'പുല്ലാന്തറയാറിലെ രംഗമഞ്ചങ്ങള്' പ്രകാശനം ചെയ്തു.
പെന്സില്വേനിയ: പ്രവാസി മലയാള സാഹിത്യകാരനും എഡിറ്ററുമായ ബെന്നി നെച്ചൂരിന്റെ പുതിയ നാടകസമാഹാരം 'പുല്ലാന്തറയാറിലെ രംഗമഞ്ചങ്ങള്' പെന്സില്വേനിയ സംസ്ഥാനത്തെ പോക്കനോസിലുള്ള കലഹാരി റിസോര്ട്ടില് വെച്ചു നടന്ന ഫൊക്കാനയുടെ 21-ാമത് അന്താരാഷ്ട്ര കണ്വെന്ഷനിലെ ലളിതമായ ഒരു ചടങ്ങില് പ്രകാശനം ചെയ്തു.
സാഹിത്യകാരനായ മുരളി ജെ. നായര്, പ്രമുഖ എഴുത്തുകാരായ ഡോ. പ്രമീള ദേവി, ടി.ഡി. രാമകൃഷ്ണന് എന്നിവര്ക്ക് പുസ്തകത്തിന്റെ ആദ്യപ്രതി നല്കിയാണ് പ്രകാശനകര്മ്മം നിര്വ്വഹിച്ചത്. വ്യത്യസ്ത സാമൂഹ്യപ്രമേയങ്ങള് കൈകാര്യംചെയ്യുന്ന മൂന്ന് നാടകങ്ങളാണ് ഈ ഗ്രന്ഥത്തില് ഉള്പ്പെടുത്തിയിരിക്കുന്നത്.
ഈ നാടകങ്ങളെപ്പറ്റിയുള്ള ഹൃസ്വപഠനങ്ങള് താന് പുസ്തകത്തിന്റെ അവതാരികയില് രേഖപ്പെടുത്തിയിട്ടുണ്ടെന്ന് മുരളി ജെ. നായര് പറഞ്ഞു. നോര്ത്ത് അമേരിക്കന് മലയാള സാഹിത്യത്തില് കഥകളും കവിതകളും ധാരാളമായി ഉണ്ടാകുന്നുണ്ടെങ്കിലും, നാടകരചനകള് പുസ്തകരൂപത്തില് പ്രസിദ്ധീകരിക്കപ്പെടുന്നത് വളരെ അപൂര്വ്വമാണെന്നും അദ്ദേഹം ചൂണ്ടിക്കാട്ടി.
ചടങ്ങില് സാഹിത്യ-സാംസ്കാരിക രംഗത്തെ പ്രമുഖരായ അബ്ദുള് പുന്നയൂര്ക്കുളം, സാംസി കൊടുമണ്, ഷീല എം.പി., ജേസിജെ., ഗീത ജോര്ജ് എന്നിവര് പങ്കെുടുക്കുകയും ബെന്നി നെച്ചൂരിന് ഭാവുകങ്ങള് നേര്ന്നു സംസാരിക്കുകയും ചെയ്തു.
വടക്കേ അമേരിക്കന് മലയാളി സമൂഹത്തിന്റെ ജീവിതം തുടിക്കുന്ന 65 കഥകള് കോര്ത്തിണക്കി ബെന്നി നെച്ചൂര് എഡിറ്റ് ചെയ്ത 'അമേരിക്കന് കഥക്കൂട്ടം', അനുഭവക്കുറിപ്പുകളായ 'പുല്ലാന്തറയാറിലെ ചുഴികള്' എന്നീ പുസ്തകങ്ങള്ക്ക് ശേഷമാണ് പുതിയ നാടകസമാഹാരം പുറത്തിറങ്ങുന്നത്.
https://greenbooksindia.com/pullantharayarile-rangamanchangal-benny-nechoor
പുസ്തക വിവരങ്ങള്:
കൃതി: പുല്ലാന്തറയാറിലെ രംഗമഞ്ചങ്ങള് (നാടകം)
രചന: ബെന്നി നെച്ചൂര്
പ്രസാധകര്: ഗ്രീന് ബുക്സ്, തൃശൂര്
വില: 130
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala