ന്യൂയോർക്ക്: സാമൂഹിക - രാഷ്ട്രീയ പ്രവർത്തകനായ കോശി ഒ. തോമസിന്റെ ജന്മദിനത്തോടനുബന്ധിച്ച് ന്യൂയോർക്കിലെ സാന്തൂർ റെസ്റ്റോറന്റിൽ സാമൂഹിക നേതാക്കളും ദീർഘകാല സുഹൃത്തുക്കളും അഭ്യുദയകാംക്ഷികളും ഒത്തുചേർന്നു. സൗഹൃദത്തിന്റെയും സമാധാനത്തിന്റെയും ഐക്യത്തിന്റെയും ഒത്തൊരുമയുടെയും സന്ദേശം ഉയർത്തിപ്പിടിച്ചായിരുന്നു സംഗമം.

അദ്ദേഹത്തിന്റെ  ദീർഘകാല സുഹൃത്തുക്കളെ ഒരുമിച്ചുകൂട്ടി സംഗമത്തിന് നേതൃത്വം നൽകിയത് രാജു വർഗീസ് എബ്രഹാമും വി.എം. ചാക്കോയുമാണ്.

സുഹൃത്തുക്കളെ ഒരുമിച്ചുകൂട്ടിയതിന് രാജു വർഗീസ് എബ്രഹാമിനും വി.എം. ചാക്കോയ്ക്കും കോശി നന്ദി പറഞ്ഞു. ഇത്തരം കൂടിച്ചേരലുകൾ വിവിധ മേഖലകളിലുള്ളവർക്ക് പരസ്പരം കാണാനും ആശയങ്ങൾ പങ്കുവയ്ക്കാനും ബന്ധങ്ങൾ കൂടുതൽ ശക്തിപ്പെടുത്താനും അവസരമൊരുക്കുന്നുവെന്ന് അദ്ദേഹം പറഞ്ഞു. സമൂഹത്തിന്റെ പുരോഗതിക്കായി എല്ലാവരും തുടർന്നും ഒരുമിച്ച് പ്രവർത്തിക്കുമെന്ന പ്രതീക്ഷയും അദ്ദേഹം പ്രകടിപ്പിച്ചു.

ജീവിതാനുഭവങ്ങളിൽ നിന്ന് താൻ പഠിച്ച ഏറ്റവും വിലപ്പെട്ട പാഠങ്ങളിലൊന്ന് സംയമനത്തിന്റെ പ്രാധാന്യമാണെന്ന് കോശി പറഞ്ഞു.

‘കോപത്തിലായിരിക്കുമ്പോൾ ഉടൻ തീരുമാനമെടുക്കുന്നത് ഒരിക്കലും ബുദ്ധിപരമല്ല. അൽപ്പസമയം കാത്തിരുന്നാൽ പല കാര്യങ്ങളും ശാന്തമാകും. അപ്പോൾ കാര്യങ്ങൾ കൂടുതൽ വ്യക്തമായി കാണാനും ശരിയായ തീരുമാനം എടുക്കാനും കഴിയും. സംയമനം പാലിക്കുന്നത് ജീവിതത്തിൽ ഏറെ സഹായിച്ചിട്ടുണ്ട്,’ അദ്ദേഹം പറഞ്ഞു.

പ്രതികരിക്കുന്നതിന് പകരം ചിന്തിച്ച് തീരുമാനമെടുക്കുക എന്നത് തന്റെ ജീവിതത്തിലെ പ്രധാന തത്വമായി തുടരുന്നുവെന്നും അദ്ദേഹം അഭിപ്രായപ്പെട്ടു.

കോശി ഒ. തോമസിനെ ‘കാഴ്ചപ്പാടും സത്യസന്ധതയും കഠിനാധ്വാനം ചെയ്യാൻ മനസ്സുമുള്ള  വ്യക്തി’ എന്നാണ് സുഭാഷ് കപാഡിയ വിശേഷിപ്പിച്ചത്. സമൂഹത്തിന് അദ്ദേഹം നൽകിയ സംഭാവനകളെയും സുഭാഷ് അഭിനന്ദിച്ചു.

ഹേമന്ത് ഷാ, ഡോ. ഹരി ശുക്ല, അശോക് ജെയിൻ, ജോർജ് എബ്രഹാം, വിനോദ് പട്ടേൽ, അലക്സ് എസ്തപ്പൻ, ഡിൻസിൽ ജോർജ്, രവി എസ്., ലോണ ജോർജ്, വനിത രവി, ഉജ്വല മോസസ്, ഉഷ ജോർജ്, ജോർജ് പറമ്പിൽ, ജോർജ് ചാക്കോ, തങ്കമ്മ എബ്രഹാം, ഡോ. ലിസി ചാക്കോ, ഏലിയാമ്മ അപ്പുക്കുട്ടൻ, വി.എം. ചാക്കോ, രാജു വർഗീസ് എബ്രഹാം, ഷാജി എണ്ണശ്ശേരിൽ, ഫർഹാദ് ഹസാരി എന്നിവരുൾപ്പെടെയുള്ള ദീർഘകാല സുഹൃത്തുക്കളും സഹപ്രവർത്തകരും സംഗമത്തിൽ പങ്കെടുത്തു.

