സാഹിത്യത്തിൽ  ഉടനീളം ആവിഷ്കരിക്കപ്പെട്ട, പ്രത്യാശ, നിരാശ, നന്മ, തിന്മ എന്നിവയെക്കുറിച്ചുള്ള ശക്തമായ രൂപകങ്ങളാണ് ഇരുളും വെളിച്ചവും. നിരാശ, പ്രതീക്ഷ, നന്മ, തിന്മ എന്നീ നാല് ആശയങ്ങൾ മനുഷ്യാനുഭവത്തിന്റെ അടിസ്ഥാന ഘടനയെ രൂപപ്പെടുത്തുന്നവയാണ്.

അമേരിക്കൻ മലയാളി എഴുത്തുകാരൻ ശ്രീ ജോൺ വേറ്റത്തിന്റെ പുതിയ ലേഖനസമാഹാരമാണ്  "ഇരുളും വെളിച്ചവും" എന്ന പുസ്തകം. പതിനെട്ട് ലേഖനങ്ങൾ അടങ്ങിയ  ഈ പുസ്തകത്തിൽ "ഇരുളും വെളിച്ചവും" എന്ന ശീർഷകം പേറുന്ന ഒരു ലേഖനമില്ല. പുസ്തകത്തിലെ ലേഖനങ്ങളുടെ പൊതുവായ ആശയങ്ങളെ ഉൾക്കൊള്ളിച്ചുകൊണ്ട് സംക്ഷിപ്തമായി  കൊടുത്ത പേരായിരിക്കും."ഇരുളും വെളിച്ചവും". ഇത് രണ്ടും ബന്ധപ്പെട്ടു കിടക്കുന്നു. ഒന്നിന്റെ സാന്നിധ്യമാണ് മറ്റേതിനെ തിരിച്ചറിയിക്കുന്നത്. ഒന്നില്ലെങ്കിൽ മറ്റൊന്നില്ല, രണ്ടും ഉള്ളതുകൊണ്ട് നമ്മൾ രണ്ടിന്റെയും വിലയറിയുന്നു. ഇത് മാറിക്കൊണ്ടിരിക്കും. ശാശ്വതമായ ഇരുട്ടോ പ്രകാശമോ ഇല്ല. ജീവിതത്തിലും ഇത് നമ്മൾ കാണുന്നു. ശ്രീ വേറ്റം തന്റെ പതിനെട്ട് ലേഖനങ്ങളിലൂടെ ഇത് വ്യക്തമാക്കുന്നു. ശ്രീ വേറ്റത്തിന്റെ മിക്ക രചനകളിലും ആത്മീയത കയറി വരുന്നത് കാണാം. ഇരുളും വെളിച്ചവും തിരഞ്ഞെടുത്തതിലും ഒരു പക്ഷെ ബൈബിൾ സ്വാധീനം ഉണ്ടാകാം.

(ഉൽപ്പത്തി 1:3-5) 3 വെളിച്ചം ഉണ്ടാകട്ടെ എന്നു ദൈവം കല്പിച്ചു; വെളിച്ചം ഉണ്ടായി.4 വെളിച്ചം നല്ലത് എന്നു ദൈവം കണ്ടു; ദൈവം വെളിച്ചവും ഇരുളും തമ്മിൽ വേർപിരിച്ചു.5 ദൈവം വെളിച്ചത്തിനു പകൽ എന്നും ഇരുളിനു രാത്രി എന്നും പേരിട്ടു. സന്ധ്യയായി ഉഷസ്സുമായി, ഒന്നാം ദിവസം. ദൈവം മനുഷ്യർക്ക് വേണ്ടി ഉണ്ടാക്കിയ സൗകര്യങ്ങൾ. ഈ പുസ്തകത്തിലെ ആദ്യലേഖനത്തിൽ ദൈവനീതിയും മനുഷ്യനിയമങ്ങളും എന്ന വിഷയമാണ് പ്രതിപാദിക്കുന്നത്. ദൈവനിയമങ്ങൾ മാറ്റമില്ലാതെ നിൽക്കുമ്പോൾ മനുഷ്യരുടെ നിയമങ്ങൾ ആവശ്യാനുസരണം ഭേദഗതി ചെയ്യപ്പെടുന്നു എന്ന് അദ്ദേഹം എഴുതുന്നു. ഇരുളും വെളിച്ചവും ദൈവത്തിന്റെ വരദാനമാണെന്ന വിശ്വാസം ഉറപ്പിക്കുന്നുമുണ്ട്.
ബെർട്രാൻഡ് ആർതർ വില്യം റസ്സൽ, ഒരു ഇംഗ്ലീഷ് തത്വചിന്തകനും യുക്തിശാസ്ത്രജ്ഞനും ഗണിതശാസ്ത്രജ്ഞനും സാമൂഹിക പരിഷ്കർത്താവുമായിരുന്നു. ഇരുപതാം നൂറ്റാണ്ടിലെ ഏറ്റവും സ്വാധീനമുള്ള തത്വചിന്തകരിലൊരാളായും വിശകലനാത്മക തത്വചിന്തയുടെ (analytic philosophy) ഉപജ്ഞാതാക്കളിലൊരാളായും ഇദ്ദേഹം കണക്കാക്കപ്പെടുന്നു. മനുഷ്യാവസ്ഥ,  പ്രപഞ്ചത്തിന്റെ നിസ്സംഗമായ ഉദാസീനത,  തത്ത്വചിന്തയുടെയും മനുഷ്യബന്ധങ്ങളുടെയും പങ്ക് എന്നിവയെ വിവരിക്കാൻ ബെർട്രാൻഡ് റസ്സൽ വെളിച്ചത്തിന്റെയും ഇരുട്ടിന്റെയും രൂപകങ്ങൾ ഉപയോഗിച്ചിട്ടുണ്ട്. സങ്കീർണ്ണമായ ദാർശനിക പ്രശ്നങ്ങളെ ലളിതമായ ഭാഗങ്ങളായി വിഭജിച്ച് (വിശകലനം ചെയ്ത്) പഠിക്കുക എന്നതാണ് വിശകലനാത്മക തത്വചിന്ത. ശ്രീ വേറ്റവും ഈ രീതി തന്റെ ലേഖനങ്ങൾ തയ്യാറാക്കാൻ ഉപയോഗിച്ചതായി മനസ്സിലാക്കാം. പരമ്പരാഗത തത്ത്വചിന്തയിലെ ആത്മീയവും നിഗൂഢവുമായ ചിന്തകൾക്ക് പകരം ശാസ്ത്രീയവും യുക്തിസഹജവുമായ തെളിവുകൾക്ക് ഇതിൽ പ്രാധാന്യം നൽകുന്നു.

ചിന്തിപ്പിച്ചുകൊണ്ട് വായിപ്പിക്കുക എന്ന ശൈലിയാണ് ശ്രീ വേറ്റം ഈ പുസ്തകത്തിൽ  ഉപയോഗിക്കുന്നത്. ഇതിലെ ലേഖനങ്ങളുടെ ശീർഷകം മിക്കതും ഒരു ചോദ്യരൂപത്തിലാണ്. ഉദാഹരണം - മനുഷ്യൻ ദൈവസൃഷ്ടിയോ? മനുഷ്യഭാവി എങ്ങോട്ട്? പിതാവിന്റെ മതം മക്കൾ സ്വീകരിക്കണമോ?  വായനയുടെ എളുപ്പവഴികൾ? അങ്ങനെ തലക്കെട്ടോടെയുള്ള ഒരു ലേഖനം വായിക്കുമ്പോൾ വായനക്കാരന്റെ മനസ്സിലും അതിനുള്ള ഉത്തരങ്ങൾ ഉത്ഭവിക്കും. തന്മൂലം വളരെ ജിജ്ഞാസയോടെയായിരിക്കും വായന പുരോഗമിക്കുക. അതുകൊണ്ട് വായനക്കാരനും എഴുത്തുകാരനും തമ്മിൽ ഒരു സംവാദം അതുമൂലം രൂപപ്പെടുന്നു. എഴുത്തുകാരന് അദ്ദേഹത്തിന്റെ ആശയങ്ങളെ ബോധിപ്പിക്കാൻ കഴിയുന്നു.  മനുഷ്യൻ ദൈവസൃഷ്ടിയോ എന്ന ലേഖനത്തിൽ അതിനുള്ള മറുപടിയില്ല. ലേഖകന്റെ അറിവുകൾ പകർന്നു നൽകി വായനക്കാരനെ സ്വയം ചിന്തിപ്പിക്കുകയാണ്. ആത്മാവിനുമുണ്ടോ ജീവൻ എന്ന ലേഖനത്തിലും അതിനോടനുബന്ധിച്ചു നടക്കുന്ന അന്ധവിശ്വാസങ്ങളുടെ വിവരങ്ങൾ നൽകുന്നു. മരണശേഷം ആത്മാവുണ്ടെന്നു വിശ്വസിക്കുന്നവരോടും  ചോദ്യങ്ങൾ ചോദിക്കുന്നു ലേഖകൻ. എന്നാൽ അതിനെ നിഷേധിച്ച് പറയുന്നുമില്ല. നമുക്ക് ചുറ്റും  സംഭവിക്കുന്ന കാര്യങ്ങളുടെ നേർചിത്രങ്ങൾ പകർത്തി നമ്മെക്കൊണ്ട് തന്നെ ഒരു തീരുമാനത്തിൽ എത്തിപ്പിക്കുക. നേരത്തെ സൂചിപ്പിച്ചപോലെ ചിന്തിപ്പിച്ചുകൊണ്ട് വായിപ്പിക്കുക.

