ചെങ്‌ഡു: ചൈനയിൽ മതവിശ്വാസവുമായി ബന്ധപ്പെട്ട പരിശോധനകൾ പൊതുമേഖലാ സ്ഥാപനങ്ങളിലേക്കും വിദ്യാഭ്യാസ മേഖലയിലേക്കും വ്യാപിപ്പിക്കുന്നതായി റിപ്പോർട്ട്. ചെങ്‌ഡുവിലെ ഒരു സർക്കാർ ആശുപത്രിയിലെ ജീവനക്കാരോട് മതവിശ്വാസം സംബന്ധിച്ച വിവരങ്ങൾ നൽകാൻ നിർദേശിച്ചതായും വിദ്യാർഥികളുടെയും അവരുടെ മാതാപിതാക്കളുടെയും മതപശ്ചാത്തലം വിദ്യാഭ്യാസ അധികൃതർ ശേഖരിക്കുന്നതായും 'ദി എപോക്ക് ടൈംസ്' റിപ്പോർട്ട് ചെയ്തു.
 

ആശുപത്രിയിലെ സ്ഥിരം ജീവനക്കാർ, കരാർ ജീവനക്കാർ, താൽക്കാലിക ജീവനക്കാർ എന്നിവരോട് മതവിശ്വാസത്തെക്കുറിച്ചുള്ള വിവരങ്ങൾ നൽകാൻ ആവശ്യപ്പെട്ടതായാണ് റിപ്പോർട്ട്. 'ആശയപരവും വംശീയവും മതപരവുമായ പ്രവർത്തനങ്ങളുടെ നിരന്തര പരിശോധന' സംബന്ധിച്ച ആവശ്യങ്ങൾ നടപ്പാക്കുന്നതിന്റെ ഭാഗമായാണ് സമഗ്രമായ വിവരശേഖരണം നടത്തുന്നതെന്ന് ആശുപത്രി പുറത്തിറക്കിയ ആഭ്യന്തര അറിയിപ്പിൽ വ്യക്തമാക്കിയതായി റിപ്പോർട്ടിൽ പറയുന്നു.

ഒരു വ്യക്തിയെയും ഒഴിവാക്കാതെ എല്ലാ ജീവനക്കാരെയും പരിശോധനയുടെ പരിധിയിൽ ഉൾപ്പെടുത്തണമെന്നും വിവരങ്ങൾ മറച്ചുവയ്ക്കുകയോ ഒഴിവാക്കുകയോ ചെയ്യരുതെന്നും നിർദേശമുണ്ടായിരുന്നതായും റിപ്പോർട്ട് പറയുന്നു. മതവിശ്വാസമില്ലാത്ത ജീവനക്കാരും 'മതവിശ്വാസമില്ല' എന്ന നിലയിൽ വിവരങ്ങൾ രേഖപ്പെടുത്തേണ്ടതുണ്ട്.

ചൈനീസ് കമ്മ്യൂണിസ്റ്റ് പാർട്ടി അംഗങ്ങൾക്ക് ഏതെങ്കിലും മതം ആചരിക്കാൻ അനുമതിയില്ലെന്നും റിപ്പോർട്ടിൽ പറയുന്നു. മതവിശ്വാസമുള്ള ജീവനക്കാർ ഇക്കാര്യം ബന്ധപ്പെട്ട പാർട്ടി ഘടകത്തെ അറിയിക്കണമെന്നും നിർദേശിച്ചിട്ടുണ്ടെന്നാണ് റിപ്പോർട്ട്.

വിദ്യാഭ്യാസ മേഖലയിലും സമാനമായ പരിശോധനകൾ നടക്കുന്നതായി റിപ്പോർട്ട് ചൂണ്ടിക്കാട്ടുന്നു. സിച്ചുവാനിലെ ഒരു സർവകലാശാലയിലെ ഭരണവിഭാഗം ജീവനക്കാരനെ ഉദ്ധരിച്ച്, വിദ്യാർഥികളുടെയും അവരുടെ കുടുംബാംഗങ്ങളുടെയും മതവിശ്വാസം സംബന്ധിച്ച വിവരങ്ങൾ ശേഖരിച്ച് ഉന്നത അധികൃതർക്ക് റിപ്പോർട്ട് ചെയ്യുന്നതായി 'ദി എപോക്ക് ടൈംസ്' റിപ്പോർട്ട് ചെയ്തു.

പുതിയ വിദ്യാർഥികൾ പ്രവേശിക്കുന്നതിന് മുമ്പ് അവരുടെ കുടുംബങ്ങളുടെ പശ്ചാത്തല വിവരങ്ങൾ വിദ്യാഭ്യാസ സംവിധാനം വർഷംതോറും പരിശോധിക്കുന്നതായും മതപരമായ ബന്ധവും ഈ വിവരശേഖരണത്തിന്റെ ഭാഗമാണെന്നും ചെങ്‌ഡു വിദ്യാഭ്യാസ അധികൃതരിലെ ഒരു ജീവനക്കാരൻ പറഞ്ഞതായി റിപ്പോർട്ടിലുണ്ട്.

ചൈനീസ് കമ്മ്യൂണിസ്റ്റ് പാർട്ടി മതത്തെ രാഷ്ട്രീയ-ആശയപരമായ നിയന്ത്രണത്തിന്റെ ഭാഗമായാണ് സമീപിക്കുന്നതെന്ന വിലയിരുത്തലും റിപ്പോർട്ടിലുണ്ട്. മതകാര്യങ്ങളിൽ പാർട്ടിയുടെ നേതൃത്വവും നിയന്ത്രണവും ശക്തിപ്പെടുത്തുന്നതിനൊപ്പം മതങ്ങളുടെ 'ചൈനീസ് സ്വഭാവവൽക്കരണം' (Sinicization of religion) നടപ്പാക്കാനും ചൈനീസ് നേതൃത്വം ശ്രമിച്ചുവരുന്നതായി റിപ്പോർട്ട് പറയുന്നു.

2025ലും ചൈനീസ് പ്രസിഡന്റ് ഷി ജിൻപിങ് മതകാര്യങ്ങളിൽ പാർട്ടിയുടെ നേതൃത്വം കൂടുതൽ ശക്തിപ്പെടുത്തണമെന്നും മതപരമായ പ്രവർത്തനങ്ങളെ പാർട്ടിയുടെ സമഗ്ര നേതൃത്വ സംവിധാനത്തിന്റെ ഭാഗമാക്കണമെന്നും ആഹ്വാനം ചെയ്തതായും റിപ്പോർട്ട് വ്യക്തമാക്കുന്നു.