കോശിയുടെ നേതൃത്വപാടവം, സ്ഥിരോത്സാഹം, ദീർഘകാലത്തെ സാമൂഹിക സേവനം എന്നിവയെക്കുറിച്ച് നിരവധി പേർ സംസാരിച്ചു. അഭിപ്രായവ്യത്യാസങ്ങൾ ഉണ്ടായിരുന്നപ്പോഴും പരസ്പര ബഹുമാനവും സൗഹൃദവും നിലനിർത്താൻ കഴിഞ്ഞത് അദ്ദേഹത്തിന്റെ ബന്ധങ്ങളുടെ പ്രത്യേകതയാണെന്നും സുഹൃത്തുക്കൾ പറഞ്ഞു.

മൂന്ന് പതിറ്റാണ്ടിലേറെയായി ന്യൂയോർക്കിലെ ഇന്ത്യൻ-അമേരിക്കൻ സമൂഹത്തിന്റെ സാമൂഹിക, സാംസ്കാരിക, സംഘടനാ മേഖലകളിൽ കോശി സജീവമാണ്.

ഫ്ലോറൽ പാർക്ക് ബെൽറോസ് ഇന്ത്യൻ മർച്ചന്റ്സ് അസോസിയേഷന്റെ രൂപീകരണത്തിലും പ്രവർത്തനങ്ങളിലും അദ്ദേഹം നേതൃനിരയിൽ ഉണ്ടായിരുന്നു. നിലവിൽ സംഘടനയുടെ ചെയർമാനാണ്. ക്വീൻസ്, ന്യൂയോർക്ക് ഇന്ത്യ ഡേ പരേഡിലും നിരവധി സാമൂഹിക സംരംഭങ്ങളിലും അദ്ദേഹം സജീവമായി പ്രവർത്തിച്ചിട്ടുണ്ട്.

കേരളത്തിൽ ജനിച്ച കോശി തന്റെ ബാല്യത്തിന്റെയും വിദ്യാഭ്യാസ കാലഘട്ടത്തിന്റെയും വലിയൊരു ഭാഗം  ചെന്നൈയിൽ, ചെലവഴിച്ചു. നിയമപഠന പശ്ചാത്തലവും പൊതുപ്രവർത്തനത്തോടുള്ള താൽപര്യവുമുള്ള അദ്ദേഹം 1993ൽ അമേരിക്കയിലെത്തി. തുടർന്ന് ന്യൂയോർക്കിലെ സാമൂഹിക, പൊതുപ്രവർത്തന രംഗങ്ങളിൽ സജീവമായി. 2021ൽ ന്യൂയോർക്ക് സിറ്റി കൗൺസിലിലേക്കുള്ള ഡെമോക്രാറ്റിക് പ്രൈമറിയിൽ മത്സരിക്കുകയും ചെയ്തു.

‘എവിടേക്ക് താമസം മാറിയാലും നിങ്ങളുടെ മൂല്യങ്ങളിൽ മാറ്റം വരരുത്,’ തന്റെ ജീവിതത്തെ നയിച്ച തത്വം വിശദീകരിച്ചുകൊണ്ട് കോശി പറഞ്ഞു.

‘സമൂഹത്തെ സേവിക്കുന്നതാണ്  യഥാർത്ഥമായ ആരാധന’ എന്ന വിശ്വാസവും തന്റെ സാമൂഹിക പ്രവർത്തനങ്ങൾക്ക് പ്രചോദനമാണെന്ന് അദ്ദേഹം കൂട്ടിച്ചേർത്തു.

ഒരു വ്യക്തിയുടെ ജന്മദിനം ആഘോഷിക്കുന്നതിലുപരി, ദീർഘകാല സൗഹൃദങ്ങൾ പുതുക്കാനും അഭിപ്രായവ്യത്യാസങ്ങൾക്കിടയിലും ഐക്യം ഊട്ടിയുറപ്പിക്കാനും വർഷങ്ങളായുള്ള ജീവിത-സാമൂഹിക പ്രവർത്തനാനുഭവങ്ങളിൽനിന്നുള്ള പാഠങ്ങൾ പങ്കുവയ്ക്കാനുമുള്ള അവസരമായി ഈ ഒത്തുചേരൽ  മാറി.