അക്ഷരങ്ങളെ സ്‌നേഹിച്ച് ജീവിതാനുഭവങ്ങളെ ചേർത്തു പിടിച്ച് സർഗാത്മകമായ യാത്രയിലൂടെ ഇരുപത്തി അഞ്ച് പുസ്‌തകങ്ങളുടെ നിറവിലെത്തിയിരിക്കുകയാണ് മിനി സുരേഷ് . ഒരു എഴുത്തുകാരിയുടെ വളർച്ചയുടെയും ആത്മ സമർപ്പണത്തിൻ്റെയും അടയാളമാണ് ഈ ഇരുപത്തിഅഞ്ച് പുസ്‌തകങ്ങൾ. പുസ്‌തകങ്ങളുടെ എണ്ണം മാത്രമല്ല രചനകളുടെ വൈവിധ്യമാണ് മിനിയുടെ സർഗാത്മക സഞ്ചാരത്തെ ശ്രദ്ധേയമാക്കുന്നത്. 

അഞ്ച് കഥാ സമാഹാരങ്ങൾ ,ആറ്  ബാലകഥാ സമാഹാരങ്ങൾ, ഏഴ് കവിതാ സമാഹാരങ്ങൾ  , ഏഴ് ലേഖന സമാഹാരങ്ങൾ എന്നിങ്ങനെ നാല് വ്യത്യസ്ത ശാഖകളിലായി വ്യാപിച്ചു കിടക്കുന്നതാണ് മിനി സുരേഷിൻ്റെ പുസ്‌തകങ്ങളുടെ ലോകം. 

 മനുഷ്യരെയും അവരുടെ ബന്ധങ്ങളെയും സംഘർഷങ്ങളെയും  സ്വപ്‌നങ്ങളെയും കഥകളാക്കി മാറ്റുമ്പോൾ എഴുത്തുകാരിയുടെ സൂക്ഷ്‌മ നിരീക്ഷണം ബാരാത് , ഒറ്റമരം, ത്രികോണം, നൊമ്പരച്ചിന്തുകൾ, മറവിയുടെ മഴക്കാലം എന്നീ കഥാസമാഹാരങ്ങളിൽ കാണാം .

ചിന്തകളുടെ ആഴവും സാമൂഹികവും മാനുഷികവുമായ വിഷയങ്ങളുടെ തെളിച്ചവും  നീരുറവകൾ , കാലം മറക്കാത്ത മണിനാദങ്ങൾ, നാണയങ്ങൾ, അക്ഷരമാനുഷം , ഓർമ്മയുടെ ജാലകങ്ങൾ തുടങ്ങിയ ലേഖന സമാഹാരങ്ങളിലും ലളിതമായ വാക്കുകളിലൂടെ വായനക്കാരൻ്റെ മനസ്സിൽ ഇടം തേടുന്ന അനുഭൂതികൾ കരുത്ത് പകരുന്ന സരസ്വതി വന്ദനം , മൗനത്തിൻ വല്മീകങ്ങൾ, മഴനൂൽപ്പട്ടങ്ങൾ , നേരിൻ്റെ ഉൾക്കാഴ്ചകൾ എന്നീ കവിതാ സമാഹാരങ്ങളിലും ദർശിക്കാം . ബാലകഥാസമാഹാരങ്ങളായ  കിളിക്കൂട്, ബില്ലി ആന, മുത്തശ്ശിക്കഥകൾ , പമ്പരങ്ങൾ, ഐസ് ക്രീം , മാജിക് ക്യാമറ എന്നിവ കുട്ടികളുടെ മനസ്സിലേക്കുള്ള സ്‌നേഹപൂർവമായ മിനിയുടെ യാത്രയാണ് .

 കുട്ടികളുടെ ഭാവനയും കൗതുകവും നിഷ്‌കളങ്കതയും മനസ്സിലാക്കി അവർക്കായി കഥകളൊരുക്കുന്നത് വേറിട്ടൊരു സർഗശേഷി ആവശ്യപ്പെടുന്ന കാര്യമാണ് . ഇരുപത്തി അഞ്ചിൻ്റെ നിറവിൽ നിൽക്കുമ്പോഴും മിനിയുടെ സാഹിത്യ സഞ്ചാരം അവസാനിക്കുന്നില്ല. പുതിയ ചിന്തകൾക്കും പുതിയ തലമുറയിലെ വായനക്കാർക്കുമായി രചനകൾ ഇനിയും പിറക്കാനുണ്ട്.