കൊച്ചി: സ്വപ്നങ്ങളുമായി കടല്‍ കടന്നുപോയ മകള്‍... ജീവിതപങ്കാളിയെ വിട്ടുപിരിഞ്ഞ ഭാര്യ... രണ്ട് കുഞ്ഞുമക്കളുടെ പ്രിയപ്പെട്ട അമ്മ... ഒടുവില്‍ ജന്മനാട്ടിലേക്ക് മടങ്ങിയെത്തിയത് ചേതനയറ്റ ശരീരമായി. കാലിഫോര്‍ണിയയില്‍ ദാരുണമായി കൊല്ലപ്പെട്ട മലയാളി യുവതി ആന്‍ മേരി മാത്യുവിന് (35) ജന്മനാട് കണ്ണീരോടെ വിട നല്‍കി.

കാലിഫോര്‍ണിയയിലെ സാനോസെയില്‍ കൊല്ലപ്പെട്ട ആന്‍ മേരി മാത്യുവിന്റെ ഭൗതികശരീരം കോട്ടയം പള്ളം ബുക്കാന സെന്റ് ഇഗ്നേഷ്യസ് യാക്കോബായ സുറിയാനി പള്ളിയില്‍ (കല്ലൂപ്പറമ്പില്‍ പള്ളി) വന്‍ ജനാവലിയുടെ സാന്നിധ്യത്തില്‍ 12 മണിയോടെ സംസ്‌കരിച്ചു. അവസാനമായി ഒരുനോക്ക് കാണാനും അന്ത്യാഞ്ജലി അര്‍പ്പിക്കാനും ബന്ധുക്കളും സുഹൃത്തുക്കളും നാട്ടുകാരും ഒഴുകിയെത്തിയപ്പോള്‍ പള്ളിയും പരിസരവും കണ്ണീരിന്റെ കടലായി.

കാരിത്താസ് ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം രാവിലെ ഒമ്പതോടെ ചിങ്ങവനത്തിനടുത്ത് കുറിച്ചിയിലുള്ള ഭര്‍ത്താവ് ജേക്കബ് ആന്‍ഡ്രൂസിന്റെ (മിഥുന്‍) കുടുംബവീട്ടിലെത്തിച്ചു. വീട്ടിലെ പ്രാര്‍ഥനാശുശ്രൂഷകള്‍ക്ക് ശേഷം രാവിലെ 10.30ഓടെ മൃതദേഹം ഇടവകപ്പള്ളിയിലേക്ക് കൊണ്ടുപോയി. അവിടെ നടന്ന പൊതുദര്‍ശനത്തില്‍ നിരവധി പേരാണ് പ്രിയപ്പെട്ട ആന്‍ മേരിക്ക് അവസാന യാത്രാമൊഴി നല്‍കിയത്.

തിരുവനന്തപുരം കേശവദാസപുരം മറ്റത്ത് വീട്ടില്‍ ജിജി മാത്യുവിന്റെയും പരേതയായ ബെസ്സി ജിജി മാത്യുവിന്റെയും മകളാണ് ആന്‍ മേരി. കോട്ടയം ചിങ്ങവനം പള്ളത്രയില്‍ ജേക്കബ് ആന്‍ഡ്രൂസിന്റെ ഭാര്യയായ ആന്‍ മേരി, കുടുംബത്തിന്റെ പ്രതീക്ഷയും രണ്ട് പെണ്‍മക്കളുടെ ലോകവുമായിരുന്നു. ആന്‍ഡ്രീന (13), അലീസ (5) എന്നിവര്‍ ഇനി അമ്മയുടെ ഓര്‍മകളെ ചേര്‍ത്തുപിടിച്ചാണ് വളരേണ്ടത്.

അമേരിക്കയില്‍ ഉപരിപഠനത്തിനും തൊഴിലിനുമായി പോയ പ്രിയപ്പെട്ടവരുടെ ജീവിതം അപ്രതീക്ഷിതമായി അണഞ്ഞതിന്റെ നടുക്കത്തിലാണ് ഇരു കുടുംബങ്ങളും. മക്കള്‍ക്കും ഭര്‍ത്താവിനും മാതാപിതാക്കള്‍ക്കും സുഹൃത്തുക്കള്‍ക്കും വിശ്വസിക്കാനാകാത്ത വേര്‍പാടായി മാറിയിരിക്കുകയാണ് ആന്‍ മേരിയുടെ മരണം.

ആന്‍ മേരിയോടൊപ്പം കൊല്ലപ്പെട്ട അഞ്ജന ഹരിക്കും ജന്മനാട് കണ്ണീരോടെ വിട നല്‍കി. തൃശൂര്‍ വിലങ്ങന്നൂരിലെ ഭര്‍തൃവീട്ടില്‍ പൊതുദര്‍ശനത്തിന് വെച്ച മൃതദേഹം പിന്നീട് മണ്ണുത്തിയിലെ സ്വന്തം വീട്ടിലെത്തിച്ച് സംസ്‌കരിച്ചു. രണ്ട് കുടുംബങ്ങളുടെയും വീടുകളില്‍ ഒരേ സമയം ഉയര്‍ന്നത് പ്രിയപ്പെട്ടവരെ നഷ്ടപ്പെട്ടവരുടെ നിലവിളികളായിരുന്നു.

