കാലിഫോർണിയ: അമേരിക്കൻ ഇ-കൊമേഴ്‌സ് കമ്പനിയായ ഇബേ (eBay)ക്കെതിരെ ഏഴ് വർഷമായി തുടരുന്ന നിയമപോരാട്ടത്തിൽ മാധ്യമപ്രവർത്തകരായ ഡേവിഡ് സ്റ്റെയ്‌നർക്കും ഇന സ്റ്റെയ്‌നർക്കും വൻ വിജയം. 2019-ൽ കമ്പനിയുടെ സുരക്ഷാ വിഭാഗം നടത്തിയെന്ന് കണ്ടെത്തിയ ഭീഷണിപ്പെടുത്തലും പിന്തുടരലും (stalking) സംബന്ധിച്ച കേസിൽ ഇബേയും മുൻ ഉന്നത ഉദ്യോഗസ്ഥരും ചേർന്ന് ആകെ 56 മില്യൺ ഡോളർ നഷ്ടപരിഹാരം നൽകാൻ ധാരണയിലെത്തി. കരാർ പ്രകാരം ഇബേ 46.15 മില്യൺ ഡോളർ ദമ്പതികൾക്ക് നൽകും. കൂടാതെ 6 മില്യൺ ഡോളർ വിവിധ സന്നദ്ധസംഘടനകൾക്ക് സംഭാവനയായും നൽകും. മുൻ സിഇഒ ഡെവിൻ വെനിഗ്  ഉൾപ്പെടെ മൂന്ന് മുൻ ഉദ്യോഗസ്ഥർ ചേർന്ന് 2.55 മില്യൺ ഡോളർ നൽകും. മാധ്യമസ്വാതന്ത്ര്യത്തിനായി പ്രവർത്തിക്കുന്ന ഒരു സംഘടനയ്ക്ക് ഇന സ്റ്റെയ്‌നറുടെ പേരിൽ 1 മില്യൺ ഡോളർ സംഭാവന ചെയ്യുമെന്നും വെനിഗ് അറിയിച്ചു.
 

1990-കളുടെ അവസാനം മുതൽ EcommerceBytes എന്ന വെബ്‌സൈറ്റിലൂടെ ഇബേ ഉൾപ്പെടെയുള്ള ഇ-കൊമേഴ്‌സ് കമ്പനികളെ വിമർശനാത്മകമായി വിലയിരുത്തിയിരുന്ന സ്റ്റെയ്‌നർ ദമ്പതികൾ 2019-ൽ പ്രസിദ്ധീകരിച്ച ചില ലേഖനങ്ങളെ തുടർന്നാണ് ആക്രമണത്തിന് ഇരയായത്. തുടർന്ന് ജീവനുള്ള പാറ്റകൾ, രക്തം പുരണ്ട പന്നിമുഖം, ശവചക്രം, പങ്കാളിയുടെ മരണത്തെ അതിജീവിക്കുന്നതിനെക്കുറിച്ചുള്ള പുസ്തകം തുടങ്ങിയ ഭീഷണിസൂചനകൾ നിറഞ്ഞ വസ്തുക്കൾ ഇവരുടെ വീട്ടിലേക്ക് അയയ്ക്കുകയും, ഓൺലൈനിൽ നിരന്തരം ഭീഷണിപ്പെടുത്തുകയും, വാഹനത്തിൽ രഹസ്യ ട്രാക്കർ സ്ഥാപിക്കാൻ വരെ ശ്രമിക്കുകയും ചെയ്തതായി അന്വേഷണത്തിൽ കണ്ടെത്തി.

2020-ൽ ഇബേയുടെ സുരക്ഷാ വിഭാഗത്തിലെ ഏഴ് അംഗങ്ങൾ കുറ്റം സമ്മതിക്കുകയും ചിലർ തടവുശിക്ഷ അനുഭവിക്കുകയും ചെയ്തെങ്കിലും, ഉന്നത ഉദ്യോഗസ്ഥർക്കെതിരെ ക്രിമിനൽ നടപടി ഉണ്ടായിരുന്നില്ല. തുടർന്ന് 2024-ൽ യുഎസ് നീതിന്യായ വകുപ്പ് ഇബേയ്‌ക്കെതിരെ സ്റ്റോക്കിംഗ്, സാക്ഷികളെ സ്വാധീനിക്കാൻ ശ്രമം, നീതിനടപടി തടസ്സപ്പെടുത്തൽ തുടങ്ങിയ കുറ്റങ്ങൾ ചുമത്തിയെങ്കിലും ഡിഫേർഡ് പ്രോസിക്യൂഷൻ കരാറിന്റെ ഭാഗമായി കേസ് പിൻവലിക്കുകയും കമ്പനി 3 മില്യൺ ഡോളർ പിഴ അടയ്ക്കുകയും ചെയ്തു.

"ഇത് പണത്തിനുവേണ്ടിയുള്ള പോരാട്ടമായിരുന്നില്ല. എന്തുകൊണ്ടാണ് ഇത് ഞങ്ങൾക്ക് സംഭവിച്ചതെന്ന് അറിയാനും, വലിയ കോർപ്പറേറ്റുകളിലെ ഉന്നത ഉദ്യോഗസ്ഥർ അവരുടെ അധികാരം ദുരുപയോഗം ചെയ്യാതിരിക്കാൻ മുന്നറിയിപ്പാകാനുമായിരുന്നു ഈ കേസ്," എന്ന് ഇന സ്റ്റെയ്‌നർ പ്രതികരിച്ചു. 2027 ജനുവരിയിൽ വിചാരണ ആരംഭിക്കാനിരിക്കെയായിരുന്നു പുതിയ ഒത്തുതീർപ്പ് നിലവിൽ വന്നത്. ഇതോടെ കേസ് സ്ഥിരമായി പിൻവലിക്കാൻ ദമ്പതികൾ കോടതിയെ സമീപിച്ചു. കോർപ്പറേറ്റ് അധികാരദുരുപയോഗത്തിനെതിരായ സുപ്രധാന നിയമവിജയമായാണ് ഈ ഒത്തുതീർപ്പ് വിലയിരുത്തപ്പെടുന്നത്.