ ഔദ്യോഗിക വസതിക്ക് മുന്നിലും ആഗ്രയിലെ കുടുംബവീടിന് സമീപവും പ്രതിഷേധങ്ങൾ നടന്നതായാണ് റിപ്പോർട്ട്. ഇതോടെയാണ് സുരക്ഷാ ഏജൻസികൾ കൂടുതൽ ജാഗ്രത പുലർത്താൻ തീരുമാനിച്ചതെന്ന് ദേശീയ മാധ്യമമായ ന്യൂസ് 18 റിപ്പോർട്ട് ചെയ്യുന്നു.

ഇതിനിടെ, ഒക്ടോബർ 10ന് ഡൽഹിയിൽ വലിയ പ്രതിഷേധത്തിന് ആഹ്വാനം ചെയ്തിരിക്കുന്നതും ആശങ്ക വർധിപ്പിക്കുകയാണ്. പ്രതിഷേധങ്ങൾ കൂടുതൽ ശക്തമാകുമോ? ഗ്യാനേഷ് കുമാറിന്റെ സുരക്ഷയിൽ എന്തൊക്കെ മാറ്റങ്ങളാണ് വരുത്തിയത്? ഈ ചോദ്യങ്ങളാണ് ഇപ്പോൾ ഉയരുന്നത്.

ഡൽഹിയിലെ ന്യൂ മോത്തി ബാഗിലുള്ള ഗ്യാനേഷ് കുമാറിന്റെ ഔദ്യോഗിക വസതിക്ക് സമീപം പ്രതിഷേധക്കാർ പ്രകടനം നടത്തിയതായാണ് റിപ്പോർട്ട്. ആഗ്രയിൽ അദ്ദേഹത്തിന്റെ മാതാപിതാക്കൾ താമസിക്കുന്ന കുടുംബവീടിന് സമീപവും പ്രതിഷേധമുണ്ടായെന്നും വിവരങ്ങളുണ്ട്. ഈ സംഭവങ്ങളാണ് സുരക്ഷാ സംവിധാനങ്ങൾ കൂടുതൽ ശക്തമാക്കാനുള്ള തീരുമാനത്തിന് കാരണമായതെന്നാണ് റിപ്പോർട്ടിലെ വിശദീകരണം.
വോട്ടർ പട്ടികയുടെ പ്രത്യേക തീവ്ര പരിഷ്കരണമായ എസ്‌ഐആറിനെച്ചൊല്ലിയുള്ള വിവാദമാണ് പ്രതിഷേധങ്ങളുടെ പ്രധാന പശ്ചാത്തലം. വോട്ടർ പട്ടികയിൽ ക്രമക്കേടുകൾ നടക്കുന്നുവെന്നും തിരഞ്ഞെടുപ്പ് നടപടികളുടെ സുതാര്യത ഉറപ്പാക്കണമെന്നും ആവശ്യപ്പെട്ട് പ്രതിപക്ഷ നേതാക്കളും സംഘടനകളും രംഗത്തുണ്ട്