വാഷിങ്ടൺ: ശാസ്ത്ര ഗവേഷണം ശക്തിപ്പെടുത്തുന്നതിനും ബഹിരാകാശ പര്യവേക്ഷണത്തിൽ നൂതന സാങ്കേതികവിദ്യകളുടെ ഉപയോഗം വർധിപ്പിക്കുന്നതിനുമായി രണ്ട് പുതിയ പദ്ധതികൾ പ്രഖ്യാപിച്ച് അമേരിക്കൻ ബഹിരാകാശ ഏജൻസിയായ നാസ. വാഷിങ്ടണിൽ വ്യാഴാഴ്ച നടന്ന വൈറ്റ് ഹൗസ് ശാസ്ത്ര സാങ്കേതിക നയ കാര്യാലയത്തിന്റെ ‘ഗോൾഡൻ ഏജ് ഉച്ചകോടി’യോടനുബന്ധിച്ചാണ് പ്രഖ്യാപനം.

നാസയുടെ ശാസ്ത്രീയ ഗവേഷണരീതികൾ കൂടുതൽ സുതാര്യവും കാര്യക്ഷമവുമാക്കുന്നതിനുള്ള പദ്ധതിയും ഗവേഷകർക്കായി ജെനസിസ് മിഷൻ ഫെലോഷിപ്പ് ആരംഭിക്കുന്നതുമാണ് പ്രധാന പ്രഖ്യാപനങ്ങൾ.

ഗവേഷണ പദ്ധതികൾ വിലയിരുത്തുന്നതിൽ പക്ഷപാതം കുറയ്ക്കുന്നതിനായി ഇരട്ട അജ്ഞാത അവലോകന രീതി (ഡ്യുവൽ അനോണിമസ് പിയർ റിവ്യൂ) നാസ കൂടുതൽ വിപുലീകരിക്കും. ഈ രീതിയിൽ ഗവേഷകരുടെയും വിലയിരുത്തുന്നവരുടെയും വ്യക്തിവിവരങ്ങൾ മറച്ചുവെച്ച് ശാസ്ത്രീയ മികവിന്റെ അടിസ്ഥാനത്തിൽ മാത്രം നിർദേശങ്ങൾ വിലയിരുത്താനാകും. നൂതനവും പരമ്പരാഗത രീതികളിൽനിന്ന് വ്യത്യസ്തവുമായ ഗവേഷണ ആശയങ്ങൾക്ക് കൂടുതൽ അവസരം നൽകുകയാണ് ലക്ഷ്യം.

സൂപ്പർ ഇന്റലിജൻസ് (എസ്ഐ), ശാസ്ത്രം അല്ലെങ്കിൽ എൻജിനീയറിങ് എന്നീ മേഖലകളിൽ സംയോജിത വൈദഗ്ധ്യമുള്ള ഡോക്ടറൽ ഗവേഷകരിൽനിന്ന് 10 പേരെ ജെനസിസ് മിഷൻ ഫെലോഷിപ്പിനായി തിരഞ്ഞെടുക്കും. നാസയുടെ വിവിധ ദൗത്യങ്ങളുമായി ബന്ധപ്പെട്ട് പ്രവർത്തിക്കുന്ന ഇവർ ഏജൻസിയുടെ ഗവേഷണശാലകളിൽ പഠനവും ഗവേഷണവും നടത്തും. ശാസ്ത്രീയ കണ്ടെത്തലുകൾക്ക് സൂപ്പർ ഇന്റലിജൻസ് സാങ്കേതികവിദ്യകൾ പ്രയോജനപ്പെടുത്തുന്നതിന് പ്രാധാന്യം നൽകും.

നാസ അഡ്മിനിസ്ട്രേറ്റർ ജാരെഡ് ഐസക്മാനും വൈറ്റ് ഹൗസ് ശാസ്ത്ര സാങ്കേതിക നയ കാര്യാലയ ഡയറക്ടർ മൈക്കൽ ക്രാറ്റ്സിയോസും ഉച്ചകോടിയിൽ പുതിയ പദ്ധതികളെക്കുറിച്ച് ചർച്ച ചെയ്യും.

ശാസ്ത്ര ഗവേഷണത്തിലെ മികച്ച ആശയങ്ങൾ കണ്ടെത്തുന്നതിനും അടുത്ത തലമുറ ഗവേഷകരെ വളർത്തിയെടുക്കുന്നതിനും പുതിയ പദ്ധതികൾ സഹായിക്കുമെന്ന് ഐസക്മാൻ പറഞ്ഞു. ശാസ്ത്രത്തിലും സാങ്കേതികവിദ്യയിലും അമേരിക്കയുടെ നവീകരണവും കണ്ടെത്തലുകളും പ്രോത്സാഹിപ്പിക്കുന്നതിനുള്ള ശ്രമങ്ങളുടെ ഭാഗമായാണ് പദ്ധതികൾ നടപ്പാക്കുന്നതെന്നും നാസ വ്യക്തമാക്കി.