ദീര്‍ഘനാളത്തെ ഇടവേളയ്ക്ക് ശേഷം കെ ജെ യേശുദാസ് വീണ്ടും വേദിയിലെത്തി. അമേരിക്കയിലെ മലയാളി സമൂഹത്തിന്റെ ഓണാഘോഷത്തില്‍ പങ്കെടുക്കാനാണ് മലയാളികളുടെ പ്രിയ ഗായകന്‍ നേരിട്ടെത്തിയത്. കേരള അസോസിയേഷന്‍ ഓഫ് ഡാലസിന്റെ നേതൃത്വത്തില്‍ ലൂയിസ് വില്ലയിലെ എന്‍ടെക് അരീനയില്‍ സംഘടിപ്പിച്ച പരിപാടിയിലായിരുന്നു അദ്ദേഹത്തിന്റെ സാന്നിധ്യം.

അടുത്ത കാലത്തായി യേശുദാസ് പൊതുപരിപാടികളില്‍ നിന്ന് വിട്ടുനില്‍ക്കുകയായിരുന്നു. കോവിഡ് മഹാമാരിയുടെ കാലയളവിന് ശേഷം അമേരിക്കയിലെ ഡാലസിലാണ് അദ്ദേഹം കൂടുതലായും സമയം ചെലവഴിക്കുന്നത്. അതിനാല്‍ അദ്ദേഹത്തെ നേരില്‍ കാണാനും ശബ്ദം കേള്‍ക്കാനും ലഭിച്ച അവസരം പരിപാടിയില്‍ പങ്കെടുത്തവര്‍ ആവേശത്തോടെയാണ് സ്വീകരിച്ചത്.

ചടങ്ങിനിടെ സദസ്സുമായി ആശയങ്ങള്‍ പങ്കുവച്ച യേശുദാസ് കേരളത്തിന്റെ സാമൂഹിക അന്തരീക്ഷത്തെക്കുറിച്ചും സംസാരിച്ചു. വ്യത്യസ്ത മതവിഭാഗങ്ങള്‍ തമ്മിലുള്ള സൗഹൃദമാണ് കേരളത്തിന്റെ വലിയ പ്രത്യേകതകളിലൊന്നെന്ന് അദ്ദേഹം പറഞ്ഞു. ഈ ഐക്യം വരും തലമുറകളിലേക്കും കൈമാറാന്‍ എല്ലാവരും ശ്രദ്ധിക്കണമെന്നും അദ്ദേഹം ആവശ്യപ്പെട്ടു. തുടര്‍ന്ന് യേശുദാസ് ഒരു ഗാനം കൂടി അവതരിപ്പിച്ചു. പ്രായത്തെ മറികടക്കുന്ന ആലാപനമികവിന് സാക്ഷിയാകാന്‍ കഴിഞ്ഞതിന്റെ സന്തോഷത്തിലായിരുന്നു സദസ്സ്. ഏറെക്കാലത്തിന് ശേഷം അദ്ദേഹത്തിന്റെ ശബ്ദം വേദിയില്‍ നേരിട്ട് കേള്‍ക്കാനായത് ആരാധകര്‍ക്ക് വേറിട്ട അനുഭവമായി

തന്റെ സംഗീതജീവിതത്തെക്കുറിച്ചും യേശുദാസ് ചടങ്ങില്‍ സംസാരിച്ചു. '1960-മുതല്‍ നിങ്ങളെന്നെ വളര്‍ത്തി. അതിനിയും നിന്നിട്ടില്ല. സംഗീതത്തിന്റെ ആ സമുദ്രത്തെ ഉള്‍ക്കൊള്ളാന്‍ എന്റെ ഈ ജന്മം പോരാ എന്ന് വിശ്വസിക്കുന്നയാളാണ് ഞാന്‍. തീര്‍ച്ചയായും നിങ്ങളുടെ പ്രാര്‍ത്ഥനയും അനുഗ്രഹവുമാണ് എന്നെ ഇവിടെ നിലനിര്‍ത്തുന്നത്. എന്നോട് അധികം സംസാരിക്കേണ്ട എന്നാണ് എന്റെയച്ഛന്‍ എന്നോട് പറഞ്ഞിട്ടുള്ളത്. അതിന്റെ തുടര്‍ച്ചയെന്നോണം ആര് എപ്പോള്‍ കണ്ടാലും പാട്ടുപാടാന്‍ പറയും. അതിന് കാരണം ജ്ഞാനവും കലാബോധവുമുള്ള സഹോദരീ സഹോദരന്മാരുടെ അനുഗ്രഹമാണ്.' യേശുദാസിന്റെ വാക്കുകള്‍.

യേശുദാസിന്റെ വേദിയിലേക്കുള്ള തിരിച്ചുവരവിനെ ഗായകന്‍ ബിജു നാരായണനും സന്തോഷത്തോടെ സ്വീകരിച്ചു. 86-ാം വയസ്സിലും അദ്ദേഹത്തിന്റെ ആലാപനത്തിലെ ഭംഗി നിലനില്‍ക്കുന്നത് വലിയ സന്തോഷം നല്‍കുന്ന കാര്യമാണെന്ന് ബിജു നാരായണന്‍ പറഞ്ഞു. ഗായകനെന്ന നിലയിലും മലയാളിയെന്ന നിലയിലും ഈ അവസരം ഏറെ അഭിമാനകരമാണെന്നും അദ്ദേഹം കൂട്ടിച്ചേര്‍ത്തു.