യുദ്ധങ്ങൾ അവസാനിക്കുമോ? എന്ന ലേഖനം വളരെയധികം നിർദേശങ്ങളും ആശയങ്ങളും നൽകിയതിന് ശേഷം യുദ്ധരഹിതമായ ഭാവി പുതുതലമുറ കെട്ടിപ്പടുക്കുമെന്ന ശുഭാപ്തി വിശ്വാസം നൽകുന്നുണ്ട്. കൂടാതെ ആത്മീയതയുടെ നിറവിൽ നിന്നും ബൈബിൾ ഉദ്ധരിക്കുന്നു. യെശയ്യാവ്‌ 2:4 "തങ്ങളുടെ വാളുകളെ കൊഴുക്കളായും കുന്തങ്ങളെ അരിവാളുകളായും അടിച്ചുണ്ടാക്കും;ജനത ജനതക്കുനേരെ വാളുയർത്തുകയില്ല ;അവർ ഇനിയും യുദ്ധം  അഭ്യസിക്കുകയില്ല.

മനുഷ്യജീവിതം, സമൂഹം, ധാർമ്മികത എന്നിവയിൽ വിമർശനാത്മകവും സ്വതന്ത്രവുമായ ചിന്തയും യുക്തിയും എങ്ങനെ പ്രയോഗിക്കാമെന്ന് ശ്രീ ജോൺ വേറ്റത്തിന്റെ ലേഖനങ്ങൾ വായനക്കാരെ പഠിപ്പിക്കുന്നു. ഒരു സിദ്ധാന്തം സ്ഥാപിക്കുകയല്ല അദ്ദേഹം ചെയ്യുന്നത് മറിച്ച് ഓരോ യുക്തിയും ശ്രദ്ധാപൂർവം വിശകലനം ചെയ്തു അവയെ സ്വീകാര്യമാക്കുക എന്ന ആശയത്തിലേക്ക് വായനക്കാരെ നയിക്കയാണ്‌ ചെയ്യുന്നത്.
മടുപ്പില്ലാതെ വളരെ രസകരമായി, വിടരുന്ന അറിവുകളുടെ ലോകത്തിലൂടെ വായിച്ചുപോകാവുന്ന ലേഖനങ്ങൾ. ഓരോ ലേഖനത്തിലും ലേഖകൻ വിതറിയിടുന്ന വിജ്ഞാനശകലങ്ങൾ അമൂല്യമാണ്. 
ശ്രീ ജോൺ വേറ്റത്തിന്റെ പുസ്തകം ധാരാളമായി വായിക്കപ്പെടട്ടെ. ഇതിന്റെ പ്രസാധനം നിർവഹിച്ചിരിക്കുന്നത് കലാപൂർണ്ണ പബ്ലിക്കേഷൻസ് ആണ്. കോപ്പികൾക്കായി അവരുമായി ഫോണിലോ ഇ-മെയിലിലോ ബന്ധപ്പെടാം ഫോൺ 0470 2610213 ഇ-മെയിൽ kalapoornna@gmail.com.

ശുഭം