ഡാളസ് ഡബ്ല്യു.എം.സി ആഗോള സമ്മേളനത്തിന് അവിസ്മരണീയമായ രണ്ടും മൂന്നും ദിനങ്ങള്; സമാപനം ഇന്ന്
ഡാളസ് (ടെക്സസ്): വേള്ഡ് മലയാളി കൗണ്സിലിന്റെ (ഡബ്ല്യു.എം.സി) 15-ാമത് ആഗോള സമ്മേളനത്തിനും 30-ാം വാര്ഷിക ആഘോഷങ്ങള്ക്കും ഡാളസ് വിന്ധാം എയര്പോര്ട്ട് ഹോട്ടലില് ആവേശം വാനോളമുയര്ത്തി രണ്ടാം ദിനത്തിലെയും മൂന്നാം ദിനത്തിലെയും (ഓഗസ്റ്റ് 22, 23) പരിപാടികള് പൂര്ത്തിയായി.
ലോകമെമ്പാടുമുള്ള പ്രവാസി പ്രതിനിധികള് പങ്കെടുത്ത ഔദ്യോഗിക ചര്ച്ചകള്ക്കും പ്രൗഢഗംഭീരമായ പൊതുസമ്മേളനങ്ങള്ക്കും വര്ണ്ണാഭമായ കലാസന്ധ്യകള്ക്കുമാണ് ഇരുദിവസങ്ങളിലും ഡാളസ് സാക്ഷ്യം വഹിച്ചത്. വെള്ളിയാഴ്ച കോട്ടയം എം.പി അഡ്വ. ഫ്രാന്സിസ് ജോര്ജ്ജ് ഭദ്രദീപം കൊളുത്തി ഉദ്ഘാടനം ചെയ്തതും, ഗ്ലോബല് നേതാക്കള് ചേര്ന്ന് കൗണ്സില് പതാക ഉയര്ത്തി വിളംബര റാലി നടത്തിയതുമായ ഉജ്ജ്വല തുടര്ച്ചയ്ക്ക് പിന്നാലെയാണ് തുടര്ന്നുള്ള ദിനങ്ങളിലും പ്രൗഢമായ പരിപാടികള് അരങ്ങേറിയത്. നാലു ദിവസം നീണ്ടുനിന്ന ഈ ആഗോള മലയാളി സംഗമത്തിന് ഓഗസ്റ്റ് 24 തിങ്കളാഴ്ച തിരശീല വീഴും.
ആവേശമായി ഗ്ലോബല് കാബിനറ്റ്-എക്സിക്യൂട്ടീവ് യോഗങ്ങളും പൊതുസമ്മേളനവും
ശനിയാഴ്ച രാവിലെ റീജന്സി ഹാളില് നടന്ന ഗ്ലോബല് കാബിനറ്റ്, ഗ്ലോബല് എക്സിക്യൂട്ടീവ് യോഗങ്ങളോടെയാണ് ചടങ്ങുകള് ആരംഭിച്ചത്. മൗനപ്രാര്ത്ഥനയ്ക്ക് ശേഷം ഗ്ലോബല് ജനറല് സെക്രട്ടറി ക്രിസ്റ്റഫര് വര്ഗീസ് സ്വാഗതം ആശംസിച്ചു. ഗ്ലോബല് പ്രസിഡന്റ് ജോണ് മത്തായി പ്രസിഡന്ഷ്യല് അഡ്രസ്സും, ഗ്ലോബല് ചെയര്മാന് ഗോപാലപിള്ള മുഖ്യപ്രഭാഷണവും നടത്തി. ഗ്ലോബല് ട്രഷറര് നന്ദി പറഞ്ഞു. ഉച്ചകഴിഞ്ഞ് നടന്ന വിമന്സ് ഫോറം മീറ്റിംഗ് മുഖ്യാതിഥി ഡോ. ലിസി ഫെര്ണാണ്ടസ് ഉദ്ഘാടനം ചെയ്തു.
വൈകുന്നേരം 6:00 മണിക്ക് ആരംഭിച്ച പ്രൗഢഗംഭീരമായ പൊതുസമ്മേളനം ഡബ്ല്യു.എം.സി അമേരിക്ക റീജിയണ് സെക്രട്ടറി അനീഷ് ജെയിംസിന്റെ സ്വാഗത പ്രസംഗത്തോടെ ആരംഭിച്ചു. ഗ്ലോബല് ചെയര്മാന് ഗോപാലപിള്ള അധ്യക്ഷത വഹിച്ച ചടങ്ങില്, ഇര്വിങ് സിറ്റി മേയര് അല് സാപന്റ ഭദ്രദീപം കൊളുത്തി ഉദ്ഘാടനം നിര്വ്വഹിച്ചു. യോഗത്തില് എം.പി ഫ്രാന്സിസ് ജോര്ജ്ജ് മുഖ്യാതിഥിയായിരുന്നു.
സണ്ണി വെയ്ല് സിറ്റി മേയര് സജി ജോര്ജ്ജ്, കോപ്പല് സിറ്റി മേയര് പ്രോ ടെം ബിജു മാത്യു, സണ്ണി വെയ്ല് സിറ്റി കൗണ്സില് മെമ്പര് മനു ഡാനി എന്നിവര് ആശംസകള് അര്പ്പിച്ചു സംസാരിച്ചു.
