യഷ്-ഗീതു മോഹന്‍ദാസ് കൂട്ടുകെട്ടിന്റെ 'ടോക്‌സിക്; എ ഫെയറിടെയില്‍ ഫോര്‍ ഗ്രോണ്‍ അപ്പ്‌സ്' റിലീസിനൊരുങ്ങുകയാണ്. കഴിഞ്ഞ ദിവസം ചിത്രത്തിന്റെ ട്രെയിലര്‍ പുറത്തുവന്നിരുന്നു. ബെംഗളൂരുവിലാണ് ചിത്രത്തിന്റെ ട്രെയിലര്‍ ലോഞ്ചിങ് ചടങ്ങ് നടന്നത്. നയന്‍താരയും ഈ പരിപാടിയില്‍ പങ്കെടുത്തിരുന്നു. നായകനായ യഷിനേക്കുറിച്ചും അദ്ദേഹത്തിന്റെ ഭാര്യയും നടിയുമായ രാധികാ പണ്ഡിറ്റിനേക്കുറിച്ചും നയന്‍താര പറഞ്ഞ വാക്കുകളാണ് ശ്രദ്ധ നേടുന്നത്.

'ഞാന്‍ ഒട്ടനവധി സൂപ്പര്‍താരങ്ങള്‍ക്കൊപ്പം പ്രവര്‍ത്തിച്ചിട്ടുണ്ട്. എന്നാല്‍ യഷിനെ കണ്ടപ്പോള്‍, സ്‌ക്രീനില്‍ കാണുന്ന ആ വലിയ 'റോക്കി' പ്രതിച്ഛായ പോലെ തന്നെയാണ് അദ്ദേഹം യഥാര്‍ത്ഥ ജീവിതത്തിലും എന്ന് എനിക്ക് മനസ്സിലായി. അതിലുപരി, എന്റെ ജീവിതത്തില്‍ ഇത്രയും കഠിനാധ്വാനം ചെയ്യുന്ന മറ്റൊരു നടനെ ഞാന്‍ കണ്ടിട്ടില്ല. സെറ്റിലെ ഓരോ ദിവസവും ഞാന്‍ അത്ഭുതപ്പെട്ടുപോയിട്ടുണ്ട്. തന്റെ വ്യക്തിജീവിതവും കുടുംബത്തോടും മക്കളോടും ഒപ്പം ചെലവഴിക്കേണ്ട സമയവും പൂര്‍ണമായി മാറ്റിവെച്ച്, തന്റെ ജീവിതത്തിലെ നാലര വര്‍ഷമാണ് അദ്ദേഹം ഈ സിനിമയ്ക്കായി നല്‍കിയിരിക്കുന്നത്.

ജോലിയും തിരക്കഥയും ഷൂട്ടിംഗും ഒപ്പം ഓരോ അഭിനേതാവും സുഖമായിരിക്കുന്നുണ്ടെന്നും തങ്ങളുടെ ഏറ്റവും മികച്ച പ്രകടനം നല്‍കുന്നുണ്ടെന്നും ഉറപ്പാക്കുന്നതിലേക്ക് മാത്രമാണ് അദ്ദേഹം പൂര്‍ണമായും ശ്രദ്ധ കേന്ദ്രീകരിച്ചിരിക്കുന്നത്. ഗീതുവിനെ അദ്ദേഹം പരിചരിച്ചതുപോലെ ഒരു സംവിധായകനെ മറ്റേതൊരു നടനോ സഹനിര്‍മ്മാതാവോ പരിചരിക്കുന്നത് ഞാന്‍ കണ്ടിട്ടില്ല. ഒരു നടന്‍, നിര്‍മാതാവ്, കുടുംബനാഥന്‍, സത്യസന്ധനായ മനുഷ്യന്‍ എന്നീ നിലകളില്‍ യഷ്, എനിക്ക് നിങ്ങളോട് വലിയ ബഹുമാനമുണ്ട്.

രാധികയെക്കുറിച്ചും എടുത്തുപറയാന്‍ ഞാന്‍ ആഗ്രഹിക്കുന്നു. ഒരു സിനിമ ബ്ലോക്ക്ബസ്റ്റര്‍ ആകുമ്പോള്‍ എല്ലാവരും കാസ്റ്റിനെക്കുറിച്ചും അണിയറപ്രവര്‍ത്തകരെക്കുറിച്ചും സംസാരിക്കുന്നു, എന്നാല്‍ ആരുടെയും കുടുംബങ്ങളെക്കുറിച്ചും അവരുടെ ത്യാഗങ്ങളെക്കുറിച്ചും ആരും സംസാരിക്കുന്നില്ല. യഷിന്റെ ഏറ്റവും വലിയ ശക്തി രാധികയാണ്, അദ്ദേഹത്തിന്റെ സ്വപ്ന സാക്ഷാത്കാരത്തിനായി തന്റെ ഭര്‍ത്താവിനൊപ്പമുള്ള സമയം അവള്‍ മാറ്റിവെച്ച രീതി അത്ഭുതപ്പെടുത്തുന്നതാണ്. നിങ്ങളോട് എനിക്ക് വലിയ ബഹുമാനവും സ്‌നേഹവുമുണ്ട്; നയന്‍താര പറഞ്ഞു.