വെസ്റ്റ്‌ചെസ്റ്റർ: അപ്പർ വെസ്റ്റ്‌ചെസ്റ്റർ മലയാളി അസോസിയേഷന്റെ ഈ വർഷത്തെ ഓണാഘോഷം ആഗസ്റ്റ് 29 ശനിയാഴ്ച സെന്റ് ഗ്രിഗോറിയോസ് ഓർത്തഡോക്സ് ചർച്ച് ഓഡിറ്റോറിയത്തിൽ വർണാഭമായി നടത്തപ്പെട്ടു. അമേരിക്കൻ ദേശീയ ഗാനത്തോടും തുടർന്ന് ഇന്ത്യൻ ദേശീയ ഗാനത്തോടും കൂടിയാണ് പരിപാടികൾക്ക് തുടക്കമായത്.

അസോസിയേഷൻ സെക്രട്ടറി ബാബു പൂപ്പള്ളി സ്വാഗതം ആശംസിച്ചു. മലയാള മനോരമ ചീഫ് ഓഫ് ബ്യൂറോ ജോൺ മുണ്ടക്കയം, ഗുരുസ്വാമി പാർത്ഥസാരഥി പിള്ള എന്നിവർ മുഖ്യാതിഥികളായി പങ്കെടുത്തു. അസോസിയേഷൻ അംഗങ്ങളും കുടുംബാംഗങ്ങളും ഉൾപ്പെടെ നിരവധി പേർ ഓണാഘോഷത്തിൽ പങ്കെടുത്തു.

അസോസിയേഷൻ പ്രസിഡന്റ് ജോജി കാവനാൽ അധ്യക്ഷപ്രസംഗം നടത്തി. അസോസിയേഷന്റെ രൂപീകരണകാലം മുതൽ ഇന്നുവരെയുള്ള പ്രവർത്തനങ്ങൾ അനുസ്മരിച്ച അദ്ദേഹം, സംഘടനയുടെ വളർച്ചയ്ക്കും പ്രവർത്തനങ്ങൾക്കും സജീവമായി സഹകരിക്കുന്ന എല്ലാ അംഗങ്ങളെയും അഭിനന്ദിക്കുകയും നന്ദി അറിയിക്കുകയും ചെയ്തു.
 

ഗുരുസ്വാമി പാർത്ഥസാരഥി പിള്ള ഓണസന്ദേശം നൽകി. അമേരിക്കയിലെ മലയാളി സമൂഹത്തിന്റെ വളർച്ചയും ഓണത്തിന്റെ പ്രസക്തിയും അദ്ദേഹം തന്റെ സന്ദേശത്തിൽ പങ്കുവെച്ചു. മലയാള മനോരമ ചീഫ് ഓഫ് ബ്യൂറോ ജോൺ മുണ്ടക്കയം, അമേരിക്കയിലെ മലയാളികളുടെ കൂട്ടായ്മകളെയും ഓണാഘോഷങ്ങളെയും കുറിച്ചുള്ള തന്റെ അനുഭവങ്ങളും അഭിപ്രായങ്ങളും പങ്കുവച്ചു. അപ്പർ വെസ്റ്റ്‌ചെസ്റ്റർ മലയാളി അസോസിയേഷൻ നൽകിയ ഊഷ്മളമായ സ്വീകരണം തനിക്ക് ഏറെ സന്തോഷവും അത്ഭുതവും നൽകിയതായി അദ്ദേഹം പറഞ്ഞു. അമേരിക്കയിൽ ജനിച്ച അവതാരക അനായാസമായി ഒഴുക്കോടെ മലയാളത്തിൽ പരിപാടി അവതരിപ്പിച്ചതും തന്നെ ഏറെ ആകർഷിച്ചതായി അദ്ദേഹം പ്രത്യേകം പരാമർശിച്ചു.

