ന്യൂയോർക്ക്: രാഷ്ട്രീയ സ്വയംസേവക് സംഘ് (RSS) മേധാവി മോഹൻ ഭഗവത് മാഡിസൺ സ്‌ക്വയർ ഗാർഡനിൽ പ്രസംഗിക്കുന്നതിനിടെ വേദിക്ക് പുറത്ത് നൂറുകണക്കിന് പേർ പ്രതിഷേധിച്ചതായി ഇന്ത്യൻ അമേരിക്കൻ മുസ്ലിം കൗൺസിൽ (ഐഎഎംസി) അറിയിച്ചു.

മുസ്ലിം, സിഖ്, ക്രിസ്ത്യൻ, ദളിത്, ഹിന്ദു, ജൂത വിഭാഗങ്ങളിൽപ്പെട്ടവർ ഉൾപ്പെടെയുള്ളവർ പ്രതിഷേധത്തിൽ പങ്കെടുത്തതായി ഐഎഎംസി  അവകാശപ്പെട്ടു. ആർഎസ്എസിനെ ഹിന്ദു ആധിപത്യ ആശയങ്ങൾ പ്രചരിപ്പിക്കുന്ന സംഘടനയായി വിശേഷിപ്പിച്ച പ്രതിഷേധക്കാർ, ഇന്ത്യയിലെ മതന്യൂനപക്ഷങ്ങൾക്കെതിരായ അക്രമങ്ങളുമായി സംഘടനയ്ക്ക് ബന്ധമുണ്ടെന്നും ആരോപിച്ചു.

ന്യൂയോർക്ക് സിറ്റി മുൻ കംപ്ട്രോളറും കോൺഗ്രസ് സ്ഥാനാർഥിയുമായ ബ്രാഡ് ലാൻഡറും പ്രതിഷേധക്കാരോടൊപ്പം ചേർന്നു. വിദ്വേഷം നിറഞ്ഞ ഫാസിസ്റ്റ് റാലിക്ക് മാഡിസൺ സ്‌ക്വയർ ഗാർഡൻ വേദിയൊരുക്കിയതിനെ അദ്ദേഹം വിമർശിച്ചു.

ന്യൂയോർക്ക് സിറ്റി കൗൺസിൽ അംഗം ജൂലി വോണും പരിപാടിക്കെതിരെ രംഗത്തെത്തി. മതന്യൂനപക്ഷങ്ങൾക്കെതിരായ അക്രമങ്ങളുമായി ബന്ധമുള്ളതായി ആരോപിക്കപ്പെടുന്ന ഒരു സംഘടനയുടെ നേതാവിന് വേദി നൽകിയതിനെ അവർ വിമർശിച്ചു.

ഭഗവതിന്റെ പരിപാടിക്കെതിരെ അമേരിക്കയിലെ വിവിധ പൗരാവകാശ, മതാന്തര സംഘടനകൾ നേരത്തെ തന്നെ പ്രതിഷേധം രേഖപ്പെടുത്തിയിരുന്നു. 65 സിവിൽ റൈറ്റ്സ്, ഇന്റർഫെയ്ത്ത് സംഘടനകൾ പരിപാടിയെ അപലപിച്ചതായും ആയിരത്തിലധികം അമേരിക്കക്കാർ യു.എസ്. സ്റ്റേറ്റ് സെക്രട്ടറി മാർക്കോ റൂബിയോയുമായി ബന്ധപ്പെട്ട് ഭാഗവതിന് അമേരിക്കയിൽ പ്രവേശനം നിഷേധിക്കണമെന്ന് ആവശ്യപ്പെട്ടതായും  ഐഎഎംസി  അറിയിച്ചു.

ന്യൂയോർക്ക് മേയർ സൊഹ്രാൻ മംദാനിയും പരിപാടിക്കെതിരെ നിലപാട് സ്വീകരിച്ചതായി ഐഎഎംസി പറഞ്ഞു. സിറ്റി കൗൺസിൽ അംഗങ്ങളായ ഷഹാന ഹനീഫ്, ലിങ്കൺ റെസ്റ്റ്ലർ, ജൂലി വോൺ എന്നിവരും കോൺഗ്രസ് സ്ഥാനാർഥി ബ്രാഡ് ലാൻഡറും മാഡിസൺ സ്‌ക്വയർ ഗാർഡനോട് പരിപാടി റദ്ദാക്കണമെന്ന് ആവശ്യപ്പെട്ടതായും സംഘടന അറിയിച്ചു.

ഭാഗവതിന്റെ പരിപാടിക്ക് മൂന്ന് ദിവസം മുമ്പ്, യു.എസ്. കമ്മീഷൻ ഓൺ ഇന്റർനാഷണൽ റിലീജിയസ് ഫ്രീഡം (USCIRF) അദ്ദേഹത്തിന്റെ വിസ റദ്ദാക്കണമെന്നും RSS-നെതിരെ ഉപരോധം ഏർപ്പെടുത്തണമെന്നും ആവശ്യപ്പെട്ടതായി  ഐഎഎംസി  വ്യക്തമാക്കി. മുസ്ലിംകൾ, ക്രിസ്ത്യാനികൾ, ദളിതർ, സിഖുകൾ തുടങ്ങിയ ന്യൂനപക്ഷങ്ങൾക്കെതിരായതായി ആരോപിക്കപ്പെടുന്ന അക്രമങ്ങളും വിവേചനവും ചൂണ്ടിക്കാട്ടിയാണ് USCIRF നടപടി ആവശ്യപ്പെട്ടതെന്ന്  ഐഎഎംസി വിശദീകരിച്ചു.

അമേരിക്കയിലെ ഇന്ത്യൻ വംശജരായ മുസ്ലിംകളുടെ അവകാശങ്ങൾക്കായി പ്രവർത്തിക്കുന്ന സംഘടനയായ  ഐഎഎംസി  മോഹൻ ഭഗവതിന്റെ വിസ റദ്ദാക്കണമെന്നും ആർഎസ്എസ് നേതൃത്വത്തിനെതിരെ ലക്ഷ്യമിട്ട ഉപരോധങ്ങൾ ഏർപ്പെടുത്തണമെന്നും യു.എസ്. സ്റ്റേറ്റ് ഡിപ്പാർട്ട്മെന്റിനോട് ആവശ്യപ്പെട്ടു.

1925-ൽ സ്ഥാപിതമായ ആർഎസ്എസ് ഹിന്ദു ദേശീയവാദ സംഘടനയാണ്. സംഘടനയുടെ ആശയങ്ങളെയും പ്രവർത്തനങ്ങളെയും ചുറ്റിപ്പറ്റി ഇന്ത്യയിലും വിദേശത്തും ദീർഘകാലമായി രാഷ്ട്രീയ-സാമൂഹിക വിവാദങ്ങൾ നിലനിൽക്കുന്നുണ്ട്. അതേസമയം, RSS-നെ “ഫാസിസ്റ്റ്” അല്ലെങ്കിൽ “അക്രമാസക്തമായ” സംഘടനയായി വിശേഷിപ്പിക്കുന്നതിനെ സംഘടനയും അനുഭാവികളും തള്ളിക്കളയുകയും, ദേശീയ-സാംസ്കാരിക പ്രവർത്തനങ്ങളാണ് തങ്ങളുടെ ലക്ഷ്യമെന്ന് വാദിക്കുകയും ചെയ്യുന്നു.

മാഡിസൺ സ്‌ക്വയർ ഗാർഡനിലെ പ്രതിഷേധം ഇന്ത്യയിലെ മതസ്വാതന്ത്ര്യം, ന്യൂനപക്ഷ അവകാശങ്ങൾ, ഹിന്ദു ദേശീയവാദം എന്നിവയെക്കുറിച്ചുള്ള അമേരിക്കയിലെ തുടരുന്ന ചർച്ചകളുടെ പശ്ചാത്തലത്തിലാണ് നടന്നത്.