തിരുവനന്തപുരം: തന്റെ അമേരിക്കന്‍ യാത്രയെക്കുറിച്ചുള്ള ആരോപണങ്ങള്‍ക്ക് വിശദീകരണവുമായി ആഭ്യന്തര മന്ത്രി രമേശ് ചെന്നിത്തല. സര്‍ക്കാര്‍ ചെലവിലല്ല തന്റെ വിദേശയാത്രയെന്നും സംഘാടകരുടെ ചെലവിലാണെന്നും ചെന്നിത്തല പറഞ്ഞു. ഫെയ്സ്ബുക്കില്‍ പങ്കുവെച്ച വീഡിയോ സന്ദേശത്തിലൂടെയാണ് ചെന്നിത്തലയുടെ വിശദീകരണം. ചെന്നിത്തലയുടെ വിദേശയാത്ര സംബന്ധിച്ച് ഇടത് സൈബര്‍ ഹാന്‍ഡിലുകളില്‍ വ്യാപക പ്രചാരണങ്ങള്‍ നടന്നിരുന്നു. ഇതിന് പിന്നാലെയാണ് ആഭ്യന്തര മന്ത്രിയുടെ വിശദീകരണം.

'ജയ്ഹിന്ദ് ടിവിയുടെ ആദ്യകാല നേതൃനിരയില്‍ ഉണ്ടായിരുന്ന ഫെലിക്സ് സൈമണിന്റെ വിവാഹത്തില്‍ പങ്കെടുക്കുന്നതിന് വേണ്ടിയാണ് ഞാനും കുടുംബവും ഇവിടെ വന്നത്. മൂന്നര പതിറ്റാണ്ടുകാലത്തെ ബന്ധമാണ് തനിക്ക് അദ്ദേഹവുമായുള്ളത്. ഇവിടുത്തെ മലയാളി സംഘടനകളുടെ പരിപാടിയിലും പങ്കെടുത്തു. ഓണാഘോഷങ്ങളിലും പങ്കെടുത്തും. ജോസ് കെ മാണിയടക്കമുള്ളവരും തന്നോടൊപ്പം സന്ദര്‍ശനത്തിനുണ്ടായിരുന്നു' എന്നും ചെന്നിത്തല വീഡിയോയിലൂടെ അറിയിച്ചു.

വീഡിയോയ്ക്ക് ഒടുവിലാണ് ചെന്നിത്തല ആരോപണങ്ങള്‍ക്ക് മറുപടി പറഞ്ഞത് ' പിന്നെ സര്‍ക്കാര്‍ ചെലവിലല്ല ഈ അമേരിക്കന്‍ യാത്ര, സംഘാടകരുടെ ചെലവിലാണ്, കേട്ടോ' എന്ന് ചെന്നിത്തല പറയുകയുണ്ടായി.