അസോസിയേഷൻ അംഗങ്ങൾ, റിച്ചു, രഞ്ജിത, ജോസലിൻ, രമ്യ ടീന, മീന, എന്നിവർ  ഒരുക്കിയ മനോഹരമായ പൂക്കളവും, ആൻസി, വീണ, എൽസി, റിച്ചു, ടീന, മീന, രഞ്ജിത, രമ്യ, സിമി, ഡോണ എന്നിവർ ചേർന്ന് അവതരിപ്പിച്ച മനോഹരമായ തിരുവാതിര നൃത്തം ഈ വർഷത്തെ ഓണാഘോഷത്തിന്റെ പ്രധാന ആകർഷണങ്ങളിലൊന്നായിരുന്നു. മലയാളിത്തനിമയും ഓണത്തിന്റെ ആവേശവും നിറച്ച തിരുവാതിര സദസ്സിന്റെ പ്രത്യേക പ്രശംസ നേടി. തുടർന്ന് നടന്ന സാംസ്കാരിക പരിപാടിയിൽ തഹസീൻ മലയാളം ഗാനങ്ങൾ ആലപിച്ചു. ടാന്യ ആലപാട്ടും ജെനിറ്റ ആലപാട്ടും നൃത്തവും അവതരിപ്പിച്ച് കൈയടി നേടി. തുടർന്ന് അജിത് ഗാനമാലപിച്ചു.

അസോസിയേഷൻ ട്രഷറർ ബിജു കരുണാകരൻ നന്ദിപ്രസംഗം നടത്തി. സാംസ്കാരിക പരിപാടികൾക്ക് ശേഷം വൈറ്റ് പ്ലെയിൻസിലെ ഇന്ത്യ കഫേ ഇന്ത്യൻ റെസ്റ്റോറന്റ് തയ്യാറാക്കിയ 21 വിഭവങ്ങളടങ്ങിയ സമൃദ്ധമായ ഓണസദ്യ പച്ചവാഴയിലകളിൽ എല്ലാവർക്കും ചിട്ടയോടെയും ക്രമബദ്ധമായും വിളമ്പി. ഓണസദ്യയുടെ ഒരുക്കങ്ങളിലും വിതരണത്തിലും ഷിനു ജോസഫ് പ്രധാന പങ്കുവഹിച്ചു. സദ്യ വിളമ്പുന്നതിനാവശ്യമായ പ്ലേറ്റുകളും മറ്റ് സാമഗ്രികളും ക്രമീകരിച്ച് എത്തിക്കുകയും ഭക്ഷണവിതരണം ഏകോപിപ്പിക്കുകയും ചെയ്തത് ഷിനു ജോസഫായിരുന്നു. അംഗങ്ങളുടെ കൂട്ടായ പ്രവർത്തനവും സഹകരണവും സദ്യയുടെ വിജയത്തിന് മാറ്റുകൂട്ടി. സദ്യ ആസ്വദിക്കുന്നതിനിടെ അസോസിയേഷൻ അംഗങ്ങളായ കുഞ്ഞായിയും, ലാൽജനും, സാജുവും മലയാളം ഗാനങ്ങൾ ആലപിച്ച് സദസ്സിനെ കൂടുതൽ ആനന്ദഭരിതമാക്കി. 

ഓണാഘോഷ പരിപാടിയുടെ അവതാരക അമേരിക്കയിൽ ജനിച്ച മിസ്. സമീര കാവനാലിന്റെ അവതരണവും മലയാളത്തിലുള്ള അനായാസമായ സംസാരശൈലിയും ഓണാഘോഷത്തിലെ ശ്രദ്ധേയമായ മറ്റൊരു പ്രത്യേകതയായി. തികച്ചും ഒഴുക്കോടെ മലയാളത്തിൽ പരിപാടി അവതരിപ്പിച്ച സമീര സദസ്സിനെ അത്ഭുതപ്പെടുത്തി. കേരളത്തിൽ നിന്ന് എത്തിയ മുഖ്യാതിഥിയും മലയാള മനോരമ ചീഫ് ഓഫ് ബ്യൂറോയുമായ ജോൺ മുണ്ടക്കയം, സമീറയുടെ മനോഹരവും സ്വാഭാവികവുമായ മലയാള അവതരണം ഏറെ അത്ഭുതത്തോടെയും സന്തോഷത്തോടെയും പ്രശംസിച്ചു.
സൗഹൃദത്തിന്റെയും കൂട്ടായ്മയുടെയും ഓണസന്ദേശം പകർന്നുനൽകിയ ആഘോഷ പരിപാടികൾ ഉച്ചകഴിഞ്ഞ് മൂന്നു  മണിയോടെ സമാപിച്ചു.

വാർത്ത അയച്ചത്: ബാബു പൂപ്പള്ളി