ബിസിനസ് രംഗത്തെ മികവിന് മലബാര് ഗ്രൂപ്പ് ഓഫ് കമ്പനീസ് ചെയര്മാന് എം.പി. അഹമ്മദിനുള്ള 'ഡബ്ല്യു.എം.സി ബിസിനസ് ഐക്കണ് അവാര്ഡ്' അദ്ദേഹത്തിന് വേണ്ടി ജോസഫ് ഈപ്പന്, എം.പി ഫ്രാന്സിസ് ജോര്ജ്ജില് നിന്ന് ഏറ്റുവാങ്ങി. കൂടാതെ, ഡബ്ല്യു.എം.സി സ്ഥാപക നേതാക്കളായ ആന്ഡ്രൂ പപ്പച്ചന്, ജോര്ജ്ജ് ആന്ഡ്രൂസ്, വര്ഗീസ്, ഗോപാലപിള്ള എന്നിവരെ ചടങ്ങില് ആദരിച്ചു.
തുടര്ന്ന് ചലച്ചിത്ര നിര്മ്മാതാവും മ്യൂസിക് ഡയറക്ടറുമായ ഡോ. ലിസി ഫെര്ണാണ്ടസ്, മര്ഫി സിറ്റി കൗണ്സില് മെമ്പര് എലിസബത്ത് എബ്രഹാം, ഷീമ ശ്രീധരന്, യൂറോപ്പ് റീജിയണ് പ്രസിഡന്റ് മേഴ്സി തടത്തില് തുടങ്ങിയവര് ആശംസകള് അര്പ്പിച്ചു. ഡബ്ല്യു.എം.സി ഗ്ലോബല് കോണ്ഫറന്സ് കോ-കണ്വീനര് നൈനാന് മത്തായി നന്ദി രേഖപ്പെടുത്തി.
കൃഷ്ണകിരണിന്റെ സോളോ ഡാന്സ്, സീതള്, സീബിന് എന്നിവരുടെ നേതൃത്വത്തിലുള്ള ഗ്രൂപ്പ് ഡാന്സ്, ശങ്കര് (യു.എ.ക്യു പ്രൊവിന്സ്) അവതരിപ്പിച്ച ഗാനം, ഫാഷന് ഷോ, ഡോ. ജെറോ വര്ഗീസിന്റെ ഗാനം, ടീം നാട്യയുടെ വുമണ് എംപവര്മെന്റ് ഡാന്സ്, കരോക്കെ നൈറ്റ് എന്നിവ സദസ്സിനെ ആവേശത്തിലാക്കി. സണ്ണി വെയ്ല് മേയര് സജി ജോര്ജ്ജ് ഫാഷന് ഷോയുടെ സമ്മാനദാനം നിര്വ്വഹിച്ചു.
സ്ഥാനാരോഹണവും വാലിഡക്ടറി സമ്മേളനവും
മൂന്നാം ദിനമായ ഞായറാഴ്ച വൈകുന്നേരം അന്ന മേരി അഗസ്റ്റിന്റെ പ്രാര്ത്ഥനാ ഗാനത്തോടെ വാലിഡക്ടറി സമ്മേളനത്തിന് തുടക്കമായി. ഏലീഷ ഷാജിന് അമേരിക്കന് ദേശീയ ഗാനവും, ആന്സി തലച്ചല്ലൂര്, സ്മിത സോണി എന്നിവര് ചേര്ന്ന് ഭാരതീയ ദേശീയ ഗാനവും ആലപിച്ചു. ഗ്ലോബല് ജനറല് സെക്രട്ടറി ക്രിസ്റ്റഫര് വര്ഗീസ് സ്വാഗതം പറഞ്ഞു. ഇന്ത്യന് കോണ്സുല് ജനറല് ഡി.സി. മഞ്ജുനാഥ് വീഡിയോ സന്ദേശത്തിലൂടെ ആശംസ കൈമാറി. ഡബ്ല്യു.എം.സി ഗ്ലോബല് ചെയര്മാന് ഗോപാലപിള്ള അധ്യക്ഷ പ്രസംഗവും, ഗ്ലോബല് പ്രസിഡന്റ് ജോണ് മത്തായി പ്രസിഡന്ഷ്യല് അഡ്രസ്സും നടത്തി.
ടെക്സസ് സ്റ്റേറ്റ് റെപ്രസെന്റേറ്റീവ് ഓണറബിള് ആഞ്ചി ചെന് ദീപം തെളിയിച്ച് വാലിഡക്ടറി സമ്മേളനം ഉദ്ഘാടനം ചെയ്തു. ചടങ്ങില് വരാനിരിക്കുന്ന പുതിയ ഗ്ലോബല് പ്രസിഡന്റ് ജോളി തടത്തിലിനെയും വേദിയിലേക്ക് ക്ഷണിച്ചു. മംഗള്യം വീഡിയോ പ്രദര്ശനവും ഫിലാഡല്ഫിയ പ്രൊവിന്സിനുള്ള ആദരവും വിതരണവും നടന്നു.
ചലച്ചിത്ര താരം ദിവ്യ ഉണ്ണി പ്രധാന അതിഥിയായി പങ്കെടുത്തു. 'എന്കോണ്സ് ഐ.ടി സര്വീസസ്' ഫൗണ്ടറും സി.ഇ.ഒയുമായ മോബി കെ. ബാബുവിന് ഡബ്ല്യു.എം.സി ഗ്ലോബല് ബിസിനസ് എക്സലന്സ് അവാര്ഡ് ദിവ്യ ഉണ്ണി സമ്മാനിച്ചു. മോബി കെ. ബാബു മറുപടി പ്രസംഗവും, തുടര്ന്ന് എം.പി ഫ്രാന്സിസ് ജോര്ജ്ജ് മുഖ്യപ്രഭാഷണവും നടത്തി.
സഹ-സ്പോണ്സറായ SPJ അഡ്ജസ്റ്റിംഗ് മാനേജിംഗ് ഡയറക്ടര് ശരത് പി. ജെറോമിനുള്ള ഉപഹാരവും, ഗ്ലോബല് കോണ്ഫറന്സ് ജനറല് കണ്വീനര് ജോണ്സണ് തലച്ചല്ലൂരിനുള്ള ഉപഹാരവും ദിവ്യ ഉണ്ണി കൈമാറി.
യു.എസ് ഭരണകൂടത്തിലെ മുതിര്ന്ന ഉദ്യോഗസ്ഥന് റവ. ഫാ. അലക്സാണ്ടര് ജെ. കുര്യന്, ഡബ്ല്യു.എം.സി അമേരിക്ക റീജിയണ് ചെയര്മാന് ജോണി കുന്നംപുറം, യൂറോപ്പ് റീജിയണ് ചെയര്മാന് ജോളി എം. പടയാറ്റില്, വൈസ് പ്രസിഡന്റ് ഡോ. പി. ബി. ബോസ്, ഗ്ലോബല് വൈസ് ചെയര്പേഴ്സണ് ഗ്രിഗറി മേടയില്, യൂറോപ്പ് റീജിയണ് പ്രസിഡന്റ് മേഴ്സി തടത്തില്, കോ-കണ്വീനര് ബാബു തങ്ങളത്തില്, രജിസ്ട്രേഷന് കോര്ഡിനേറ്റര് സോണി കണ്ണോത്തുതറ എന്നിവരും ആശംസകള് നേര്ന്നു.
2026-2028 വര്ഷത്തേക്കുള്ള പുതിയ ഗ്ലോബല് ഭാരവാഹികളുടെ പ്രഖ്യാപനം ഗ്ലോബല് എന്.ഇ.സി ഫിലിപ്പ് തോമസ് നിര്വ്വഹിച്ചു. തുടര്ന്ന് ആന്ഡ്രൂ പാപ്പച്ചന്റെ നേതൃത്വത്തില് പുതിയ ഭാരവാഹികളുടെ സ്ഥാനാരോഹണവും സത്യപ്രതിജ്ഞാ ചടങ്ങും നടന്നു. പുതിയ ചെയര്മാനും പ്രസിഡന്റും സ്വീകരണ പ്രസംഗം നടത്തി. അസോസിയേറ്റ് ട്രഷറര് സ്മിത സോണി നന്ദി രേഖപ്പെടുത്തി.
മനംകവര്ന്ന് സാംസ്കാരിക സന്ധ്യയും ദിവ്യ ഉണ്ണിയുടെ നൃത്തവും
സമ്മേളന നടപടികള്ക്ക് ശേഷം അരങ്ങേറിയ സാംസ്കാരിക സന്ധ്യയ്ക്ക് മാറ്റുകൂട്ടി പ്രശസ്ത നടി ദിവ്യ ഉണ്ണിയും സംഘവും അവതരിപ്പിച്ച ഗ്രൂപ്പ് ഡാന്സും, ദിവ്യ ഉണ്ണിയുടെ സോളോ ഡാന്സും സദസ്സിന്റെ മനം കവര്ന്നു. തുടര്ന്ന് ആന്സി തലച്ചല്ലൂര്, ശങ്കര്, ഡോ. ജെറോ വര്ഗീസ്, അമ്പിളി ലിസ ടോം, റാണി റോബിന് എന്നിവര് ചേര്ന്ന് അവതരിപ്പിച്ച ഓണപ്പാട്ടും, ബിജു മാത്യു, ഡോ. ജെറോ വര്ഗീസ്, ശങ്കര് എന്നിവരുടെ ഗാനമേളയും സമാപന സന്ധ്യയെ അവിസ്മരണീയമാക്കി.
നാലു ദിവസം നീണ്ടുനിന്ന വേള്ഡ് മലയാളി കൗണ്സില് ആഗോള സംഗമത്തിന് ഓഗസ്റ്റ് 24 തിങ്കളാഴ്ച രാവിലെ നടക്കുന്ന സമാപന സമ്മേളനങ്ങളോടെ തിരശീല വീഴും
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala