ലിബിയയിൽ ഇസ്‌ലാമിക് സ്റ്റേറ്റ് ഭീകരർ കൊലപ്പെടുത്തിയ ഘാന സ്വദേശിയായ രക്തസാക്ഷി വിശുദ്ധ മാത്യു അയാരിഗയുടെ നാമത്തിൽ ലോകത്തിലെ ആദ്യത്തെ കത്തോലിക്കാ ഇടവക അമേരിക്കയിലെ ടെക്സാസിൽ സ്ഥാപിതമായി. 2015 ഫെബ്രുവരി 15-ന് ലിബിയയിലെ സിർത്തിൽ വെച്ച് 20 ഈജിപ്ഷ്യൻ കോപ്റ്റിക് ക്രിസ്ത്യാനികൾക്കൊപ്പമാണ് മാത്യു അയാരിഗയും കൊല്ലപ്പെട്ടത്.

ക്രിസ്തുവിശ്വാസം തള്ളിപ്പറയാൻ വിസമ്മതിച്ചതിനെത്തുടർന്നാണ് ഭീകരർ അദ്ദേഹത്തെ വധിച്ചത്. "അവർ പറയുന്നത് എന്റെയും ദൈവമാണ്" എന്ന് പ്രഖ്യാപിച്ചുകൊണ്ട് അദ്ദേഹം മരണത്തെ വരിച്ച ധീരമായ ചരിത്രം വിശ്വാസികൾക്കിടയിൽ പ്രസിദ്ധമാണ്.  2023-ൽ ഫ്രാൻസിസ്  പാപ്പാ ഈ 21 രക്തസാക്ഷികളെയും കത്തോലിക്കാ സഭയുടെ ഔദ്യോഗിക രക്തസാക്ഷി പട്ടികയായ റോമൻ രക്തസാക്ഷി പട്ടികയിൽ  ഉൾപ്പെടുത്തിയിരുന്നു.

ഫോർട്ട് വർത്ത് രൂപതയിലെ ആർലിംഗ്ടണിൽ സ്ഥാപിതമായ ഈ പുതിയ ഇടവകയുടെ പ്രഖ്യാപനം ബിഷപ്പ് മൈക്കൽ ഓൾസൺ ആണ് നടത്തിയത്. അമേരിക്കയിലെ ആദ്യത്തെ ഘാന ദേശീയ കത്തോലിക്കാ ഇടവക എന്ന പ്രത്യേകതയും ഈ ദേവാലയത്തിനുണ്ട്. വിശ്വാസത്തിന് വേണ്ടി ജീവൻ നൽകിയ മാത്യു അയാരിഗയുടെ ധീരമായ സാക്ഷ്യത്തിന് ലഭിച്ച വലിയ അംഗീകാരമായാണ് ഈ പുതിയ ഇടവകയെ വിശ്വാസികൾ കാണുന്നത്. 2015-ൽ കോപ്റ്റിക് ഓർത്തഡോക്സ് സഭയിലെ തവദ്രോസ് രണ്ടാമൻ  ഇവരെ വിശുദ്ധരായി പ്രഖ്യാപിച്ചിരുന്നു.