കൊച്ചി നെടുമ്പാശേരി അന്താരാഷ്ട്ര വിമാനത്താവളത്തില്‍ ഇന്നലെ രാവിലെ എത്തിച്ച ഇരുവരുടെയും മൃതദേഹങ്ങള്‍ ഔദ്യോഗിക നടപടിക്രമങ്ങള്‍ പൂര്‍ത്തിയാക്കിയ ശേഷമാണ് ബന്ധുക്കള്‍ ഏറ്റുവാങ്ങിയത്. സാന്‍ ഫ്രാന്‍സിസ്‌കോയില്‍നിന്ന് ലോസ് ആഞ്ചലസ്, ദുബായ് വഴി വിമാനമാര്‍ഗമാണ് മൃതദേഹങ്ങള്‍ കൊച്ചിയിലെത്തിച്ചത്. പോസ്റ്റ്‌മോര്‍ട്ടം, എംബാമിങ്, വിദേശകാര്യ വകുപ്പുകളുമായി ബന്ധപ്പെട്ട ഇമിഗ്രേഷന്‍ നടപടികള്‍ എന്നിവ പൂര്‍ത്തിയാക്കിയ ശേഷമായിരുന്നു മൃതദേഹങ്ങള്‍ നാട്ടിലെത്തിച്ചത്.

വിമാനത്താവളത്തില്‍ എത്തിയ ബന്ധുക്കളുടെ വിതുമ്പലും കണ്ണീരും കണ്ട് നിന്നവരെയും നൊമ്പരപ്പെടുത്തി. ജനപ്രതിനിധികളും ഉദ്യോഗസ്ഥരും ഉള്‍പ്പെടെ നിരവധി പേര്‍ ഇരുവര്‍ക്കും അന്തിമോപചാരം അര്‍പ്പിക്കാനെത്തിയിരുന്നു.

കഴിഞ്ഞ ഓഗസ്റ്റ് 28-ന് കാലിഫോര്‍ണിയയിലെ മില്‍പിറ്റസിലും സാനോസെയിലുമായി അരങ്ങേറിയ ഇരട്ടക്കൊലപാതകം മലയാളി സമൂഹത്തെ ഒന്നാകെ നടുക്കിയിരുന്നു. കൊല്ലപ്പെട്ട യുവതികളുടെ അടുത്ത സുഹൃത്തായ കോട്ടയം മൂന്നിലവ് സ്വദേശിനി അനില ബേബിയാണ് (32) കൊലപാതകങ്ങള്‍ക്ക് പിന്നിലെ പ്രതിയെന്നാണ് യു.എസ്. അന്വേഷണ സംഘത്തിന്റെ കണ്ടെത്തല്‍. സാനോസെയിലെ ആന്‍ മേരിയുടെ വീട്ടിലെത്തി കുത്തിക്കൊലപ്പെടുത്തിയ ശേഷം ഏകദേശം ഒന്നര മണിക്കൂറിന് ശേഷം അഞ്ജനയെ ഫോണില്‍ വിളിച്ചുവരുത്തുകയും വാഹനം ഇടിപ്പിച്ച് കൊലപ്പെടുത്തുകയുമായിരുന്നു എന്നാണ് അന്വേഷണ സംഘത്തിന്റെ കണ്ടെത്തല്‍.

കൃത്യത്തിന് പിന്നാലെ കാലിഫോര്‍ണിയ പൊലീസ് അനിലയെ അറസ്റ്റ് ചെയ്തു. നിലവില്‍ സാന്താക്ലാര കൗണ്ടി മെയിന്‍ ജയിലിലെ അതീവ സുരക്ഷാ വിഭാഗത്തില്‍ റിമാന്‍ഡില്‍ കഴിയുകയാണ് പ്രതി. സുഹൃത്തുക്കളായ രണ്ട് യുവതികളുടെ ജീവനെടുത്ത സംഭവത്തിന് പിന്നിലെ കാരണം കണ്ടെത്താനുള്ള അന്വേഷണം തുടരുകയാണ്. ഫസ്റ്റ് ഡിഗ്രി കൊലപാതകക്കുറ്റമാണ് പ്രതിക്കെതിരെ ചുമത്തിയിരിക്കുന്നത്. കേസില്‍ നീതിയുക്തവും സമഗ്രവുമായ അന്വേഷണം നടത്തി കുറ്റക്കാര്‍ക്കെതിരെ നിയമനടപടി സ്വീകരിക്കണമെന്ന ആവശ്യം വിവിധ പ്രവാസി സംഘടനകളും ഉന്നയിച്ചിട്ടുണ്ട്.

എന്നാല്‍ നിയമനടപടികള്‍ക്ക് അപ്പുറം, രണ്ട് കുടുംബങ്ങള്‍ക്കുമുന്നില്‍ ഇപ്പോള്‍ അവശേഷിക്കുന്നത് തീരാത്തൊരു ശൂന്യതയാണ്. അമേരിക്കയിലേക്ക് യാത്ര തിരിച്ചപ്പോള്‍ ഒരുനാള്‍ ഇങ്ങനെ ചേതനയറ്റ ശരീരങ്ങളായി മടങ്ങിവരുമെന്ന് ആന്‍ മേരിയും അഞ്ജനയും ഒരിക്കലും കരുതിയിട്ടുണ്ടാവില്ല. സ്വപ്നങ്ങളുടെ നാടായ അമേരിക്കയില്‍നിന്ന് ജന്മനാട്ടിലേക്ക് മടങ്ങിയെത്തിയത് രണ്ട് ജീവനറ്റ ശരീരങ്ങള്‍. പിന്നില്‍ ബാക്കിയായത് ഒരിക്കലും മായാത്ത ഓര്‍മകളും തീരാത്ത കണ്ണീരും മാത്രം.